Pika (NSS) - ဩဂုတ် ၃

ဒေသတွင်းအင်အားကြီးများပါဝင်သော ပဋိပက္ခမှတစ်ဆင့် အရှေ့အလယ်ပိုင်းဒေသတွင် ငြိမ်းချမ်းရေးကို ရရှိနိုင်လိမ့်မည်ဖြစ်ကြောင်း ရုရှားသမ္မတဟောင်း ဒီမစ်ထရီမက်ဗီဒက်က အကြံပြုပြောဆိုခဲ့သည်။ 

အီရန်နှင့်အစ္စရေးကြားတင်းမာမှုများ မြင့်တက်လာခြင်းအပြင် ဒေသတွင်းနှင့် ပြင်ပရှိ ၎င်းတို့၏မိတ်ဖက်များကြားတွင်လည်း တင်းမာမှုများမြင့်တက်လာခြင်းကို ဒီမစ်ထရီမက်ဗီဒက်က မီးမောင်းထိုးပြကာ ပြောဆိုခဲ့ခြင်းဖြစ်ကြောင်းသိရသည်။ ဒီမစ်ထရီမက်ဗီဒက်က 'အရှေ့အလယ်ပိုင်းဒေသမှာတင်းမာမှုတွေ မြင့်တက်လာနေပါတယ်။ အပြစ်မဲ့တဲ့အသက်တွေ ဆုံးရှုံးခဲ့ရတဲ့အတွက် တကယ်စိတ်မကောင်းဖြစ်မိပါတယ်။ သူတို့ဟာ ရွံရှာဖွယ်ကောင်းတဲ့ အမေရိကန်ရဲ့ ဓားစာခံတွေသာဖြစ်ပါတယ်။ ဒါကြောင့် အလုံးစုံစစ်ပွဲဟာ ဒေသတွင်းမှာ ငြိမ်းချမ်းရေးရရှိနိုင်မယ့် တစ်ခုတည်းသော နည်းလမ်းဖြစ်တယ်ဆိုတာ အားလုံးလည်းသိကြမှာပါ'ဟု ပြောဆိုခဲ့သည်။

ဇူလိုင်လ(၃၁)ရက်နေ့က အီရန်နိုင်ငံ တီဟီရန်မြို့ကို ဒုံးကျည်နဲ့တိုက်ခိုက်ခံရမှုအတွင်း ဟားမက်လက်နက်ကိုင်အဖွဲ့ နိုင်ငံရေးခေါင်းဆောင် Ismail Haniyeh လုပ်ကြံသတ်ဖြတ်ခံရပြီးနောက် ဒီမစ်ထရီမက်ဗီဒက်၏ မှတ်ချက်များထွက်ပေါ်လာခြင်းဖြစ်သည်။ အဆိုပါတိုက်ခိုက်မှုကို အစ္စရေးက ကြိုး ကိုင်ခဲ့ခြင်းဖြစ်ကြောင်း ဟားမက်လက်နက်ကိုင်အဖွဲ့က စွပ်စွဲပြောဆိုခဲ့သည်။ ထို့ပြင် အဆိုပါ စက်ဆုပ်ရွံရှာဖွယ်ကောင်းသော ရာဇဝတ်မှုအတွက် သင့်လျော်သောတန်ဖိုးကို ပြန်လည်ပေးဆပ်ရမည်ဖြစ်ကြောင်း ဟားမက်လက်နက်ကိုင်အဖွဲ့က သတိပေးပြောဆိုခဲ့သည်။ 

ယင်းဖြစ်ရပ်နှင့်ပတ်သက်ပြီး ပါဝင်ပတ်သက်မှု ရှိ/မရှိဆိုသည့်အချက်ကို အစ္စရေးက ငြင်းဆိုခဲ့ခြင်း သို့မဟုတ် အတည်ပြုခဲ့ခြင်းမျိုးမရှိခဲ့ကြောင်းလည်း သိရသည်။ သို့သော်လည်း အစ္စရေးတပ်ဖွဲ့များသည် ဟားမက်လက် နက်ကိုင်အဖွဲ့၊ ဟူသီလက်နက်ကိုင်အဖွဲ့နှင့် ဟစ်ဘိုလာလက်နက်ကိုင်အဖွဲ့တို့အပေါ် တိုက်ခိုက်မှုများလုပ်ဆောင်ခဲ့ကြောင်း အစ္စရေးဝန်ကြီးချုပ်နေတန်ရာဟုက ဇူလိုင်လ(၃၁)ရက်နေ့တွင် ထုတ်ပြန်ပြောဆိုခဲ့သည်။