Pika (NSS)  - ဇူလိုင် ၂၄

ဘင်္ဂလားဒေ့ရှ်နိုင်ငံမှာဖြစ်ပွားနေတဲ့ ဆန္ဒပြပွဲတွေကြောင့်ထုတ်ပြန်ခဲ့တဲ့ ညမထွက်ရအမိန့်ကို အစိုးရကပြန်လည်ဖြေလျှော့ပေးခဲ့ပြီးနောက် ဇူလိုင်လ(၂၄) ရက်နေ့မှာ စက်ရုံတွေနဲ့ ဘဏ်တွေပြန်လည်ဖွင့်လှစ်လာခဲ့ပြီဖြစ်တယ်လို့ သိရပါတယ်။

ဒါ့ပြင်ရုံးတွေလည်းပြန်လည်ဖွင့်လှစ်ခဲ့ပြီး အင်တာနက်တွေလည်း ပြန်လည်အသုံးပြုခွင့်ရနေပေမယ့် ဆိုရှယ်မီဒီယာတွေအသုံးပြုခွင့်ကိုတော့ ဆက် လက်ရပ်ဆိုင်းထားဆဲဖြစ်တယ်လို့သိရပါတယ်။ ပြီးခဲ့တဲ့ရက်ပိုင်းအတွင်း ဘင်္ဂလားဒေ့ရှ်နိုင်ငံမှာ အလုပ်ခန့်အပ်ရေးနဲ့ပတ်သက်ပြီး တက္ကသိုလ်ကျောင်း သားတွေဦးဆောင်တဲ့ ဆန္ဒပြပွဲတွေ စတင်ပေါ်ပေါက်လာခဲ့တာဖြစ်ပြီး ရုန်းရင်းဆန်ခတ်မှုတွေအတွင်း အနည်းဆုံးလူ(၁၅၀)ကျော် သေဆုံးခဲ့တယ်လို့သိရပါတယ်။ အလုပ်အကိုင်တွေရဲ့(၉၃)ရာခိုင်နှုန်းကို အရည်အချင်းပြည့်မီသူတွေအတွက် ဖွင့်လှစ်ပေးသင့်တယ်လို့ ဘင်္ဂလားဒေ့ရှ်အစိုးရက ဆုံးဖြတ်ခဲ့ပြီးနောက် ဇူလိုင်လ(၂၁)ရက်နေ့တည်းက ဆန္ဒပြပွဲတွေ ငြိမ်သက်သွားခဲ့တာလည်းဖြစ်ပါတယ်။

ညမထွက်ရအမိန့်ထုတ်ပြန်ထားချိန်အတွင်း ထုတ်လုပ်မှုတွေကို ရပ်ဆိုင်းထားခဲ့ပေမယ့်လည်း အမိန့်ကိုဖြေလျှော့လိုက်ပြီးနောက်မှာတော့ အထည်ချုပ်နဲ့အထည်အလိပ်လုပ်ငန်းတွေကို ပြန်လည်စတင်ဖွင့်လှစ်ခဲ့တယ်လို့ သိရပါတယ်။ ဘင်္ဂလားဒေ့ရှ်အထည်ချုပ်လုပ်ငန်းရှင်များနဲ့ ပို့ကုန်လုပ်ငန်းရှင်များအသင်း ဥက္ကဋ္ဌ S.M. Mannan က "ကျွန်တော်တို့ရဲ့စက်ရုံတွေ အကုန်လုံး ဒီနေ့မှာ ပြန်လည်ဖွင့်လှစ်ခဲ့ပါတယ်။ ဒါ့ပြင် စတော့အိတ်ချိန်းရုံးတွေနဲ့ ဘဏ်တွေလည်း ပြန်လည်ဖွင့်လှစ်ခဲ့ပါတယ်"လို့ ပြောဆိုခဲ့ပါတယ်။ 

ဒါ့ပြင် ဇူလိုင်လ(၂၄)ရက်နေ့နဲ့ (၂၅)ရက်နေ့တို့မှာ ညမထွက်ရအမိန့် ကန့် သတ်ချက်တွေကို အချိန်(၇)နာရီကြာ ဖြေလျှော့ပေးမှာဖြစ်ပြီး ရုံးတွေကို နံနက်(၁၁)နာရီကနေ ညနေ(၃)နာရီအထိ ဖွင့်လှစ်သွားမှာဖြစ်တယ်လို့ အစိုးရကပြောကြားခဲ့ပါတယ်။