ရောင်နီ (NSS) - ဧပြီ ၂၁

         မလေးရှားနိုင်ငံ၊ ပီနန်ပြည်နယ်မှာ ဓာတ်လှေကားအတွင်း Down Syndrome ရောဂါရှိတဲ့ အမျိုးသားတစ်ဦးကို ရေနွေးပူပူနဲ့ပက်ခဲ့တဲ့ အသက် ၃၉ နှစ်အရွယ် အမျိုးသမီးတစ်ဦးကို ရဲတပ်ဖွဲ့က ဖမ်းဆီးလိုက်ပါတယ်။

          အဆိုပါ အမျိုးသမီးကို ဧပြီ ၁၉ ရက် ည ၉ နာရီ ၂၀ မိနစ်မှာ သူမနေထိုင်တဲ့ Bayan Lepas တိုက်ခန်းမှာပဲ ဖမ်းဆီးရမိခဲ့တယ်လို့ မလေးရှား ရဲတပ်ဖွဲ့က ပြောပါတယ်။ သူမကို အဆိုပါ ကိုယ်ထိလက်ရောက် စော်ကားမှုအတွက် စုံစမ်းစစ်ဆေးနေတယ်လို့ သိရပါတယ်။ အသက် ၃၃ နှစ်အရွယ် Down Syndrome ရောဂါရှိတဲ့အမျိုးသားတစ်ဦးဟာ ၁၆ လွှာရှိ ၎င်းရဲ့ တိုက်ခန်းကို ပြန်လာစဉ် အဆောက်အအုံ ဓာတ်လှေကားအတွင်း ရေနွေးနဲ့ ပက်ခံခဲ့ရတာ ဖြစ်ပါတယ်။ ဒီအဖြစ်အပျက်ရဲ့ CCTV ဗီဒီယိုဖိုင်ဟာ လူမှုကွန်ရက်မှာ ပျံ့နှံ့သွားပြီး အမျိုးသမီးရဲ့ လုပ်ရပ်ကို ဝေဖန်မှုတွေ အများအပြား ရှိခဲ့ပါတယ်။ အဆိုပါ ရေနွေးနဲ့အပတ်ခံရသူရဲ့ ညီမဖြစ်သူက ရဲတပ်ဖွဲ့ဆီ အကြောင်းကြားခဲ့တာ ဖြစ်ပါတယ်။

         အဆိုပါ အမျိူးသားဟာ ပီနန်ဆေးရုံမှာ ကုသမှု ခံယူနေပြီး အမျိုးသားရဲ့ ခန္ဓာကိုယ် အရှေ့နဲ့ နောက်ကျောမှာ မီးလောင်ဒဏ်ရာတွေ ရရှိခဲ့တယ်လို့ ဆေးအရာရှိတွေက အတည်ပြုခဲ့ပါတယ်။