ALynn (NSS) - မတ် ၂၁

အမေရိကန်နိုင်ငံခြားရေးဝန်ကြီး အန်တိုနီဘလင်ကန်သည် ဂါဇာကမ်းမြောင်တွင် အစ္စရေးတို့ အပစ်အခတ်ရပ်စဲကြရန် မျှော်လင့်ချက်ဖြင့် မတ်လ ၂၀ ရက် (ဗုဒ္ဓဟူးနေ့)က ဆော်ဒီအာရေဗျတွင် ဆွေးနွေးပွဲများကျင်းပနိုင်ရေး အရှ့အလယ်ပိုင်းခရီးစဉ်ကို စတင်ခဲ့သည်။ 

(ယနေ့) မတ်လ ၂၁ ရက် တွင် ဘလင်ကန်သည် အာရပ်နိုင်ငံခြားရေးဝန်ကြီးများ၊ ပါလက်စတိုင်းအကြီးတန်းအရာရှိတစ်ဦးတို့နှင့် ကိုင်ရိုတွင် တွေ့ဆုံကြမည်ဖြစ်ကြောင်း အီဂျစ်နိုင်ငံခြားရေးဝန်ကြီးဌာန၏ ထုတ်ပြန်ချက်အရသိရသည်။ ဘလင်ကန်သည် အစ္စရေးနှင့် ဟားမက်စ်တို့အကြား အပစ်အခတ်ရပ်စဲရန် ကြိုးပမ်းနေစဉ်တွင်ပင် ဂါဇာကမ်းမြောင်၌ ငတ်မွတ်ခေါင်းပါးမှု ဘေးဒုက္ခနှင့် ကြုံတွေ့နေကြရသည်။ 

အဆိုပါတွေ့ဆုံမှုနှင့်ပတ်သက်၍ အသေးစိတ်အချက်အလက်များကို မဖော် ပြထားသော်လည်း Reuters သတင်းဌာနမှ အီဂျစ်လုံခြုံရေးသတင်းရင်းမြစ်များကို ကိုးကား၍ အာရပ်နိုင်ငံများက အစ္စရေး-ပါလက်စတိုင်း ပဋိပက္ခအတွက် နိုင်ငံရေးအဖြေတစ်ခုရရှိရေး အစီအစဉ်များကို တင်ပြသွားမည်ဖြစ် ကြောင်း သိရသည်။ ဂါဇာတွင် အပစ်အခတ်ရပ်စဲရေး၊ အစ္စရေး ဓားစာခံများနှင့် ပါလက်စတိုင်း အကျဉ်းသားများ လွတ်မြောက်ရေး သဘောတူညီချက်ရရှိရန် ကြားဝင်ဖျန်ဖြေသူများဖြစ်သည့် ကာတာ၊ အီဂျစ်နှင့် အမေရိကန်တို့က အဆိုပါအစီအစဉ်များကို ခေတ္တဆိုင်းငံ့ထားခဲ့သည်။

ဆော်ဒီအာရေဗျသို့ ရောက်ရှိပြီးနောက် ဘလင်ကန်သည် ဆော်ဒီနိုင်ငံခြား ရေးဝန်ကြီး၊ မင်းသား Faisal bin Farhan နှင့် တွေ့ဆုံခဲ့ပြီး လက်ရှိအာဏာရ အိမ်ရှေ့မင်းသား Mohammed bin Salman နှင့် တွေ့ဆုံဆွေးနွေးသွားရန်လည်း စီစဉ်ထားသည်။ ၎င်းတို့သံတမန်နှစ်ဦးသည် “ဂါဇာကမ်းမြောင်ရှိ အရပ်သားအားလုံးကို ကာကွယ်ရန်နှင့် လိုအပ်နေသူများအား လူသားချင်း စာနာထောက်ထားမှုဆိုင်ရာ အကူအညီများ ချက်ခြင်းတိုးမြှင့်ရန် အရေးတကြီးလိုအပ်ကြောင်း ဆွေးနွေးခဲ့သည်” ဟု အမေရိကန်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။ 

ယခုခရီးစဉ်သည် ဘလင်ကန်အတွက် အစ္စရေးစစ်ပွဲစတင်ခဲ့သည့် အောက်တို ဘာ ၇ ရက်မှစ၍ ၆ ကြိမ်မြောက် ခရီးစဉ်လည်းဖြစ်သည်။ ၎င်း၏ ခရီးစဉ်အတွင်း ဂါဇာကမ်းမြောင်ဒေသ၏ အုပ်ချုပ်ရေး၊ လုံခြုံရေးနှင့် ပြန်လည်ဖွံ့ဖြိုးတိုးတက်ရေးဆိုင်ရာ အစီအမံများနှင့်ပတ်သက်၍ ဆွေးနွေးမှုများ ဆက်လက်လုပ်ဆောင်သွားမည်ဖြစ်ကြောင်း ပြောကြားခဲ့သည်။