Pika (NSS) - မတ် ၂ဝ

ဘာရိန်းနိုင်ငံသို့ အမေရိကန်ဒေါ်လာ(၂ ဒသမ ၂)ဘီလျံတန်ဖိုးရှိ အဆင်မြင့်တိုက်ပွဲဝင်တင့်ကားများ ရောင်းချပေးရန် အမေရိကန်အစိုးရက မတ်လ (၁၉)ရက်တွင် အတည်ပြုခဲ့ကြောင်းသိရသည်။

မြေပြင်တိုက်ပွဲများတွင် အသုံးပြုသည့် M1A2 Abrams တင့်ကားအစီးရေ (၅၀)ကို ဘာရိန်းနိုင်ငံသို့ ရောင်းချပေးရန် အဆင်သင့်ဖြစ်နေပြီဟု လွှတ် တော်ကို အကြောင်းကြားခဲ့ကြောင်း အမေရိကန်နိုင်ငံခြားရေးဝန်ကြီးဌာနက ပြောကြားခဲ့သည်။ အမေရိကန်နိုင်ငံခြားရေးဝန်ကြီးဌာနက 'ဒီရောင်းချမှုဟာ လက်ရှိနဲ့ အနာဂတ်ခြိမ်းခြောက်မှုတွေကို ရင်ဆိုင်ဖို့အတွက် ဘာရိန်းနိုင်ငံရဲ့ စွမ်းရည်တွေကို မြှင့်တင်ပေးပါလိမ့်မယ်။ ပြီးတော့ ဒီရောင်းချမှုဟာ ဘာရိန်းနိုင်ငံကို ရန်သူတွေကို ဟန့်တားစေနိုင်မှာဖြစ်ပြီး အမေရိကန်၊ အခြားမိတ်ဖက်နိုင်ငံတွေနဲ့ ဒေသတွင်းစစ်ဆင်ရေးတွေမှာ ပါဝင်စေနိုင်မယ့် စွမ်းရည်ကို ပံ့ပိုးပေးနိုင်ပါလိမ့်မယ်'ဟု ပြောဆိုခဲ့သည်။

အမေရိကန်လွှတ်တော်သည် စစ်ဘက်ဆိုင်ရာ ရောင်းချမှုအများအပြားကို ခွင့်ပြုပေးခဲ့သော်လည်း ဘာရိန်းနိုင်ငံသို့ တင့်ကားများ ရောင်းချရန် အဆိုပြုချက်ကို ပိတ်ပင်ထားနိုင်ကြောင်းသိရသည်။ ဘာရိန်းနိုင်ငံသည် အမေရိကန်ရေတပ်၏ ပဉ္စမမြောက်ရေယာဉ်စု အခြေစိုက်ရာနေရာဖြစ်ပြီး အမေရိကန်နှင့် ကာကွယ်ရေးဆိုင်ရာ ပူးပေါင်းဆောင်ရွက်မှုများ လုပ်ဆောင်ခွင့်ပေးထားကြောင်းလည်းသိရသည်။ ဘာရိန်းနိုင်ငံသည် ပင်လယ်နီအတွင်းကုန်သွယ်မှုများကို ကာကွယ်ရန်အတွက် အမေရိကန် နှင့် ဗြိတိန်တို့ဦးဆောင်သည့် ညွန့်ပေါင်းတပ်ဖွဲ့တွင် အဖွဲ့ဝင်နိုင်ငံအဖြစ် ပါဝင်ရန် လက်မှတ်ရေးထိုးထားကြောင်းလည်းသိရသည်။ Abrams တင့်ကားများသည် ကမ္ဘာပေါ်တွင် အလေးချိန်အများဆုံးတင့်ကားများဖြစ်ပြီး အမေရိကန်စစ်တပ်၏ အဓိကကျသော တင့်ကားများဖြစ်ကြောင်းလည်း သိရသည်။