ယွန်း (NSS) - မတ် ၁၃ 

ဧရာဝတီတိုင်း၊ ငပုတောမြို့နယ်ရှိ မော်တင်စွန်းကမ်းခြေအနီးတွင် ရှားပါးမျိုးစိတ် ကြောင်လိမ်ကျွမ်းထိုးလင်းပိုင်(၁၅)ကောင်ကို တွေ့ရှိခဲ့ကြောင်း ငါးလုပ်ငန်း ဦးစီးဌာနထံမှ သိရသည်။

အဆိုပါ လင်းပိုင်(၁၅)ကောင်သည် ပြီးခဲ့သည့် မတ်လ(၁၂)ရက် နေ့လည်(၂)နာရီအချိန်ခန့်တွင် မော်တင်စွမ်းကမ်းခြေအနီးရှိ ရေလုပ်သားများ၏ ကမ်းဆွဲပိုက်ဖြင့် ငြိပါလာခြင်းဖြစ်ကြောင်း သိရသည်။

၎င်းတို့သည် ဧရာဝတီလင်းပိုင်များမဟုတ်ဘဲ ရှားပါးမျိုးစိတ်စာရင်းဝင် ကြောင်လိမ်ကျွမ်းထိုးလင်းပိုင်များဖြစ်ကြောင်း ငါးလုပ်ငန်းဦးစီးဌာနမှ တာဝန်ရှိသူတစ်ဦးက NP News ကို ပြောထားသည်။

“‌ရေလုပ်သားရဲ့ကမ်းဆွဲပိုက်မှာ ငြိလာခဲ့တာ။ တမင်ဖမ်းတာ မဟုတ်ပါဘူး။ ၁၅ ကောင် ပါလာတယ်။ ၁၅ မိနစ်လောက်ပဲကြာတယ်။ ပြန်လွှတ်ပေးလိုက်တယ်။ ဘုရားပွဲအချိန်လည်းဖြစ်တော့ ဘုရားဖူးတွေနဲ့ ရေလုပ်သားတွေနဲ့ပေါင်းပြီးတော့ ပင်လယ်ထဲကို အရှင်ပြန်လွှတ်လိုက်တယ်။ သေတာမရှိဘူး။ ဧရာဝတီလင်းပိုင် မဟုတ်ပါဘူး။ လင်းပိုင်မျိုးစိတ်ထဲကပဲ ကြောင်လိမ်ကျွမ်းထိုးလင်းပိုင် အမျိုးအစားပါ” ဟု ငါးလုပ်ငန်းဦးစီးဌာနမှ တာဝန်ရှိသူတစ်ဦးက ဆိုသည်။

အဆိုပါ ကြောင်လိမ်ကျွမ်းထိုးလင်းပိုင်များသည် ပြီးခဲ့သည့် ဖေဖော်ဝါရီလကုန်ပိုင်းမှစ၍ လိပ်ကျွန်းနှင့် မော်တင်စွန်းကြားရေပြင်တွင် အုပ်စုလိုက် ကျက်စားလေ့ရှိပြီး ၎င်းတို့သည်လည်း ရှားပါးမျိုးစိတ်စာရင်းဝင် လင်းပိုင်များဖြစ်ကြောင်း သိရသည်။

လက်ရှိတွင် ငါးလုပ်ငန်းဦးစီးဌာနအနေဖြင့် ရှားပါးမျိုးစိတ်ဖြစ်သည့် ဧရာဝတီလင်းပိုင်ထိန်းသိမ်းရေးကို အဖွဲ့အစည်းများနှင့် ပူးပေါင်းဆောင်ရွက်စီစဉ်လျက်ရှိပြီး ကြောင်လိမ်ကျွမ်းထိုးလင်းပိုင်များကိုလည်း ထိန်းသိမ်းနိုင်ရေးအတွက် စီစဉ်ဆောင်ရွက်နေကြောင်း သိရသည်။