သုတကျော် (NSS) - မတ် ၁၃ 

ပုဏ္ဏားကျွန်းမြို့မှာ ၈၀ ရာခိုင်နှုန်းအထိ ပျက်စီးသွားခဲ့သည့်အပြင် အဆိုပါမြို့နယ်တွင် စစ်ဘေးရှောင် ၇ဝဝဝ ကျော် အကူအညီလိုအပ်နေကြောင်း ဒုက္ခသည်များ အရေးနှင့်ပတ်သက်၍ ကူညီဆောင်ရွက်ပေးနေသူ ဒေသခံတစ်ဦးက The Statesman ဂျာနယ်သို့ အတည်ပြု ပြောကြားသည်။ 

ပြီးခဲ့သည့် မတ်လ ၄ ရက် တွင် ပုဏ္ဏားကျွန်းမြို့ကို AA က ထိန်းချုပ်ထားကြောင်း အဆိုပါအဖွဲ့ ၏ ကြေငြာချက်အရ သိရကာ လက်နက်ကြီး ကျရောက်သည့်အတွက် ပုဏ္ဏားကျွန်းမြို့တွင် အထက်ပါအတိုင်း အပျက်အစီးများ များပြား နေခြင်းဖြစ်ပြီး ၈ဝ ရာခိုင်နှုန်းခန့် ပျက်စီးသွားကြောင်းကိုမျက်မြင်အခြေအနေအရ အတည်ပြုနိုင်ပြီဖြစ်ကြောင်း ၎င်းက ဆိုသည်။ 

“လောလောဆယ်တော့ မြို့ပြန်လည်ထူထောင်ရေးထက် စစ်ဘေးရှောင်အရေးပေါ့။ အခုအနေအထားမှာ မြို့ထဲကို ပြန်ဝင်လို့ မရသေးဘူး။ စစ်ဘေးရှောင်ကူညီရေးကိုပဲ ဦးစားပေးပြီး လုပ်နေတာပေါ့။ ကျွန်တော်တို့မြို့နယ်မှာ အကူအညီတွေ အများကြီး လိုအပ်နေပါတယ်။ လူဦးရေကတော့ ၇၂၀၀ လောက် အရေးပေါ်အကူအညီလိုအပ်နေ ဆဲပါ” ဟု အထက်ပါဒေသခံ က ဆိုသည်။ 

အဆိုပါ လူပေါင်း ၇ဝဝဝ ကျော်အတွင်းတွင် ပုဏ္ဏားကျွန်းမြို့ တစ်မြို့တည်းမှ မဟုတ်ဘဲ မြို့နယ်အတွင်းမှလည်း ပါဝင်ကာ အဆက်အသွယ်မရသေးသည့် ရွာအချို့လည်း ရှိနေသေးကြောင်း သိရသည်။ 

“မြို့ပေါ် အခြေအနေက ရစရာ မရှိဖြစ်သွားတယ်။ ရွာတွေလောက်ပဲ ကျန်တာပေါ့။ ၇၀၀၀ ကျော် ဆိုတာက ပုဏ္ဏားကျွန်းမြို့နယ်မှာ သူ့အစုနဲ့သူ တိမ်းရှောင်နေတဲ့အရေအတွက်ကို စုပြီး ပြောတာပါ။ ဒုက္ခသည်တွေ လိုတာက စားနပ်ရိက္ခာပါ။ ခြင်ထောင်တို့၊ ဖျာတို့လည်း လိုပါတယ်။ တောထဲမှာ နေရတော့ ခြင်လည်း ကိုက်တယ်လေ။ မြေပြင်ပေါ် လှဲအိပ်လို့ မရတော့ ဒါတွေ လိုတာပါ။ အဓိကတော့ စားနပ်ရိက္ခာလိုနေတာပါ” ဟု ၎င်းက ဆိုသည်။ 

ရခိုင်ပြည်နယ် က မင်းပြားမြို့၊ ပေါက်တောမြို့၊ ပုဏ္ဏားကျွန်းမြို့ နှင့် ကျောက်တော်မြို့ အပါအဝင် ရခိုင်ပြည်နယ် က မြို့အချို့ကို AA က ထိန်းချုပ်ထားကာ ၂၀၂၃ခုနှစ် နိုဝင်ဘာလက စတင်ကာ တကျော့ပြန်ပဋိပက္ခများ ဖြစ်ပွားချိန်မှ စတင်ပြီး စားနပ်ရိက္ခာရှားပါးမှုနှင့် အခြားသောကုန်စည်ပစ္စည်းပြတ်လပ်မှုများဖြစ်ပွားနေကာ မရှိမဖြစ်ကုန်ပစ္စည်း များမှာလည်း ဈေးနှုန်းများ မြင့်တက်နေကြောင်း သိရသည်။