NSS  - ဖေဖော်ဝါရီ ၂၉

မြန်မာအမျိုးသမီးများပါ ပထမဦးဆုံးအကြိမ်ဝင်ရောက်ဖြေဆိုမည့် ဝန်ဆောင်မှုလုပ်ငန်းအတွက် အမျိုးသား၊ အမျိုးသမီး လုပ်သား စုစုပေါင်း ၃,၃၇၀ ကျော်ခေါ်ယူသွားမည်ဖြစ်ကြောင်း ကိုရီးယားရောက် အလုပ်သမားအရေးဆောင်ရွက်သူများထံမှ သိရသည်။

ယခုတစ်ကြိမ်တွင် ကျင်းပမည့် EPS စာမေးပွဲတွင် မြန်မာအမျိုးသမီးများ ပထမဦးဆုံးအကြိမ်ဝင်ရောက် ဖြေဆိုခွင့်ရခြင်းလည်းဖြစ်သည်။

" ပထမဦးဆုံးအကြိမ်အဖြစ်ခေါ်ယူမယ့် တောင်ကိုရီးယားနိုင်ငံရဲ့ ဝန်ဆောင်မှုလုပ်ငန်းအတွက် လုပ်သားခေါ်ယူတဲ့အခါမှာ အမျိုး သား၊ အမျိုးသမီး ခွဲတမ်းသတ်မှတ်ထားတာမျိုးမရှိဘူး။ Quota (ခွဲတမ်း)နဲ့ ပတ်သက်ပြီး လုပ်ငန်းအမျိုးအစားအလိုက်သာ အချိုးကို သတ်မှတ်မှာဖြစ်ပါတယ်"ဟု ကိုရီးယားရောက် အလုပ်သမားအရေးဆောင်ရွက်သူတစ်ဦးက ပြောသည်။

တောင်ကိုရီးယားနိုင်ငံမှ ကုန်ထုတ်လုပ်ငန်း၊ ဆောက်လုပ်ရေးလုပ်ငန်း၊ စိုက်ပျိုးရေးနှင့် မွေးမြူရေးလုပ်ငန်းများတွင် လုပ်ကိုင်ရန်အတွက် ယခင်က အမျိုးသားများကိုသာ အဓိကခေါ်ယူခြင်းဖြစ်ကြောင်း သိရသည်။ EPS စာမေးပွဲဖြေဆိုခွင့်အတွက် အွန်လိုင်းမှတစ်ဆင့် မတ်လဆန်းတွင် စတင်လျှောက်ထားနိုင်မည် ဖြစ်ပြီး အစိုးရပြည်ပအလုပ်အကိုင်အေဂျင်စီ(POEA)မှ တစ်ဆင့် တောင်ကိုရီးယားသို့ EPS လုပ်သားများကို တာဝန်ယူစေလွှတ်နေခြင်းဖြစ်သည်။ 

၂၀၂၃ ခုနှစ်အတွင်း မြန်မာလုပ်သား ၁၀,၆၁၁ ဦး ပို့နိုင်ခဲ့ကာ ယခုနှစ်တွင်လည်း မြန်မာလုပ်သား ၁၁,၀၀၀  စေလွှတ်သွားမည်ဖြစ်ကြောင်း သိရသည်။