NSS - ဖေဖော်ဝါရီ ၂၆

စစ်ကိုင်းတိုင်း မုံရွာမြို့တွင် PDF အဖွဲ့က ကျောင်းသားမိဘအယောင် ဆောင်၍ ကျောင်းဝင်းအတွင်းရှိ လုံခြုံရေးအဖွဲ့ဝင်(၂)ဦးကို ပစ်ခတ် သတ် ဖြတ်မှု ဖြစ်ပွားခဲ့ကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် ဖေဖော်ဝါရီလ ၁၉ ရက်၊ နံနက် ၁၀ နာရီ ဝန်းကျင်အချိန်တွင် စစ်ကိုင်းတိုင်း မုံရွာမြို့ အောင်ချမ်းသာရပ်ကွက်ရှိ အမှတ်(၅) အခြေခံပညာ အထက်တန်းကျောင်းတွင် အထက်ပါကဲ့သို့ ဖြစ်ပွားခဲ့ကြောင်း လုံခြုံရေးတပ်ဖွဲ့နှင့်နီးစပ်သော မုံရွာမြို့ခံထံမှ သိရသည်။ အဆိုပါအထက်တန်းကျောင်းတွင် ကျောင်းသား၊ ကျောင်းသူများအနေဖြင့် အတန်း တင်စာမေးပွဲလာရောက်ဖြေဆိုနေသည့် ကာလဖြစ်ကြောင်းလည်း သိရသည်။

"ကျောင်းမှာ လုံခြုံရေးယူထားတဲ့ အရာခံ ဗိုလ်(၂)ယောက်အပစ်ခံရတာပေါ့။ ကျောင်းသားမိဘအယောင်ဆောင်ပြီးဝင်ပစ်သွားတာပါ။ လာတာက HONDA FIT ကားနဲ့လာတာ။ ကားပေါ်မှာ အသင့်စောင့်နေတာက (၃) ယောက်ပါတယ်။ တစ်ယောက်က ကျောင်းသားဘေးမှာ ကပ်လိုက်လာပြီး ခါးက ပစ္စတိုကိုထုတ်ပြီးတေ့ပစ်သွားတာ။ အမျိုးသားတွေချည်းပါပဲ"ဟု အထက်ပါမုံရွာမြို့ခံက NSS ကို ပြောသည်။

ထိုသို့ သေနတ်ဖြင့် လုပ်ကြံသတ်ဖြတ်ခံရမှုကြောင့် အသက်(၄၀) ကျော်ဝန်းကျင် လုံခြုံရေးတပ်ဖွဲ့ဝင်(၂)ဦးတွင် ရင်ဘတ်ကျည်ထိမှန်ဒဏ်ရာ (၁)ချက်စီဖြင့် သေဆုံးသွားခဲ့ကြောင်း သိရသည်။

"အပစ်ခံရတာက တစ်ချက်စီအပစ်ခံရတာ။ ရင်ဘက်ကိုတေ့ပစ်တာပေါ့။ တစ်ဦးကတော့ အခင်းဖြစ်တဲ့နေရာမှာပဲ ဆုံးတယ်။ ကျန်တဲ့ တစ်ယောက်က တော့ ဆေးရုံမှာ ဆုံးသွားတာပါ။ ပစ်ပြီးတာနဲ့ တန်း မောင်းပြေးသွားတာပါ။ မောင်းပြေးသွားတာကလည်း မြို့သစ်ဘက်ကို မောင်းပြေးသွားတယ်"ဟု ၎င်းက ဆက်လက် ပြောသည်။

ထို့ကြောင့် ယင်းဖြစ်စဉ်နှင့်ပတ်သက်၍ လုံခြုံရေးတပ်ဖွဲ့ဝင်များအနေဖြင့် လိုအပ်သည့် စုံစမ်းစစ်ဆေးမှုများ ဆက်လက်လုပ်ဆောင်လျက်ရှိကြောင်း သိရသည်။ "ဒီလိုတွေဖြစ်နေတော့ ကလေးတွေအတွက်လည်း စိုးရိမ်ထိတ်လန့်မှုတွေဖြစ်ရတာပေါ့။ ဒီလိုမျိုးဖြစ်စဉ်တွေက မုံရွာမှာအများကြီး ဖြစ်နေတာ။ ဒီဖြစ်စဉ်တွေနဲ့ပတ်သက်ပြီးရင်တော့ စာမေးပွဲ ရက်လည်းဖြစ်နေတော့ ကျောင်းတွေကိုလုံခြုံရေး တိုးမြှင့်ပေးစေချင်တာပေါ့"ဟု ၎င်းက အကြံပြုပြော ဆိုထားသည်။

အလားတူ ပြီးခဲ့သည့် ၂၀၂၃ ခုနှစ်၊ ဇွန်လ ၁၄ ရက်တွင်လည်း မုံရွာမြို့ရှိ နည်းပညာတက္ကသိုလ်၌ လုံခြုံရေးဆောင်ရွက်နေသည့် တပ်ဖွဲ့ကို PDF ပူး ပေါင်းအဖွဲ့က လာရောက်ပစ်ခတ်တိုက်ခိုက်ခဲ့ရာ တပ်ဖွဲ့ဝင်(၃)ဦး သေဆုံးခဲ့သည့် ဖြစ်စဉ်ဖြစ်ပွားခဲ့ဖူးသည်။