Pearl (NSS) - ဖေဖော်ဝါရီ ၂၂

မြိတ်မြို့ရှိ Sea View Condo အနီးတွင် ပေါက်ကွဲမှုဖြစ်ပွားခဲ့ရာ အမျိုးသားတစ်ဦး သေဆုံးသွားခဲ့ကြောင်း လုံခြုံရေးတပ်ဖွဲ့နှင့် နီးစပ်သူထံမှ သတင်းရ ရှိသည်။

ဖြစ်စဉ်မှာ ယမန်နေ့ (ဖေဖော်ဝါရီလ ၂၁ ရက်)၊ ည (၇) နာရီ၊ (၄၅)မိနစ်အချိန်ခန့်တွင် တနင်္သာရီတိုင်း၊ မြိတ်မြို့၊ ရေပုန်းရပ်ကွက်၊ ကမ်းနားလမ်း၊ Sea View Condo အနီးရှိ လမ်းဘေးအမှိုက်ပုံ၌ ဖြစ်ပွားခဲ့ခြင်းဖြစ်သည်။ 

အဆိုပါ လမ်းဘေး အမှိုက်ပုံမှ ပေါက်ကွဲမှုဖြစ်ပွားခဲ့သဖြင့် တာဝန်ရှိသူများက အခင်းဖြစ်နေရာသို့ သွားရောက် စစ်ဆေးမှုများ ဆောင်ရွက်ခဲ့ကြောင်း သိရသည်။ ဖြစ်စဉ်ကြောင့် လမ်းပေါ်၌သွားလာနေသော မြိတ်မြို့၊ ကလွင်ရေပုန်းရပ်ကွက်၊ မကျဉ်းပင်လမ်းထိပ်တွင် နေထိုင်သည့် ကိုဇော်လင်းဦး(ခ)သားကြီး (၃၇) နှစ်တွင် ဦးခေါင်းနောက်စေ့ပွင့်ထွက်ဒဏ်ရာရရှိကာ သေဆုံးသွားခဲ့ကြောင်း သိရသည်။ 

ထို့ပြင် ပေါက်ကွဲမှုကြောင့်  ကျွန်းစုမြို့နယ်၊ ကံမော်ကျေးရွာတွင်နေထိုင်သော ကိုနေလင်း(၂၅)နှစ် နှင့် မြိတ်မြို့၊ ရေပုန်းရပ်ကွက် နေထိုင်သော ဒေါ်သင်းသင်းစိုး(၄၂)နှစ်တို့၌ ပေါက်ကွဲစထိမှန်ဒဏ်ရာအသီးသီးရှိခဲ့ကြောင်း သိရသည်။ လက်ရှိတွင် ဒဏ်ရာရရှိသူ (၂)ဦးအား မြိတ်ဆေးရုံကြီးရှိ အရေးပေါ်ဌာန၌ ဆက်လက်ဆေးကုသဆောင်ရွက်ပေးလျက်ရှိကြောင်း သိရသည်။

အလားတူ မြိတ်မြို့ ဘုံပျံရပ်ကွက်နှင့် လေယာဉ်ကွင်းအနီး၌ ပေါက်ကွဲမှု ဖြစ်ပွားခဲ့သော်လည်း ထိခိုက်ဒဏ်ရာရရှိသူ မရှိကြောင်း သိရသည်။