ဂျန်ဇက် (NSS) - ဇန်နဝါရီ ၂၉

အာဆီယံသဘောတူညီချက်ငါးချက်ထဲမှာပါဝင်နေတဲ့ လူသားချင်းဆိုင်ရာစာနာမှုအကူအညီပေးဖို့ အစီအစဉ်တွေကို လက်တွေ့အကောင်အထည်ဖော်ဖို့အာဆီယံအထွေထွေအတွင်းရေးမှူးချုပ်နဲ့ မြန်မာနိုင်ငံဆိုင်ရာအာဆီယံဥက္ကဋ္ဌရဲ့အထူးကိုယ်စားလှယ်တို့တွေ့ဆုံဆွေးနွေးခဲ့ကြောင်း သိရပါတယ်။

မြန်မာနိုင်ငံမှာ အာဏာသိမ်းမှုဖြစ်ပွားခဲ့ပြီးနောက်ပိုင်း အာဆီယံအဖွဲ့ဟာ မြန်မာနိုင်ငံရေးအခက်အခဲတွေကို ဖြေရှင်းနိုင်ဖို့ ကြားဝင်ဆောင်ရွက်ခဲ့ပြီး နစကအဖွဲ့ခေါင်းဆောင်နဲ့တွေ့ဆုံဆွေးနွေးကာ အာဆီယံသဘောတူညီချက် ငါးချက်ကို ရရှိခဲ့ကြောင်း သိရပါတယ်။ 

ဒါပေမယ့် အာဆီယံသဘောတူညီချက်ငါးချက်က သိသာတိုးတက်မှုတွေ မရှိသေးကြောင်း နိုင်ငံတကာ အသိုင်းအဝိုင်းက ဝေဖန်ပြစ်တင်နေပါတယ်။ အာဆီယံအထွေထွေအတွင်းရေးမှူးချုပ် Dr. Kao Kim Hourn ဟာ ဇန်နဝါရီ ၂၈ ရက်မှာ မြန်မာနိုင်ငံဆိုင်ရာအာဆီယံဥက္ကဋ္ဌရဲ့အထူးကိုယ်စားလှယ် Alounkeo Kittikhoun နဲ့ တွေ့ဆုံဆွေးနွေးခဲ့ပြီး မြန်မာနိုင်ငံရေးအခြေအနေများကို အဓိကထားဆွေးနွေးခဲ့ကြောင်း သိရပါတယ်။

အာဆီယံအထွေထွေအတွင်းရေးမှူးချုပ်က မြန်မာနိုင်ငံရေးအခက်အခဲများကိုဖြေရှင်းနိုင်ဖို့ ရည်ရွယ်ချက်နဲ့ပြုလုပ်ထားတဲ့ အာဆီယံသဘာတူညီချက်ငါးချက်ကို အပြည့်အဝအကောင်အထည်ဖော်ဖို့အတွက် ၂ဝ၂၄ ခုနှစ်မှာ အာဆီယံအလှည့်ကျဥက္ကဋ္ဌအဖြစ်တာဝန်ယူမယ့် လာအိုနိုင်ငံကို ကူညီထောက်ပံ့ပေးသွားမှာဖြစ်ကြောင်း ပြောပါတယ်။ 

ဒါ့အပြင် အာဆီယံသဘောတူညီချက်ငါးချက်ထဲမှာ ပါဝင်နေတဲ့ မြန်မာနိုင်ငံကို လူသားချင်းဆိုင်ရာစာနာမှုအကူအညီပေးရေးနဲ့ပတ်သက်ပြီးလည်း ဆွေးနွေးခဲ့ကြောင်း သိရပါတယ်။ လာအိုနိုင်ငံက အာဆီယံအလှည့်ကျဥက္ကဋ္ဌ တာဝန်ယူပြီးနောက် အာဆီယံဥက္ကဋ္ဌရဲ့အထူးကိုယ်စားလှယ်ဟာ ဇန်နဝါရီလအစောပိုင်းက မြန်မာနိုင်ငံကိုလာရောက်ကာ နစကအဖွဲ့ တာဝန်ရှိသူတွေနဲ့တွေ့ဆုံဆွေးနွေးခဲ့ကြောင်း သိရပါတယ်။