ကျော်(NSS) - ဒီဇင်ဘာ ၂၂

DKBA အနေဖြင့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)စာချုပ်ပါ စည်းမျဥ်းစည်း ကမ်းများအတိုင်း ဆက်လက်လုပ်ဆောင်သွားမည်ဖြစ်ကြောင်း DKBA စစ်ဦးစီးချုပ် ဗိုလ်ချုပ်ကြီးစောစတီးကပြောသည်။

ကရင်ပြည်နယ်၊ မြဝတီမြို့နယ်၊ ဆုံဆည်းမြိုင်ကျေးရွာ၌ ယမန်နေ့ (ဒီဇင်ဘာလ ၂၁ ရက်)၊ နံနက်ပိုင်းကကျင်းပခဲ့သည့် (၂၉)နှစ်မြောက် ဒီမိုကရေစီအကျိုးပြုကရင့်တပ်မ တော်(DKBA)နေ့ အခမ်းအနားတွင် အထက်ပါကဲ့သို့ပြောကြားခဲ့ခြင်းဖြစ်သည်။

DKBA သည် ကြားနေမူဝါဒအားကျင့်သုံးသည့် အဖွဲ့အစည်းဖြစ်ပြီး NCA လက်မှတ်ရေးထိုးထားသည့် အဖွဲ့အစည်းဖြစ်၍ NCA စာချုပ်ပါစည်းမျဥ်း၊စည်း ကမ်းများအတိုင်း လုပ်ဆောင်လျက်ရှိသည်ဟု ၎င်းကပြောသည်။

"ကျွန်တော်တို့စောင့်ဆိုင်းနေတဲ့ ငြိမ်းချမ်းရေးဖြစ်စဥ်ကိုပြန်သုံးသပ်ကြည့်ရင် လွယ်လွယ်ကူကူဖြစ်လာတာမဟုတ်ပါဘူး။ အသက်တွေ၊ သွေးတွေ၊ ဘဝတွေ အများကြီးပေးဆပ်ပြီးတော့မှရလာတာပါ"ဟု ဗိုလ်ချုပ်ကြီးစောစတီးကပြောသည်။

ထိုသို့ အရင်းအနှီးကြီးမားစွာပေးဆပ်ရရှိလာသည့် ငြိမ်း ချမ်းရေးအား စိတ်ရှည်သည်းခံကာ မတူညီသည်များကိုတူညီရန် ပေါင်းစပ်ညှိနှိုင်းဆောင်ရွက်သွားရမည်ဖြစ်ပြီး လက်ရှိအခြေအနေအား ဆက်လက်ထိန်းသိမ်းရေးအတွက် ခိုင်မြဲအောင်လုပ်ဆောင်သွားရမည်ဟု ၎င်းကပြောသည်။

"အခုအချိန်မှာ ကျွန်တော်တို့နဲ့အတူ ကရင်လက်နက် ကိုင် အဖွဲ့အစည်းတွေဟာ လူမျိုးချင်းတူညီတဲ့အပေါ်မှာ မတူတာတွေကို အတူတကွတွဲလုပ်ရမှာဖြစ်သလို မတူတာတွေကိုလည်း ညှိနှိုင်းဆောင်ရွက်သွားရပါမယ်"ဟု ဗိုလ်ချုပ်ကြီးစောစတီးကပြောသည်။

ထို့ပြင် ရှေ့ဆက်လက်၍ ဒေသအတွင်းနေထိုင်သူများအဆင်ပြေကာ လူနေမှုဘဝအဆင့်မြင့်မားရေး၊ပညာ ရေး၊ ကျန်းမာရေးနှင့်ဒေသဖွံဖြိုးရေးတို့ကို တစ်စိုက်မတ်မတ်ဆောင်ရွာသွားမည်ဖြစ်ပြီး ဒေသတွင်း တည် ငြိမ်အေးချမ်းရေးနှင့်လုံခြုံရေးကိုလည်း ကျရာအခန်းကဏ္ဏမှ ပြည်သူများနှင့်အတူ လက်တွဲလုပ်ဆောင်သွားမည်ဟု ပြောသည်။

DKBA သည် ၂၀၁၅ ခုနှစ်က တစ်နိုင်ငံလုံးပစ်ခတ်တိုက် ခိုက်မှုရပ်စဲရေးသဘောတူစာချုပ် (NCA)အား လက်မှတ်ရေးထိုးခဲ့ပြီးနောက် နစကမှပြုလုပ်လျက်ရှိသည့် ငြိမ်း ချမ်းရေးဆွေးနွေးပွဲများအား နယ်မြေတည်ငြိမ်အေးချမ်းစေရေးအတွက် ဝင်ရောက်ဆွေးနွေးမှုများပြုလုပ်လျက်ရှိသည့် အဖွဲ့အစည်းတစ်ခုလည်းဖြစ်သည်။