ဂျန်ဇက် (NSS) - အောက်တိုဘာ ၂၆

ကုလသမဂ္ဂအဖွဲ့၏ လူသားချင်းဆိုင်ရာစာနာမှုအကူညီပေးရေးအဖွဲ့အကြီးအကဲဖြစ်သူ မာတစ် ဂရစ်ဖစ်ချ်က ကမ္ဘာကြီးသည် ဂါဇာဒေသခံများကို ကာကွယ်ပေးရန် နှင့် လူသာချင်းဆိုင်ရာစာနာမှုအကူအညီများ ပေးနိုင်ရန် လုပ်ဆောင်ရမည့်တာဝန်များကို ပျက်ကွက်နေကြောင်း ဝေဖန်ပြောဆိုလိုက်သည်။

နိုင်ငံတကာအစိုးများနှင့် လူသားချင်းဆိုင်ရာစာနာမှုအကူအညီပေးရေးအဖွဲ့၏ အကူအညီပေးမှုပစ္စည်းများသည် ဂါဇာဒေသကို ရောက်ရှိမှုနည်းပါးနေကြောင်း ပြောသည်။

အစ္စရေး နှင့် ဟားမက်စ်လက်နက်ကိုင်အဖွဲ့ကြားဖြစ်ပွားနေသည့် စစ်ပွဲ ၂၁ ရက်တာ ကာလအတွင်း အစ္စရေး နိုင်ငံသား ၁၄ဝဝ ကျော်သေဆုံးထားကာ ပါလက်စတိုင်းလူမျိုး အနည်းဆုံး ၇ဝဝဝ သေဆုံးထားကြောင်း သိရသည်။ အစ္စရေးတပ်ဖွဲ့များသည် ဂါဇာကမ်းမြောင်ဒေသရှိ မြို့လယ်ခေါင်ရှိပစ်မှတ်များကို စီနင်းတိုက်ခိုက်ခဲ့ပြီး ဟားမက်စ် အဖွဲ့ထောက်လှမ်းရေးခေါင်းဆောင်ကို သုတ်သင်နိုင်ခဲ့ကြောင်း သတင်းထုတ်ပြန်ထားသည်။

ပါလက်စတိုင်းလက်နက်ကိုင်အဖွဲ့ဖြစ်သော ဟားမက်စ်အဖွဲ့က အစ္စရေးနှင့် အပစ်ခတ်ရပ်စဲရေးရယူနိုင်မှုမရှိဘူး ဆိုလျှင် ပြန်ပေးဆွဲထားသူများကို ပြန်လွတ်ပေးမည်မဟုတ်ကြောင်း ထုတ်ဖော်ပြောဆိုလိုက်သည်။ အစ္စရေး၏ အဆိုအရက ဟားမက်စ်အဖွဲ့သည် အောက်တိုဘာ ၇ ရက်က စတင်တိုက်ခိုက်ခဲ့ပြီးနောက် အစ္စရေးစစ်သားတွေ အပါအဝင် အနည်းဆုံးလူပေါင်း ၂၂၆ ဦး ဖမ်းဆီးခဲ့ကြောင်း ဆိုထားသည်။ နိုင်ငံတကာအဖွဲ့အစည်းများကလည်း ဖမ်းဆီးထားသူများကို အမြန်ဆုံးပြန်လွှတ်ပေးရန် တောင်းဆိုနေကြောင်း သိရသည်။ 

အစ္စရေးအစိုးရက ရုရှားနိုင်ငံအနေဖြင့် ဟားမက်စ်လက်နက်ကိုင်အဖွဲ့ ကိုယ်စားလှယ်များကို နှင်ထုတ်သင့်ကြောင်း တိုက်တွန်းတောင်းဆိုလိုက်သည်။ ရုရှားသည် အောက်တိုဘာ ၇ ရက်က ဖမ်းဆီးခံထားရသော ပြန်ပေးဆွဲခံရသူများ ကို ပြန်လွှတ်ပေးရန်အတွက် ကြားဝင်စေ့စပ်လျက်ရှိနေကြောင်း သိရသည်။

အစ္စရေးနိုင်ငံခြားရေးဝန်ကြီးဌာန ပြောရေးဆိုခွင့်ရှိသူက "ဟားမက်စ်အဖွဲ့ကို ဖိတ်ခေါ်ခဲ့တဲ့ ရုရှားအစိုးရရဲ့လုပ်ရပ်ကို ပြစ်တင်ရှုတ်ချပါတယ်။ ရုရှားအစိုးရဟာ ဟားမက်စ်အဖွဲ့ရဲ့အကြမ်းဖက်လုပ်ရပ်တွေကို တရားဝင်ထောက်ခံနေတာ မျိုးဖြစ်တယ်။ ဒါကြောင့် ရုရှားအစိုးရဟာ ဟားမက်စ်အဖွဲ့ကိုယ်စားလှယ်တွေကိုချက်ချင်း နှင်ထုတ်သင့်တယ်" ဟု ပြောသည်။

ဟားမက်စ်လက်နက်ကိုင်အဖွဲ့က ဖမ်းဆီးထားသူများထဲတွင် ထိုင်းနိုင်ငံသား ၅၄ ဦး ပါဝင်နေသည်ဆိုသောသတင်းများ မှန်ကန်မှုမရှိကြောင်း၊ ဟားမက်စ်အဖွဲ့ ဖမ်းဆီးခံရသူများထဲတွင် ထိုင်းနိုင်ငံသား ၁၈ ဦးသာ ပါဝင်ကြောင်း ထိုင်းဝန်ကြီးချုပ်ဆာရက်သာတာဗီဆင်က ထုတ်ဖော်ပြောဆိုလိုက်သည်။

ဟားမက်စ် နှင့် အစ္စရေးနိုင်ငံကြားဖြစ်ပွားနေသည့် စစ်ပွဲများကြောင့် ထိုင်းနိုင်ငံသား ၃၃ ဦးသေဆုံးကာ ၁၈ ဦး ဒဏ်ရာရထားကြောင်း ထိုင်းအစိုးရအဖွဲ့က ပြောသည်။