သန့်ဇင်(NSS) - အောက်တိုဘာ ၂၅

ကျိုက်မရောမြို့နယ်တွင် ငွေကျပ်သိန်း(၃၀၀)ကျော်တန်ဖိုးရှိ စိတ်ကြွရူးသွပ်ဆေးပြားများနှင့်အတူ လက်နက်/ခဲယမ်းများ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က ယမန်နေ့ (အောက် တိုဘာလ ၂၄ ရက်)၊ ညနေ ၄နာရီခွဲအချိန်တွင် ကျိုက်မရောမြို့ နယ်၊ ခရုံကျေးရွာအနီးတွင် ဖမ်းဆီးရမိခဲ့ခြင်းဖြစ်ကြောင်း သိရသည်။

အဆိုပါကျေးရွာအနီးတွင် ထွန်းထွန်းဦး(ခ)ငကြောင်(၃၆)နှစ်အား မသင်္ကာသဖြင့် စစ်ဆေးရှာဖွေခဲ့ရာ ၎င်းထံမှ ငွေကျပ် (၄)သိန်းခွဲတန်ဖိုးရှိ စိတ်ကြွရူးသွပ်ဆေးပြား ၁၅၀ ပြားကို တွေ့ရှိသိမ်းဆည်း ရမိခဲ့ကြောင်း သိရသည်။

ထို့ပြင် ကွင်းဆက်ဖော်ထုတ်ချက်အရ ညနေ ၅နာရီ ၁၅မိနစ်အချိန်တွင် ခရုံကျေးရွာရှိ ၎င်း၏နေအိမ်အတွင်းမှ ငွေကျပ်သိန်း(၃၀၀) တန်ဖိုးရှိ စိတ်ကြွရူးသွပ်ဆေးပြား ၁၀၀၀၀ ပြားအပြင် ပစ္စတိုသေ နတ်တစ်လက်၊ ကျည်တောင့် (၃)တောင့်၊ ကျည်အိမ်တစ်ခု၊ ပွိုင့်-၂၂ လက်လုပ်သေနတ်တစ်လက်နှင့် လက်ကိုင်ဖုန်းတစ်လုံးတို့ ထပ်မံသိမ်းဆည်းရမိခဲ့ကြောင်း သိရသည်။

ထို့နောက် ဆက်လက်ဖော်ထုတ်ချက်အရ ညနေ ၆ နာရီအချိန်တွင် ခရုံကျေးရွာရှိ အောင်အောင်(ခ)ကမ္ဘာကျော်(၃၃)နှစ်၏ နေအိမ်သို့ ဝင်ရောက်ရှာဖွေခဲ့ရာ ငွေကျပ်(၂၂ ဒသမ ၂)သိန်း တန်ဖိုးရှိ စိတ်ကြွရူးသွပ်ဆေးပြား ၇၄၀ အပြင် HIJET အမျိုးအစားကားတစ်စီးနှင့် လက်ကိုင်ဖုန်းတစ်လုံးတို့ ထပ်မံသိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၂)ဦးအား ကျိုက်မရောမြို့မရဲစခန်းမှ မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့်အရေးယူထားပြီး ကွင်းဆက်များအား ဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။