ဂါဇာကမ်းမြောင်ဒေသကို အစ္စရေး၏ဗုံးကြဲတိုက်ခိုက်မှုများကြောင့် နေ့စဉ်ကလေးငယ်(၄၀၀)ကျော် သေဆုံး/ဒဏ်ရာရရှိနေဟု UNICEF အဖွဲ့ပြော
Pika (NSS) - အောက်တိုဘာ ၂၅
ဂါဇာကမ်းမြောင်ဒေသကို အစ္စရေး၏ လေကြောင်းမှတိုက်ခိုက်မှုများကြောင့် နေ့စဉ်ကလေးငယ်(၄၀၀)ကျော် သေဆုံး/ ဒဏ်ရာရနေကြောင်း UNICEF အဖွဲ့က ထုတ်ပြန်ပြောကြားခဲ့သည်။
အစ္စရေး-ဟားမက်စစ်ပွဲဖြစ်ပွားပြီးနောက်ပိုင်းကတည်းက ဂါဇာကမ်းမြောင်ဒေသကို အစ္စရေး၏ ဗုံးကြဲတိုက်ခိုက်မှုများကြောင့် အနည်းဆုံးကလေးငယ်(၂၃၆၀)ဦးသေဆုံးခဲ့ပြီး အခြားကလေးငယ်(၅၃၆၄)ဦး ထိခိုက်ဒဏ်ရာရရှိခဲ့ကြောင်း UNICEF အဖွဲ့၏အဆိုအရ သိရသည်။ အစ္စရေး-ဟားမက်စစ်ပွဲဖြစ်ပွားမှု (၁၈)ရက်တာကာလအတွင်း အစ္စရေးနှင့်ဂါဇာကမ်းမြောင်ဒေသရှိ လူအသေအပျောက်များ သည် ၂၀၀၆ ခုနှစ်နောက်ပိုင်း လူအသေအပျောက်အများဆုံးဖြစ်ခဲ့ကြောင်း ကုလသမဂ္ဂက ပြောကြားခဲ့သည်။
ဟားမက်စ်လက်နက်ကိုင်အဖွဲ့သည် အောက်တိုဘာလ(၇)ရက်တွင် အစ္စရေးနိုင်ငံတောင်ပိုင်းကို စတင်တိုက်ခိုက်ခဲ့ခြင်းဖြစ်ပြီး လက်ရှိအချိန်အထိ အစ္စရေးဘက်မှ အနည်းဆုံးလူ(၁၄၀၀)ကျော်သေဆုံးခဲ့ကြောင်းသိရသည်။ ဟားမက်စ်လက်နက် ကိုင်အဖွဲ့သည် လူပေါင်း(၂၀၀)ကျော်ကို ဓါးစာခံများအဖြစ် ဖမ်းဆီးခေါ်ဆောင် သွားခဲ့ကြောင်းလည်း သိရသည်။ အစ္စရေးသည် ဟားမက်လက်နက်ကိုင်အဖွဲ့ကို အပြီးသတ် သုတ်သင်ရှင်းလင်းရန်အတွက် ဂါဇာကမ်းမြောင်ဒေသကို ဖျက်ဆီးပစ်မည်ဟု ကတိပြုခဲ့သော်လည်း အစ္စရေး၏ ဆက်လက်ဗုံးကြဲတိုက်ခိုက်မှုများသည် ဂါဇာကမ်းမြောင်ဒေသတွင် လူသားချင်းစာနာထောက်ထားမှုဆိုင်ရာ အကျပ်အ တည်းများကို ပိုမိုဆိုးဝါးလာစေကြောင်း နိုင်ငံတကာ လူ့အခွင့်အရေးအဖွဲ့များက သတိပေးပြောဆိုခဲ့သည်။
ဂါဇာကမ်းမြောင်ဒေသရှိ ကလေးများအားလုံးနီးပါးသည် အိုးမဲ့အိမ်မဲ့ဖြစ်ရခြင်း၊အစားအစာ၊ ရေနှင့်ဆေးဝါးတို့ ပြတ်လပ်ခြင်းတို့နှင့်အတူ စစ်ပွဲဒဏ်များကြောင့် စိတ်ဒဏ်ရာများရရှိနေကြောင်း UNICEF အဖွဲ့က ပြောကြားခဲ့သည်။ UNICEF ၏ အရှေ့အလယ်ပိုင်းနှင့် မြောက်အာဖရိက ဒေသဆိုင်ရာဒါရိုက်တာ Adele Khodr က "ကလေးငယ်တွေကို သတ်ဖြတ်တာတွေ၊ ပြန်ပေးဆွဲတာတွေ၊ ဆေးရုံနဲ့ကျောင်းတွေကို တိုက်ခိုက်တာတွေနဲ့ လူသားချင်းစာနာထောက်ထားမှုဆိုင်ရာ အကူအညီတွေ ဝင်ရောက်ခွင့်ကို ပိတ်ပင်တာဟာ ကလေးသူငယ်တွေရဲ့ အခွင့် အရေးကို ချိုးဖောက်နေတာပဲဖြစ်ပါတယ်။ လမစေ့ပဲမွေးတဲ့ ကလေးတွေထားတဲ့ အနွေးသေတ္တာတွေ ပျက်စီးတာ၊ ဆေးရုံတွေ မီးပြတ်သွားတာ၊ ကလေးသူငယ်တွေ သန့်ရှင်းတဲ့ရေတွေကို မသောက်သုံးရတာတွေနဲ့ ဖျားနာနေတဲ့အချိန်မှာ ဆေးဘက်ဆိုင်ရာအကူအညီတွေမရရှိဖူးဆိုရင် ကလေးသူငယ်တွေ သေဆုံးမှုဟာ ပိုမိုတိုးမြင့်လာပါလိမ့်မယ်"ဟု သတိပေးပြောဆိုခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
အမေရိကန်ဒေါ်လာကို လက်နက်တစ်ခုအဖြစ် အမေရိကန်အစိုးရက အလွန်အကျွံအသုံးပြုနေကြောင်း အီလွန်မတ်ဝေဖန်
RELATED POSTS
24 Sep 2024 | မှုခင်း,ပြည်တွင်း
24 Sep 2024 | မှုခင်း,နိုင်ငံတကာ
24 Sep 2024 | မှုခင်း,ပြည်တွင်း
24 Sep 2024 | မှုခင်း,ပြည်တွင်း