Pika (NSS) - အောက်တိုဘာ ၂၅

အမေရိကန်နိုင်ငံသည် ပိတ်ဆို့အရေးယူမှုများနှင့်အတူ အမေရိကန်ဒေါ်လာကို လက်နက်အဖြစ် အသုံးပြုခဲ့ခြင်းသည် ကမ္ဘာတစ်ဝှမ်းရှိ နိုင်ငံများကို အရောင်းအ ဝယ်လုပ်ငန်းများတွင်  အမေရိကန်ဒေါ်လာအသုံးပြုခြင်းအား လျှော့ချရန် တွန်းအားပေးသလို ဖြစ်စေခဲ့ကြောင်း ကမ္ဘာကျော်ဘီလျံနာ အီလွန်မတ်က သတိပေးပြောဆိုခဲ့သည်။

အီလွန်မတ်က "လက်ရှိအချိန်မှာ နိုင်ငံအတော်များများဟာ သူတို့ရဲ့အရောင်း အဝယ်လုပ်ငန်းတွေမှာ အမေရိကန်ဒေါ်လာအသုံးပြုမှု လျှော့ချလာတာကို ကျွန်တော်တို့ တွေ့မြင်ခဲ့ရပါတယ်။ ဒီလိုဖြစ်အောင် ကျွန်တော်တို့က တွန်းအားပေးခဲ့မိတာလို့ ထင်ပါတယ်။ ဒီလုပ်ငန်းစဉ်ဟာ ရုရှား၊ တရုတ်နဲ့ အီရန်တို့ လုပ် ဆောင်နေတာထက်တောင် ကျော်လွန်သွားပြီလို့ထင်ပါတယ်။"ဟု ပြောဆိုခဲ့သည်။

ထို့ပြင် အီလွန်မတ်သည် BRICS အဖွဲ့ဝင်နိုင်ငံများကြား ကုန်သွယ်မှုများတွင် နိုင်ငံသုံးငွေကြေးများ အသုံးပြုလာခြင်းကို ထောက်ပြပြောဆိုခဲ့ကြောင်းသိရသည်။ အဆိုပါဆုံးဖြတ်ချက်ကို BRICS အဖွဲ့ဝင်နိုင်ငံများက ရွေးချယ်ခဲ့ခြင်းမျိုးမဟုတ်သော်လည်း ယူကရိန်းစစ်ပွဲနှင့်ပတ်သက်ပြီး ရုရှားအပေါ် အနောက်အုပ်စုနိုင်ငံများက ပိတ်ဆို့အရေးယူမှုများ ချမှတ်ခဲ့ခြင်းသည် အမေရိကန်ဒေါ်လာအသုံး ပြုမှုအား လျှော့ချရန် BRICS အဖွဲ့ဝင်နိုင်ငံများကို တွန်းအားပေးသလို ဖြစ်စေခဲ့ကြောင်း အီလွန်မတ်ကပြောဆိုခဲ့သည်။

အီလွန်မတ်က "ဘရာဇီးဒါမှမဟုတ် အိန္ဒိယလိုနိုင်ငံတွေဟာ ရုရှားနဲ့ ကုန်သွယ်မှုတွေကို လုပ်ချင်နေတုန်းပါပဲ။ ဒါပေမယ့် အဲဒီနိုင်ငံတွေဟာ ကုန်သွယ်မှုတွေမှာ အမေရိကန်ဒေါ်လာကို အသုံးမပြုချင်ကြပါဘူး။ ပြီးတော့ ကုန်သွယ်မှုတွေမှာ အမေရိကန်ဒေါ်လာအသုံးပြုမှုကို လျှော့ချဖို့ ကျွန်တော်တို့က တွန်းအားပေးမိသလိုဖြစ်ခဲ့တာပါ။ ဒါကြောင့် ကမ္ဘာကြီးမှာ အမေရိကန်ဒေါ်လာရဲ့ ရပ်တည်မှုက ပိုပြီးအားနည်းလာတာပါ။"ဟုပြောဆိုခဲ့သည်။

အနောက်အုပ်စုနိုင်ငံများက ရုရှားအပေါ် ပိတ်ဆို့အရေးယူမှုများ ချမှတ်ခဲ့ပြီးနောက် အမေရိကန်ဒေါ်လာကို လက်နက်အဖြစ် အသုံးပြုခဲ့ခြင်းသည် အခြားရွေးချယ်စရာများကို ရှာဖွေရန်အတွက် နိုင်ငံအများအပြားကို တွန်းအားပေးသလိုဖြစ်စေခဲ့ကြောင်း အီလွန်မတ်ကပြောဆိုခဲ့သည်။