Pika (NSS) - စက်တင်ဘာ ၂၂ 

စက်တင်ဘာလ(၂၀)ရက်က မြောက်ကိုရီးယားဘက်က ပေးပို့ခဲ့တဲ့ အမှိုက်တွေနဲ့ဖြည့်ထားတဲ့မိုးပျံပူဖောင်းတွေ ဟာ တောင်ကိုရီးယားအစိုးရအဆောက်အဦးတွေအထိကို ရောက်ရှိလာခဲ့တယ်လို့ တောင်ကိုရီးယားအာဏာပိုင်တွေက အတည်ပြုခဲ့ပါတယ်။ 

အဲဒီမိုးပျံပူဖောင်းကို တောင်ကိုရီးယားအစိုးရအဆောက်အဦးရဲ့ပင်မဝင်ပေါက်အနီးမှာ တွေ့ရှိခဲ့တာဖြစ်တယ်လို့ လည်း သိရပါတယ်။ အဲဒီဖြစ်ရပ်ကြောင့် တောင်ကိုရီးယားအာဏာပိုင်တွေဟာ အရေးပေါ်တုံ့ပြန်မှုတွေကို လုပ်ဆောင်ခဲ့ရပြီး အဲဒီဧရိယာကို မီးသတ်သမားတွေ၊ ရဲတပ်ဖွဲ့တွေနဲ့ ဝန်းရံထားခဲ့ရတယ်လို့လည်း သိရပါတယ်။

အဲဒီမိုးပျံပူဖောင်းတွေမှာ တောင်ကိုရီးယားစစ်တပ်က စစ်ဆေးခဲ့ပြီး အန္တရာယ်ဖြစ်စေမယ့်ပစ္စည်းတွေကို အခင်းဖြစ်ပွားရာနေရာကနေ ဖယ်ရှားပစ်ခဲ့တယ်လို့လည်း သိရပါတယ်။ မိုးပျံပူဖောင်းမှာ မြောက်ကိုရီးယားနိုင်ငံ ပြုံးယမ်းမြို့က လိပ်စာတစ်ခုပါရှိတဲ့ အစိမ်းရောင်ပလတ်စတစ်အပိုင်းအစတွေ အပါအဝင် အိမ်သုံးအမှိုက်မျိုးစုံကို တွေ့ရှိခဲ့ရတယ်လို့ တောင်ကိုရီးယားသတင်းအေဂျင်စီ Yonhap က ရေးသားဖော်ပြခဲ့ပါတယ်။

တောင်ကိုရီးယားအစိုးရက နှစ်နိုင်ငံနယ်စပ်အနီးမှာ အသံချဲ့စက်တွေအသုံးပြုပြီး မြောက်ကိုရီးယားဆန့်ကျင်ရေး ဝါဒဖြန့်ထုတ်လွှင့်မှုတွေ လုပ်ဆောင်နေတာကို လက်တုံ့ပြန်တဲ့အနေဲ့ မြောက်ကိုရီးယားအစိုးရဟာ လူ့အညစ် အကြေးတွေနဲ့ အမှိုက်တွေဖြည့်ထားတဲ့ မိုးပျံပူဖောင်းတွေကို အကြိမ်ကြိမ်ပေးပို့ခဲ့တယ်လို့လည်း သိရပါတယ်။ ဒါ့ပြင် မြောက်ကိုရီးယားနိုင်ငံက ပေးပို့ခဲ့တဲ့ မိုးပျံပူဖောင်းတွေမှာ လူ့အညစ်အကြေးကနေ စတင်တယ်လို့ ယူဆရတဲ့ ကပ်ပါးကောင်တွေကိုလည်း တွေ့ရှိခဲ့တယ်လို့ တောင်ကိုရီးယားအစိုးရတာဝန်ရှိသူတွေက ပြောကြားခဲ့ပါတယ်။