Pika (NSS) - စက်တင်ဘာ ၂၂ 

စက်တင်ဘာလ(၂၁)ရက်နှောင်းပိုင်းမှာ အစ္စရေးရဲ့ဒါဇင်နဲ့ချီတဲ့စစ်လေယာဉ်တွေဟာ လက်ဘနွန်နိုင်ငံ တောင်ပိုင်း မှာရှိတဲ့ ဟစ်ဘိုလာလက်နက်ကိုင်အဖွဲ့ရဲ့ပစ်မှတ်တွေကို ဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့ သိရပါတယ်။ 

လက်ဘနွန်နိုင်ငံ ဘေရွတ်မြို့ကို အစ္စရေးရဲ့ဗုံးကြဲတိုက်ခိုက်မှုတွေကြောင့် ဟစ်ဘိုလာလက်နက်ကိုင်အဖွဲ့ရဲ့ အကြီးတန်းအရာရှိတွေ အပါအဝင် အနည်းဆုံးလူ(၃၇)ဦး သေဆုံးခဲ့ပြီးနောက် တစ်ရက်အကြာမှာ အစ္စရေးက ယခုလိုတိုက်ခိုက်မှုတွေကို ထပ်မံလုပ်ဆောင်ခဲ့တာဖြစ်တယ်လို့လည်း သိရပါတယ်။

အစ္စရေးစစ်တပ်ပြောရေးဆိုခွင့်ရှိသူ ဒန်နီယယ်ဟာဂါရီက "အစ္စရေးရဲ့စစ်လေယာဉ်ဒါဇင်ပေါင်းများစွာဟာ လက်ဘနွန်နိုင်ငံတောင်ပိုင်းမှာရှိတဲ့ ဟစ်ဘိုလာလက်နက်ကိုင်အဖွဲ့ရဲ့ပစ်မှတ်တွေကို ဗုံးကြဲတိုက်ခိုက်မှုတွေ လုပ်ဆောင်ခဲ့ပြီး အစ္စရေးနိုင်ငံသားတွေအပေါ် ခြိမ်းခြောက်မှုတွေကို ချေမှုန်းဖို့ လုပ်ဆောင်ခဲ့ပါတယ်" လို့ ပြောခဲ့ပါတယ်။

ပြီးခဲ့တဲ့နှစ် အောက်တိုဘာလ(၇)ရက်မှာ အစ္စရေး-ဟားမက်စစ်ပွဲစတင်ဖြစ်ပွားခဲ့ပြီးနောက်ပိုင်းတည်းက   အီရန် ကျောထောက်နောက်ခံပြုဟစ်ဘိုလာလက်နက်ကိုင်အဖွဲ့နဲ့ အစ္စရေးတို့ဟာ ဒုံးကျည်တွေ၊ ဒရုန်းတွေနဲ့ နယ်စပ် ဖြတ်ကျော်တိုက်ခိုက်မှုတွေကို နေ့စဉ်နီးပါးလုပ်ဆောင်ခဲ့တာဖြစ်တယ်လို့လည်း သိရပါတယ်။

ဒါပေမယ့်လည်း အဲဒီနယ်စပ်ဖြတ်ကျော်တိုက်ခိုက်မှုတွေဟာ ပြီးခဲ့တဲ့၏ ဩဂုတ်လနှောင်းပိုင်းမှာ ပိုမိုအရှိန်မြင့်လာခဲ့ တယ်လို့လည်း သိရပါတယ်။ စက်တင်ဘာလ(၂၁)ရက်နှောင်းပိုင်းမှာ အစ္စရေးရဲ့စစ်လေယာဉ်တွေဟာ လက်ဘနွန် နိုင်ငံတောင်ပိုင်းကို ကြီးမားတဲ့လေကြောင်းတိုက်ခိုက်မှုတွေ လုပ်ဆောင်ခဲ့တယ်လို့ လက်ဘနွန်ရဲ့ တရားဝင် အမျိုးသားသတင်းအေဂျင်စီက ဖော်ပြခဲ့ပါတယ်။

ဒါ့ပြင် AFPTV သတင်းဌာနက တင်ထားတဲ့ ရုပ်သံဗီဒီယိုဖိုင်မှာ အစ္စရေးရဲ့ဗုံးကြဲတိုက်ခိုက်မှုအတွင်း သေဆုံးသွားခဲ့တဲ့ ဟစ်ဘိုလာလက်နက်ကိုင်အဖွဲ့ဝင်သုံးဦးရဲ့ ဈာပနအခမ်းအနားအတွက် ဝမ်းနည်းပူဆွေးသူတွေဟာ ဘေရွတ်မြို့မှာ စုဝေးနေတာကိုလည်း တွေ့မြင်ခဲ့ရပါတယ်။ အသက်(၃၅)နှစ်အရွယ် အမျိုးသမီးတစ်ဦးက "စစ်ပွဲက စတင်နေပြီလို့ ကျွန်မ ထင်ပါတယ်" လို့ ပြောဆိုခဲ့ပါတယ်။