ဂျန်ဇက် (NSS) - အောက်တိုဘာ ၂၃ 

အစ္စရေးဝန်ကြီးချုပ်က ဟစ်ဘိုလာအဖွဲ့တွေဟာ သတိပေးထားရက်ကြားကနေ ဟားမက်စ်နဲ့ အစ္စရေးစစ်ပွဲမှာ ပါဝင်လာမယ်ဆိုရင်တော့ မျှော်လင့်မထားတဲ့ကြီးမားတဲ့ပျက်စီးထိခိုက်မှုတွေ ရင်ဆိုင်ရဖွယ်ရှိနေကြောင်း ခြိမ်းခြောက်ပြောဆိုလိုက်ပါတယ်။

ဝန်ကြီးချုပ်နေတန်ရာဟုကအစ္စရေးနဲ့ ဟားမက်စ်တို့ စစ်ပွဲထဲကို ဟစ်ဘိုလာအဖွဲ့ တိုက်ရိုက်ပါဝင်လာမယ်ဆိုရင် ဘဝအတွက် ကြီးမားတဲ့အမှားမျိုးကို လုပ်ဆောင်လိုက်ခြင်းမျိုးဖြစ်လာနိုင်ဖွယ်ရှိနေပြီး ကြီးမားတဲ့ ဘေးဒုက္ခတွေနဲ့ ရင်ဆိုင်ရဖွယ်ရှိနေကြောင်း သတိပေးထားပါတယ်။ 

ဝန်ကြီးချုပ်နေတန်ရာဟုက "ဟစ်ဘိုလာအုပ်စုတွေဟာ စစ်ပွဲကို ပါဝင်ဖို့ ဆုံးဖြတ်ထားတယ်ဆိုရင်တော့ လက်ဘနွန်ရဲ့ဒုတိယမြောက်စစ်ပွဲဟာ အချိန်ပိုကြာဖွယ်ရှိနေပါတယ်" လို့ပြောပါတယ်။ 

အစ္စရေးနဲ့ ဟစ်ဘိုလာအဖွဲ့တွေဟာ ၂ဝဝ၆ ခုနှစ်တုန်းက ပထမမြောက် လက်ဘနွန်စစ်ပွဲဖြစ်ခဲ့ဖူးပြီး အဲဒီအချိန် တုန်းက အစ္စရေးတပ်ဖွဲ့တွေဟာ လက်ဘနွန်တောင်ပိုင်းကို ကျူးကျော်တိုက်ခိုက်ခဲ့သလို မြို့တော်ဘေရွတ်ကို လည်း ဗုံးကြဲတိုက်ခိုက်ခဲ့ကြောင်း သိရပါတယ်။

ဟစ်ဘိုလာအဖွဲ့ဟာ ၂ဝဝ၆ ခုနှစ်တုန်းက အစ္စရေးနိုင်ငံကို ဝင်ရောက်စီးနင်းတိုက်ခိုက်ခဲ့ရာ အစ္စရေး နဲ့ ဟစ်ဘိုလာ ကြား စစ်ပွဲစတင်ခဲ့ပြီး အစ္စရေးနိုင်ငံသား ၁၆၅ ဦးသေဆုံးကာ လက်ဘနွန်နိုင်ငံသား ၁ဝဝဝ ကျော် သေဆုံးခဲ့ကာ စစ်ပွဲသက်တမ်းက အချိန်တစ်လကျော်ကြာမြင့်ခဲ့ကြောင်း သိရပါတယ်။

အစ္စရေးဝန်ကြီးချုပ်နေတန်ရာဟုက "စစ်ပွဲထဲ ပါဝင်လာမယ်ဆိုရင်တော့ ဟစ်ဘိုလာအုပ်စုတွေဟာ ကြီးမားတဲ့ အမှားတွေ ထပ်မံလုပ်ဆောင်ခဲ့တာမျိုးဖြစ်တယ်။ လက်ဘနွန်နိုင်ငံဟာ ဘေးဒုက္ခကြီးတွေနဲ့ ရင်ဆိုင်ရဖွယ်ရှိနေတယ်" လို့ ပြောပါတယ်။

အစ္စရေးနဲ့ ဟားမက်စ်တို့ စစ်ပွဲ စတင်ဖြစ်ပွားခဲ့ပြီးနောက်ပိုင်းကတည်းက ဟစ်ဘိုလာအုပ်စုတွေဟာ အစ္စရေးပိုင်နက်တွေကို ရော့ကတ်ဒုံးကျည်တွေနဲ့ ပစ်ခတ်တိုက်ခိုက်ခဲ့ကြောင်း သိရပါတယ်။ အစ္စရေးဟာ လက်ဘနွန်နဲ့ အစ္စရေး နိုင်ငံနယ်စပ်ဒေသ တစ်မိုင်ကျော်အတွင်းနေထိုင်နေတဲ့ဒေသခံတွေကို လက်ရှိအချိန်မှာ ဘေးလွှတ်ရာကို ရွှေ့ပြောင်းထားကြောင်း သိရပါတယ်။