ဂျန်ဇက် (NSS) - အောက်တိုဘာ ၁၈

ကုလသမဂ္ဂအဖွဲ့အတွင်းရေးမှူးချုပ် ဂူတာရက်စ်က ပါလက်စတိုင်းလက်နက်ကိုင်အဖွဲ့ဟားမက်စ်ရဲ့တိုက်ခိုက်မှု များနဲ့ပတ်သက်ပြီး ပါလက်စတိုင်းပြည်သူတွေအပေါ် စုပေါင်းအပြစ်ပေးခြင်းမျိုး မဖြစ်သင့်ကြောင်း၊ ဂါဇာဆေးရုံတိုက်ခိုက်ခံရမှုအပေါ် ပြစ်တင်ရှုတ်ချကြောင်း ထုတ်ဖော်ပြောဆိုလိုက်ပါတယ်။

အစ္စရေးစစ်ဘက်က ဂါဇာမြို့တောင်ပိုင်းကို ပြောင်းရွှေ့သွားတဲ့ပါလက်စတိုင်းလူမျိုးတွေကို လူသားချင်းဆိုင်ရာ စာနာမှုအကူအညီများပေးမှာဖြစ်တယ်လို့ ထုတ်ဖော်ပြောဆိုထားပေမယ့် အသေးစိတ်အခြေအနေကိုတော့ ထုတ်ဖော်ပြောဆိုခြင်းမျိုးမရှိကြောင်း သိရပါတယ်။ ပါလက်စတိုင်းလက်နက်ကိုင်အဖွဲ့ ဟားမက်စ်ဟာ အစ္စရေးကို စတင်တိုက်ခိုက်ခဲ့ပြီးနောက် အစ္စရေးဟာ ဟားမက်စ်အဖွဲ့ရှိနေတဲ့ ဂါဇာဒေသကို ဗုံးကြဲတိုက်ခိုက်ခဲ့ကြောင်း သိရပါတယ်။ 

အာဆီယံအဖွဲ့ဝင်နိုင်ငံ ၁ဝ နိုင်ငံဟာ အစ္စရေးနဲ့ ပါလက်စတိုင်းကြားဖြစ်ပွားနေတဲ့စစ်ပွဲနဲ့ပတ်သက်ပြီး အာဆီယံ အဖွဲ့ဝင်နိုင်ငံအားလုံး ပူးပေါင်းပါဝင်တဲ့ထုတ်ပြန်ချက်မျိုး မထုတ်နိုင်ဘဲ သီးခြားထုတ်ပြန်မှုမျိုးသာ ထုတ်ပြန်နိုင်ခဲ့ကြောင်း သိရပါတယ်။ အာဆီယံအဖွဲ့ဝင်နိုင်ငံများအနက် မွတ်စလင်များတဲ့ မလေးရှား၊ အင်ဒိုနီးရှား နဲ့ ဘရူးနိုင်းနိုင်ငံတို့ဟာ အစ္စရေးကို တရားဝင်အသိအမှတ်မပြုထားတဲ့နိုင်ငံတွေ မဟုတ်သလို အစ္စရေးနဲ့ သံတမန် ဆက်ဆံရေး တရားဝင်တည်ထောင်ထားခြင်းမျိုးမရှိကြောင်း သိရပါတယ်။ 

ဂါဇာကမ်းမြောင်ဒေသရှိ  Al-Ahli Baptist ဆေးရုံကို လေကြောင်းက ဗုံးကြဲတိုက်ခိုက်ခဲ့ခြင်းနဲ့ပတ်သက်ပြီး အစ္စရေးကို ကနေဒါ၊ တူရကီနိုင်ငံတို့အပါအဝင် ကမ္ဘာတဝန်းရှိ နိုင်ငံအများအပြား ပြစ်တင်ရှုတ်ချထားကြောင်း သိရပါတယ်။ အနည်းဆုံးလူပေါင်း ၅ဝဝ ကျော်သေဆုံးစေခဲ့တဲ့ ဆေးရုံကို ဗုံးကြဲတိုက်ခိုက်ခဲ့ခြင်းနဲ့ပတ်သက်ပြီး ကနေဒါ၊ တူရကီ၊ ယူအေအီး၊ အီရန်၊ ကာတာ၊ ဂျော်ဒန်၊ ပြင်သစ်နိုင်ငံတို့က အစ္စရေးကို ပြစ်တင်ရှုတ်ချခဲ့ကြောင်း သိရပါတယ်။ 

ဟားမက်စ်လက်နက်ကိုင်အဖွဲ့ခေါင်းဆောင်က ပါလက်စတိုင်းလူမျိုး ရာချီသေဆုံးစေခဲ့တဲ့ ဂါဇာဒေသရှိ ဆေးရုံ တိုက်ခိုက်ခံရမှုများအတွက် အမေရိကန်နိုင်ငံမှာ တာဝန်ရှိကြောင်း၊ အမေရိကန်နိုင်ငံဟာ အစ္စရေးကို ကျူးကျော် တိုက်ခိုက်မှုတွေလုပ်ဆောင်ဖို့ နောက်ကွယ်ကနေ မြှောက်ပေးခဲ့ကြောင်း ပြောပါတယ်။

ပါလက်စတိုင်းပြည်သူများအနေနဲ့ အပြင်ကိုထွက်ပြီး ကျူးကျော်သူများနဲ့ ထိပ်တိုက်တွေ့ဆုံမှုများလုပ်ဆောင်ရမှာ ဖြစ်ကြောင်း၊ ဒါ့အပြင် အာရပ်နိုင်ငံအားလုံးနဲ့ မွတ်စလင်နိုင်ငံအားလုံးဟာ အစ္စရေးရဲ့လုပ်ရပ်တွေအပေါ် ဆန့်ကျင် ဆန္ဒပြကြရမှာဖြစ်ကြောင်း ဟားမက်စ် အဖွဲ့ခေါင်းဆောင်တစ်ဦးဖြစ်တဲ့ Haniyeh က ပြောပါတယ်။