ဂျန်ဇက် (NSS) - အောက်တိုဘာ ၁၄

ဟစ်ဘိုလာ လက်နက်ကိုင်အဖွဲ့ခေါင်းဆောင်တစ်ဦးဖြစ်သူက သင့်တော်တဲ့အချိန်မှာ အစ္စရေးကို ဟားမက်စ်အဖွဲ့ နဲ့အတူ ပူးပေါင်းတိုက်ခိုက်ဖို့ အလုံးစုံပြင်ဆင်နေတယ်လို့ ပြောခဲ့ပါတယ်။

ဟစ်ဘိုလာလက်နက်ကိုင်အဖွဲ့ခေါင်းဆောင်က "ကျွန်တော်တို့တွေဟာ အစ္စရေးနဲ့ထိပ်တိုက်တွေ့ဆုံရေး လုပ်ဆောင်မှာပါ။ စစ်ပွဲမှာ ပါဝင်ရမယ့်အချိန်အခါမျိုးရောက်လာတယ်ဆိုရင်တော့ ပါဝင်တိုက်ခိုက်သွားမှာပါ။ လက်ရှိအချိန်မှာတော့ အပြည့်အဝ ပြင်ဆင်နေတယ်။ အခွင့်အရေးတွေ ရရှိမယ်ဆိုရင်တော့ စစ်ပွဲထဲကို တိုက်ရိုက် ပါဝင်လာမှာပါ" လို့ပြောပါတယ်။ 

အမေရိကန်အစိုးရဟာ ဟစ်ဘိုလာအဖွဲ့ကို ပါလက်စတိုင်းလက်နက်ကိုင်အဖွဲ့ ဟားမက်စ် နဲ့ အစ္စရေးကြားဖြစ်နေတဲ့ စစ်ပွဲကို မပါဝင်ဖို့ သတိပေးထားပေမယ့် အဲဒီတောင်းဆိုမှုတွေကို ဟစ်ဘိုလာအဖွဲ့က ငြင်းဆန်ပယ်ချထားပါတယ်။ ဟစ်ဘိုလာအဖွဲ့ လက်နက်ကိုင်ခေါင်းဆောင်တစ်ဦးဖြစ်တဲ့  Naim Qassem က "ကျွန်တော်တို့ကို အာရပ်နိုင်ငံတွေနဲ့ ကုလသမဂ္ဂကိုယ်စားလှယ်တွေကတော့ စစ်ပွဲမှာ မပါဝင်ဖို့ ပြောဆိုထားတယ်။ အဲဒီပြောချက်တွေက ကျွန်တော်တို့ အပေါ် သက်ရောက်မှာမဟုတ်ဘူး။ ဟစ်ဘိုလာအဖွဲ့ဟာ ကိုယ်တာဝန်ကိုယ်သိပါတယ်" လို့ ပြောပါတယ်။ 

အစ္စရေးဟာ ဟစ်ဘိုလာအဖွဲ့ကို အောက်တိုဘာ ၉ ရက်က  တိုက်ခိုက်ခဲ့ရာ ဟစ်ဘိုလာအဖွဲ့ဝင် ၃ ဦး သေဆုံးခဲ့ကြောင်း သိရပါတယ်။ အစ္စရေးနဲ့ ဟားမက်စ်အဖွဲ့ကြား စစ်ပွဲဖြစ်ပွားခဲ့ပြီးနောက် ရက်ပိုင်းအကြာမှာပဲ ဟစ်ဘိုလာ အဖွဲ့ဟာ အစ္စရေးကို ဒုံးကျည်တွေနဲ့ပစ်ခတ်တာတွေ လုပ်ခဲ့ဖူးပါတယ်။ ဟားမက်စ်အဖွဲ့ဟာ အောက်တိုဘာ ၇ ရက်မှာ အစ္စရေးနိုင်ငံကို စတင်တိုက်ခိုက်ခဲ့ပြီး အစ္စရေးစစ်သားတွေ အပါအဝင် လူပေါင်းရာချီကို ပြန်ပေးဆွဲခဲ့ ကြောင်း သိရပါတယ်။