ယွန်း (NSS) - ဖေဖော်ဝါရီလ၂ဝ 

လက်ရှိမြန်မာနိုင်ငံတွင် ပြည်တွင်းလက်နက်ကိုင်ပဋိပက္ခများ ပြင်းထန်စွာဖြစ်ပွားလာမှုနှင့်အတူ လမ်းပန်း ဆက်သွယ်ရေးများသည်လည်း အခက်အခဲ များစွာဖြင့် ရင်ဆိုင်ကြုံတွေ့နေရဆဲဖြစ်သည်။ အချို့ သောနေရာဒေသများတွင် ကုန်းလမ်းဖြင့် သွားလာ ၍မရတော့ဘဲ လေကြောင်းလိုင်းများကိုသာ အဓိက အားထား၍ သွားလာနေရလျက်ရှိပြီး ယင်းကဲ့သို့ အား ထားနေရမှုနှင့်အတူ လေယာဉ်လက်မှတ်ခဈေးနှုန်း များသည်လည်း အဆမတန်ကြီးမြင့်နေလျက်ရှိသည်။ ထို့ကြောင့် ယင်းကဲ့သို့ အခြေအနေများအပါအဝင် လေကြောင်းလိုင်းများ တွေ့ကြုံနေရသည့် အခက်အခဲအခြေအနေများနှင့် ပတ်သက်၍  NP News က MAI မှ တာဝန်ရှိသူတစ်ဦးအား ဆက် သွယ်မေးမြန်းထားမှုများကို ဖော်ပြလိုက်ပါသည်။

မေး - လေကြောင်းလိုင်းများအနေဖြင့် လက်ရှိ ကြုံတွေ့နေရသည့် အခက်အခဲများနှင့်ပတ်သက်ပြီး သိရှိလိုပါသည်။

ဖြေ - လက်ရှိကာလတွင် လေကြောင်းလိုင်းများသည် လေယာဉ်အပိုအစိတ်အပိုင်းများတင်သွင်းရာတွင် အခက်အခဲများကြုံတွေ့ရခြင်းနှင့် ငွေကြေးဖောင်း ပွမှု၏ အကျိုးသက်ရောက်ခြင်းများနှင့် အခြားသော ကန့်သတ်ချက်များကြောင့် အခက်အခဲများစွာကို ရင်ဆိုင်နေကြရပါသည်။ အပြည်ပြည်ဆိုင်ရာ မြန်မာလေ ကြောင်းလိုင်း (MAI) အနေဖြင့် လေယာဉ် လက်မှတ်ခနှုန်းထားများကို ပုံမှန်အခနှုန်းထားအတိုင်း ရောင်းချ ပေးလျက်ရှိသော်လည်း ပြင်ပဈေးကွက်တွင် ပွဲစားများက လေကြောင်းလိုင်း၏ ခရီးသည်အမည် ပြောင်းလဲ၍ လိုက်ပါစီးနင်းခွင့်ပြုသည့်မူဝါဒအပေါ် အခွင့်ကောင်းယူလျက် လေယာဉ်လက်မှတ်ခနှုန်း ထားများကို အဆမတန်တိုးမြှင့်ရောင်းချကာ အမြတ် ထုတ်လျက်ရှိသည်ကို တွေ့ရှိရပါသည်။ ယခုကဲ့သို့ အခက်အခဲများ ကြုံတွေ့နေရသည့်အချိန်တွင်ပင် MAI အနေဖြင့် ပြည်ပလေဆိပ်များ အထူးသဖြင့် ဘန်ကောက်လေဆိပ်များသို့ ဆင်းသက်ရာတွင် လေဆိပ်အခွန်အခအနေဖြင့် ခရီးသည်တစ်ဦးနှုန်း ကို အမေရိကန်ဒေါ်လာ ၅၀ ဝန်းကျင် ပေးသွင်းနေရ သော်လည်း မိမိတို့လေကြောင်းလိုင်း၏ အမြတ်အ စွန်းကို ပဓာနမထားဘဲ ခရီးသည်များ အထူးသဖြင့် မြန်မာနိုင်ငံသား ခရီးသည်များအတွက် သက်သာ သောနှုန်းထားဖြင့် ခရီးစဉ်များကို အဆင်ပြေလွယ် ကူစွာ လိုက်ပါစီးနင်းနိုင်ရေးကိုသာရှေးရှု၍ အမေရိ ကန်ဒေါ်လာ ၅၉ ဒေါ်လာမှစတင်သော နှုန်းထားဖြင့် သာ ရောင်းချပေးခြင်းများကိုပြုလုပ်ပေးလျက်ရှိပါ သည်။ 

မေး - လက်ရှိအချိန်တွင် လေကြောင်းလိုင်းများ မပျံ သန်းရသည့် လေဆိပ်များရှိလျှင်လည်း သိလိုပါသည်။

ဖြေ - လက်ရှိကာလတွင် ကလေး၊ ခန္တီး၊ လွိုင်ကော်၊ လားရှိုး အစရှိသည့်လေဆိပ်များသို့ လေကြောင်းခ ရီးစဉ် ပြေးဆွဲခွင့်များ ကန့်သတ်ထားပြီး အချို့ခရီး စဉ်များကို သက်ဆိုင်ရာလေကြောင်းအာဏာပိုင်များနှင့်ညှိ နှိုင်း၍ ခွင့်ပြုချက်ရလျှင် ပြန်လည်ပြေးဆွဲပေး နိုင်ရန် ကြိုးပမ်းလျက်ရှိပါသည်။ 

မေး - ပျံသန်းခွင့်ရရှိထားသည့် လေဆိပ်များကို ပျံသန်းချိန်တွင်လည်း လေကြောင်းလိုင်းများနှင့် ခရီး သည်များအတွက် လုံခြုံရေးပိုင်းဆိုင်ရာတွင် မည် သည့် အခက်အခဲများရှိကြောင်း သိလိုပါသည်။

ဖြေ - လက်ရှိပျံသန်းပြေးဆွဲပေးနေသည့် လေဆိပ် များတွင် လေကြောင်းအာဏာပိုင်များ၊ လေဆိပ်နှင့် လေကြောင်းလိုင်းဆိုင်ရာတာဝန်ရှိသူများမှ လုံခြုံရေး အစရှိသည့် ကိစ္စရပ်များကို အထူးကြပ်မတ် ဆောင် ရွက်လျက်ရှိပြီး ပြည်တွင်းခရီးသွားလာရာတွင် လေကြောင်းဖြင့်သွားလာခြင်းသည်သာလျှင် ယခုကာလ အတွက် လုံခြုံစိတ်ချရမှုအရှိဆုံးဖြစ်မည် ဖြစ်ပါသည်။ 

မေး - ထောက်ခံချက်တွေပါမှသာလျှင် လေယာဉ် စီးနင်းခွင့်တွေကို ပြုသွားမည်ဆိုသည့်အတွက် လေ ကြောင်းလိုင်းများအပေါ်တွင် မည်သို့အခက်အခဲများ ရှိလာနိုင်ပါသနည်း။ 

ဖြေ - လေကြောင်းဖြင့်ခရီးသွားလာလိုမှုများ မြင့်မားလာသောကြောင့် လေယာဉ်ခရီးစဉ် အတော်များများတွင် လက်မှတ်ကြိုတင်ဝယ်ယူမှုများ ရှိနေပါသည်။ ထောက်ခံချက်များပါမှသာလျှင် လေယာဉ်စီးနင်းခွင့်ပြုမည်ဆိုသည့် ထုတ်ပြန် ချက်သည် လေကြောင်းလိုင်းများအပေါ် များစွာအ ကျိုးသက်ရောက်မှုမရှိသော်လည်း လေကြောင်း ခရီးစဉ်ကိုသာ အားကိုးအားထားပြုနေရသည့် ခရီးသည်များအတွက် လေယာဉ်လက်မှတ်နှုန်းထား များကို အဆမတန်ဖြင့် ပြန်လည်ဝယ်ယူနေရခြင်းနှင့် ထိုင်ခုံနေရာရရှိရန်အတွက် အလွန်ခက်ခဲနေခြင်း စသည့်အခက်အခဲများကို ရင်ဆိုင်ကြုံတွေ့နေရ ပါသည်။  

မေး - ပြင်ပဈေးကွက်တွင် လေယာဉ်လက်မှတ်ခများ အဆမတန်ကြီးမြင့်နေသည့်အပေါ် လေကြောင်း လိုင်းများအနေဖြင့် မည်သို့ စိစစ်ကြပ်မတ်သွားရန် ရှိသနည်း။

ဖြေ - ယခုကဲ့သို့ဖြစ်ပေါ်နေသည့်ကိစ္စရပ်များကို ထိန်းချုပ်နိုင်ရန်အတွက် MAI ၏ လူမှုကွန်ရက် စာမျက်နှာများ မှတစ်ဆင့် လေယာဉ်လက်မှတ်ခနှုန်း ထားအမှန်များ၊ လေယာဉ်ခရီးစဉ်များနှင့် လေကြောင်း နှင့်ပတ်သတ်သည့် နောက်ဆုံးရသတင်းများကို စဉ်ဆက်မပြတ် အသိပေးကြေညာလျက်ရှိပါသည်။ ထို့ပြင် MAI ၏ Customer Service Centre ၊ လက်မှတ်အရောင်းရုံးခွဲများနှင့် website www.maiair.com တို့တွင်လည်း တိုက်ရိုက် ဆက်သွယ် ဝယ်ယူနိုင်သလို ယုံကြည်စိတ်ချရသည့် လက်မှတ်အရောင်းကိုယ်စားလှယ်များ ထံတွင် လည်း ကိုယ်တိုင် ဝယ်ယူနိုင်ပါသည်။