ယွန်း (NSS) - စက်တင်ဘာ ၁၈ 

မြန်မာနိုင်ငံရှိ ရေဘေးသင့်ပြည်သူများအတွက် အိန္ဒိယနိုင်ငံမှ သဘာဝဘေး အန္တရာယ် ကယ်ဆယ်ရေးပစ္စည်း စုစုပေါင်းတန်ချိန်(၅၃)တန် လှူဒါန်းခဲ့ကြောင်း ရန်ကုန်မြို့ရှိ အိန္ဒိယသံရုံးက စက်တင်ဘာ(၁၇)ရက် တွင် အသိပေးထုတ်ပြန်ထားသည်။

အိန္ဒိယနိုင်ငံအနေဖြင့် Operation Sadbhav (ချစ်ကြည်ရင်းနှီးမှုအစီအစဉ်) ဖြင့် တိုင်ဖွန်းမုန်တိုင်း ရာဂီ၏အရှိန်ကြောင့် ရေကြီးရေလျှံမှုဒဏ်ကို ခံစားခဲ့ရသည့် မြန်မာနိုင်ငံရှိ ပြည်သူများအတွက် အထက်ပါကဲ့သို့ ကူညီပံ့ပိုးပေးခြင်းဖြစ်ကြောင်း သိရသည်။

မြန်မာနိုင်ငံအလယ်ပိုင်းနှင့် မြောက်ပိုင်းဒေသများ အပါအဝင် ရေကြီးရေလျှံမှုဒဏ်ခံခဲ့ရသည့်ဒေသများကို ဖြန့်ဖြူးရန်အတွက် လူသားချင်းစာနာထောက် ထားမှုဆိုင်ရာ အကူအညီ နှင့် သဘာဝဘေးအန္တရာယ်ကယ်ဆယ်ရေးပစ္စည်းများ စုစုပေါင်းတန်ချိန်(၃၂)တန်အား  အိန္ဒိယတပ်မတော်(လေ)မှ နေပြည် တော်သို့ စက်တင်ဘာ(၁၇)ရက်တွင် ပို့ဆောင်ခဲ့ကြောင်း ထုတ်ပြန်ချက်အရ သိရသည်။ အဆိုပါပစ္စည်းများကို မြန်မာနိုင်ငံဆိုင်ရာ အိန္ဒိယနိုင်ငံ သံအမတ်ကြီး Abhay Thakur မှ ပြည်ထောင်စုဝန်ကြီး ဦးကိုကိုလှိုင်ထံသို့ နေပြည်တော်လေဆိပ်တွင် လွှဲပြောင်းပေးအပ်ခဲ့ကြောင်း သိရသည်။

ထို့ပြင် အိန္ဒိယတပ်မတော်(ရေ)မှ စစ်ရေယာဥ် INS Satpura သည် သဘာဝဘေးအန္တရာယ် ကယ်ဆယ်ရေးအကူအညီ ပစ္စည်းများ စုစုပေါင်း တန်ချိန် (၂၁) တန်အား အဆိုပါဒေသများသို့ ဖြန့်ဖြူးပေးရန်အတွက် ဒုတိယအသုတ်အဖြစ် ရန်ကုန်မြို့သို့ ထပ်မံပို့ဆောင်ခဲ့ရာ မြန်မာနိုင်ငံဆိုင်ရာ အိန္ဒိယနိုင်ငံ သံအမတ်ကြီး Abhay Thakur မှ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်းထံသို့ သီလဝါဆိပ်ကမ်း၊ ရန်ကုန်တွင် လွှဲပြောင်းပေးအပ်ခဲ့ကြောင်း သိရသည်။

ကူညီကယ်ဆယ်ရေးပစ္စည်းများတွင် စားသောက်ကုန်နှင့် လူသုံးကုန်ပစ္စည်းများဖြစ်သည့် မရှိမဖြစ်လိုအပ်သော ပစ္စည်းများပါဝင်သည့် သေတ္တာများနှင့် ဆေးဝါး၊ အစားအသောက်၊ မီးဖိုချောင်သုံးပစ္စည်းများ၊ အဝတ်အထည်များ၊ တစ်ကိုယ်ရေသန့်ရှင်းရေးသုံးပစ္စည်းများနှင့် အခြားပစ္စည်းများ ပါဝင်ကြောင်း သိရသည်။