Pika  (NSS) - စက်တင်ဘာ ၁၈

စက်တင်ဘာလ(၁၈)ရက်နေ့မှာ မြောက်ကိုရီးယားဟာ ၎င်းရဲ့နိုင်ငံအရှေ့ဖက်ကမ်းရိုးတန်းပင်လယ်ပြင်ထဲကို တာတိုပစ်ပဲ့ထိန်းဒုံးကျည်အများအပြား စမ်းသပ်ပစ်လွှတ်ခဲ့တယ်လို့ တောင်ကိုရီးယားအစိုးရက ပြောကြားခဲ့ပါတယ်။

မြောက်ကိုရီးယားအစိုးရဟာ ယူရေနီယမ်သန့်စင်တဲ့စက်ရုံရဲ့ ဓါတ်ပုံတွေကို ပထမဆုံးအကြိမ်ထုတ်ပြန်ပြသခဲ့ပြီး နိုင်ငံရဲ့နျူကလီးယားလက်နက်တိုက်ကို တိုးမြှင့်သွားမယ်လို့ ကတိပြုခဲ့ပြီးနောက် ရက်ပိုင်းအကြာမှာ ယခုလိုစမ်းသပ်ပစ်လွှတ်မှုတွေထွက်ပေါ်လာတာ ဖြစ်ပါတယ်။ မြောက်ကိုရီးယားအစိုးရဟာ တာတိုပစ်ပဲ့ထိန်းဒုံးကျည်တွေကို ပြုံးယမ်းမြို့မြောက်ဖက် Kaechon မြို့ကနေ နံနက်(၆)နာရီ(၅၀)မိနစ်မှာ စမ်းသပ်ပစ်လွှတ်ခဲ့တာဖြစ်တယ်လို့ သိရပါတယ်။

အဲဒီဒုံးကျည်တွေဟာ အရှေ့မြောက်ဦးတည်ချက်အတိုင်း အကွာအဝေး (၄၀၀) ကီလိုမီတာလောက်အထိ ပျံသန်းခဲ့တယ်လို့ တောင်ကိုရီးယားစစ်ဦးစီးချုပ်များရုံး(JCS)က ပြောကြားခဲ့ပါတယ်။ ဒါပေမဲ့လည်း ဒုံးကျည်အရေအတွက် ဘယ်လောက်ရှိတယ်ဆိုတဲ့အချက်နဲ့ ဘယ်နားမှာ ပျက်ကျသွားခဲ့တယ်ဆိုတဲ့ အသေးစိတ်အချက်အလက်တွေကို (JCS)က ထုတ်ပြန် ပြောကြားခဲ့တာမျိုးမရှိဘူးလို့လည်း သိရပါတယ်။

JCS က "မြောက်ကိုရီးယားရဲ့ ဒုံးကျည်စမ်းသပ်ပစ်လွှတ်မှုတွေဟာ ကိုရီးယားကျွန်းဆွယ်မှာ ငြိမ်းချမ်းရေးနဲ့တည်ငြိမ်ရေးကို ပြင်းပြင်းထန်ထန် ခြိမ်း ခြောက်နေတဲ့ ရှင်းလင်းပြတ်သားတဲ့ ရန်စမှုတွေဖြစ်ပါတယ်။ မြောက်ကိုရီးယားရဲ့ အဲဒီလိုလုပ်ရပ်တွေကို ကျွန်တော်တို့ ပြစ်တင်ရှုတ်ချပါတယ်။ နောက် ထပ်ရန်စမှုတွေရှိလာမယ်ဆိုရင် လက်တုံ့ပြန်မှုတွေကို ချက်ချင်းလုပ်ဆောင်သွားမှာပါ"လို့ ပြောဆိုခဲ့ပါတယ်။ မြောက်ကိုရီးယားရဲ့ ဒုံးကျည်စမ်းသပ်ပစ်လွှတ်မှုတွေကိုသတိပြုမိပြီး တောင်ကိုရီးယား၊ ဂျပန်တို့နဲ့အတူ တိုင်ပင်ဆွေး နွေးမှုတွေကို လုပ်ဆောင်ခဲ့တယ်လို့ အမေရိကန် အင်ဒို-ပစိဖိတ်ဒေသကွပ်ကဲမှုဌာနချုပ်က ပြောကြားခဲ့ပါတယ်။ မြောက်ကိုရီးယားဟာ ပြီးခဲ့တဲ့စက်တင် ဘာလ(၁၂)ရက်နေ့မှာ တာတိုပစ်ပဲ့ထိန်းဒုံးကျည်တွေကို စမ်းသပ်ပစ်လွှတ်ခဲ့ပြီး သီတင်းပတ်(၁)ပတ်မပြည့်ခင်မှာပဲ ယခုလိုထပ်မံစမ်းသပ်ပစ်လွှတ်ခဲ့တာဖြစ်တယ်လို့လည်း သိရပါတယ်။