ဂျန်ဇက် (NSS) - ဇန်နဝါရီ ၂ 

အမေရိကန်အစိုးရသည် ဆီးရီးယား နှင့် အီရတ်နိုင်ငံတို့ရှိ အီရန်လိုလားသောလက်နက်ကိုင်အဖွဲ့များကို ရက်ပေါင်းများစွာ တိုက်ခိုက်ရန်ခွင့်ပြုပေးလိုက်ကြောင်း အဆိုပါကိစ္စနှင့်နီးစပ်သော အမေရိကန်အစိုးရတာဝန်ရှိသူများက ထုတ်ဖော်ပြောဆိုလိုက်သည်။ 

ဆီးရီးယားနှင့် အီရတ်နိုင်ငံတို့ရှိ အီရန်လိုလားသော လက်နက်ကိုင်အဖွဲ့များကို တိုက်ခိုက်ရာတွင် ၎င်းတို့နိုင်ငံအတွင်းရှိ အီရန်နိုင်ငံသားများနှင့် အခြားစစ်ဘက်ဆိုင်ရာအဆောက်အဦးများကိုလည်း တိုက်ခိုက်မည့်အစီအစဉ်များလည်း ခွင့်ပြုပေးထားကြောင်း အမေရိကန်အစိုးရက ပြောသည်။

ပြီးခဲ့သောရက်ပိုင်းက ဆီးရီးယား နှင့် နယ်စပ်ချင်းထိစပ်နေသော ဂျော်ဒန်နိုင်ငံ နယ်စပ်အနီးရှိ အမေရိကန် တပ်ဖွဲ့ဝင်များ ဒရုန်းများဖြင့် အတိုက်ခံရပြီးနောက် အမေရိကန်သမ္မတဂျိုးဘိုင်ဒန်က လက်တုံ့ပြန်ရန် စီစဉ်ခဲ့ခြင်း ဖြစ်သည်။

"ဂျော်ဒန်နိုင်ငံရှိ အမေရိကန်စစ်သားတွေ အတိုက်ခံရမှုတွေ အတွက် အမေရိကန်အစိုးရရဲ့လက်တုံ့ပြန်မှုတွေက အဆင့်များစွာရှိနေတယ်။ အဲဒီအဆင့်တွေကို အချိန်တန်ကြာ လုပ်ဆောင်သွားမယ်" ဟု အမေရိကန်နိုင်ငံခြားရေးဝန်ကြီးအန်တိုနီဘလီကန်က ပြောသည်။

အမေရိကန်အစိုးရအနေဖြင့် ဆီးရီးယားနှင့် အီရတ်နိုင်ငံတို့ရှိ အီရန်နိုင်ငံက ကျောထောက်နောက်ခံပေးထားသည့် လက်နက်ကိုင်အဖွဲ့အစည်းများကို တိုက်ခိုက်မည့်အချိန်ဇယားနှင့်ပတ်သက်ပြီး အသေးစိတ်သတင်းထုတ်ပြန်ခြင်းမျိုးမရှိကြောင်း၊ CBS သတင်းဌာန က ဆိုသည်။ 

အစ္စရေး နှင့် ဟားမက်စ်လက်နက်ကိုင်အဖွဲ့ကြား ဂါဇာစစ်ပွဲစတင်ခဲ့ပြီးနောက်ပိုင်း အီရန်နိုင်ငံထံမှ အကူအညီများ ရရှိနေသော အရှေ့အလယ်ပိုင်းဒေသအတွင်းရှိ လက်နက်ကိုင်အဖွဲ့များသည် အမေရိကန် နှင့် အစ္စရေးနိုင်ငံတို့ကို တိုက်ခိုက်ခဲ့ပြီး အမေရိကန်တပ်ဖွဲ့ဝင်များ အကြိမ်ပေါင်း ၁၅ဝ ကျော် တိုက်ခိုက်ခံခဲ့ရကြောင်း သိရသည်။ ဂျော်ဒန်နိုင်ငံရှိ အမေရိကန်စစ်သားသုံးဦး သေဆုံးမှုနှင့် အမေရိကန်စစ်သား ၄ဝ ဦး ဒဏ်ရာရခြင်းကို အမေရိကန် လွှတ်တော်ကိုယ်စားလှယ်များ စိတ်ဆိုးဒေါသဖြစ်နေပြီး သမ္မတဂျိုးဘိုင်ဒန်လည်း ဖိအားများဖြင့် ရင်ဆိုင်နေရ ကြောင်း အမေရိကန်အခြေစိုက်မီဒီယာများတွင် ဖော်ပြထားသည်။