ဂျန်ဇက် (NSS) - ဒီဇင်ဘာ ၂ဝ 

တောင်တရုတ်ပင်လယ်မှာ ပိုင်နက်နယ်မြေအငြင်းပွားမှုတွေနဲ့ပတ်သက်ပြီး တရုတ်နိုင်ငံက တင်းမာမှု အရှိန်မြင့်တက်စေဖို့၊ ဖန်တီးလုပ်ဆောင်နေတယ်လို့ ဖိလစ်ပိုင်ကာကွယ်ရေးဝန်ကြီးက ဝေဖန်ပြောဆိုလိုက်ပါတယ်။ 

တရုတ်နဲ့ ဖိလစ်ပိုင်နိုင်ငံကြား တောင်တရုတ်ပင်လယ်အရေးနဲ့ပတ်သက်ပြီး ပြီးခဲ့တဲ့လပိုင်းများအတွင်း ထိပ်တိုက် တွေ့ဆုံမှုများဖြစ်လာခဲ့ပြီးနောက်ဖိလစ်ပိုင်သမ္မတဖာဒီနန်မာကိုစ့် ကိုယ်တိုင်က တရုတ် နဲ့ ဖိလစ်ပိုင်နိုင်ငံကြား သံတမန်ဆက်ဆံရေးဟာ အဆိုးဘက်ကို ဦးတည်နေတယ်လို့ မကြာသေးမီက ပြောခဲ့ပါတယ်။ တရုတ်နိုင်ငံနဲ့ ဖိလစ်ပိုင်နိုင်ငံတို့ဟာ တောင်တရုတ်ပင်လယ်အတွင်း ပိုင်နက်နယ်မြေအငြင်းပွားမှုတွေနဲ့ပတ်သက်ပြီး ၂ဝ၁၆ ခုနှစ် က အငြင်းပွားမှုတွေစတင်ဖြစ်ပွားခဲ့ရာနိုင်ငံတကာ ခုံရုံးအဆုံးအဖြတ်ခံယူခဲ့ရပါတယ်။ 

နိုင်ငံတကာခုံရုံးဟာ တရုတ်နိုင်ငံရဲ့ပြောဆိုချက်တွေကို ငြင်းဆန်ပယ်ချပြီး ဖိလစ်ပိုင်နိုင်ငံကို အနိုင်ပေးခဲ့ပါတယ်။ တရုတ်နိုင်ငံက တစ်နှစ်ကို အမေရိကန်ဒေါ်လာ ၃ ထရီလီယံကျော်တန်ဖိုးရှိ ကုန်စည်တွေ တင်ဆောင်ဖြတ်သန်းနေ တဲ့တောင်တရုတ်ပင်လယ်အတွင်းရှိနေရာအားလုံးရဲ့ ၈ဝ ရာခိုင်နှုန်းကို ၎င်းတို့ပိုင်ဆိုင်ကြောင်း ပြောဆိုထားပါ တယ်။ 

ဖိလစ်ပိုင်ကာကွယ်ရေးဝန်ကြီး ဂီဘတ်တို တီအိုဒိုရိုက "တောင်တရုတ်ပင်လယ်တစ်ခုလုံးနီးပါးကို ပိုင်ဆိုင်တယ်လို့ တရုတ်နိုင်ငံရဲ့ပြောဆိုချက်တွေကို ကမ္ဘာ့ဘယ်နိုင်ငံကမှ အားပေးထောက်ခံတာမျိုးမရှိပါဘူး။ ဒါဟာ အမှန်တရားနဲ့ လက်တွေအဖြစ်ပျက်ပါ" လို့ ပြောပါတယ်။ 

တရုတ်နိုင်ငံဟာ ခုံရုံးဆုံးဖြတ်ချက်ကိုလက်မခံဘဲ တောင်တရုတ်ပင်လယ်အတွင်းမှာ ဖိလစ်ပိုင်သင်္ဘောတွေကို  ဟန့်တားနှောင့်ယှက်တာမျိုးတွေလုပ်ဆောင်နေသလို ဖိလစ်ပိုင်သင်္ဘောတွေကို ဝင်တိုက်တာမျိုးတွေ လုပ်ဆောင်နေခဲ့ပါတယ်။