ဂျန်ဇက် (NSS) - နိုဝင်ဘာ ၂၈

အမေရိကန်ရေတပ်တပ်ဖွဲ့ဟာ ယီမင်ကမ်းလွန်မှာအစ္စရေးနိုင်ငံနဲ့ ဆက်နွယ်တဲ့ ကုန်စည်သင်္ဘောတစ်စီးကို ဖမ်းဆီးဖို့ကြိုးပမ်းတဲ့ လက်နက်ကိုင်အုပ်စုတွေကို ဖမ်းဆီးနိုင်ခဲ့ကြောင်း သိရပါတယ်။ 

လက်နက်ကိုင်အဖွဲ့တစ်ဖွဲ့ဟာ အစ္စရေးနိုင်ငံပိုင်တဲ့ ကုန်စည်သင်္ဘောကို ဖမ်းဆီးဖို့ ကြိုးပမ်းလာချိန်မှာ  အမေရိကန် ရေတပ်က ကြးဝင်ကယ်တင်ပေးခဲ့ပြီး စပီဘုတ်နဲ့ထွက်ပြေးဖို့ ကြိုးပမ်းတဲ့ လက်နက်ကိုင်အုပ်စုကို လိုက်လံဖမ်းဆီးခဲ့ ရကြောင်း သိရပါတယ်။ 

အမေရိကန်စစ်ဌာနချုပ်က ကုန်စည်သင်္ဘောကို ဖမ်းဆီးဖို့ ကြိုးပမ်းသူတွေဟာ ဆိုမာလီ ပင်လယ်ဓါးပြအုပ်စုတွေ ဖြစ်ပြီး၊ ဟူသီလက်နက်ကိုင်အဖွဲ့ဝင်တွေ မဟုတ်ကြောင်း ဆိုပါတယ်။ အဆိုပါလက်နက်ကိုင်အုပ်စုတွေဟာ သင်္ဘောတွေကို ရော့ကတ်ဒုံးကျည်တွေနဲ့ ပစ်ခတ်တိုက်ခိုက်ခဲ့ပေမယ့် ထိမှန်ခြင်းမျိုးမရှိခဲ့ကြောင်း သိရပါတယ်။

ပင်တဂွန်စစ်ဌာနချုပ်ရဲ့ ပြောရေးဆိုခွင့်ရှိသူ ပတ်ရိုင်ဒါက "အစ္စရေးနိုင်ငံပိုင်သင်္ဘောကို ဖမ်းဆီးဖို့ ကြိုးပမ်းခဲ့သူတွေ ဟာ ဟူသီလက်နက်ကိုင်အုပ်စုတွေမဟုတ်ဘူး" လို့ ပြောပါတယ်။ အမေရိကန်စစ်တပ်ရဲ ဗဟိုအမိန့်ပေးကွပ်ကဲရေး ဌာနက အေဒင်ပင်လယ်ကွေ့အတွင်းရှိ အမေရိကန် နဲ့ မဟာမိတ်နိုင်ငံတွေရဲ့ ရေတပ်သင်္ဘောတွေဟာ ကုန်စည် သင်္ဘောကို ဖမ်းဆီးဖို့ကြိုးပမ်းသူတွေကို တုံ့ပြန်ခဲ့ကြောင်း ပြောပါတယ်။ 

အမေရိကန်စစ်တပ်က "သေနတ်သမားတွေဟာ သင်္ဘောပေါ်ကနေ စပိဘုတ်လှေတွေနဲ့ ထွက်ပြေးသွားခဲ့တယ်။ သေနတ်သမားငါးဦး ပါဝင်တယ်။ အဲဒီသေနတ်သမားတွေကို အမေရိကန်ဖျက်သင်္ဘော USS Mason က လိုက်လံ ဖြိုခွင်းဖမ်းဆီးခဲ့တယ်။ နောက်ပိုင်းမှာ သေနတ်သမားတွေဟာ အဖမ်းခံခဲ့တယ်" လို့ ပြောပါတယ်။