ကျော်(NSS) - နိုဝင်ဘာ ၃

ထိုင်းနိုင်ငံသို့ MoU စနစ်ဖြင့်လာရောက်အလုပ်လုပ်ကိုင်နေသော မြန်မာအလုပ်သမားများအနေဖြင့် MoU သက်တမ်းပြည့်ပါက Over-Stay စာရင်းမဝင်စေရေးအတွက် မြန်မာနိုင်ငံသို့ပြန်လည်ထွက်ခွာကြရန် ထိုင်းနိုင်ငံဆိုင်ရာ မြန်မာသံရုံး၊ ဘန်ကောက်မြို့က အသိပေးထားသည်။

မြန်မာ MoU အလုပ်သမားအချို့သည် MoU သက်တမ်းပြည့်ပြီးချိန်၌ နယ်စပ်ဂိတ်/စခန်းများမှတစ်ဆင့် မြန်မာနိုင်ငံသို့ ပြန်လည်ဝင်ရောက်ခြင်းမပြု၍ ထိုင်းနိုင်ငံအတွင်း နေထိုင်ခွင့်သက်တမ်းကျော်လွန်နေထိုင်သူ(Over-Stay)စာရင်းဝင်သွားခဲ့ကြောင်း မြန်မာသံရုံး၏ အသိပေးချက်အရ သိရသည်။

Over-Stay စာရင်းဝင်သွားသည့် မြန်မာနိုင်ငံသားများသည် စစ်ဆေးချိန်၌ Over-Stay ဖြစ်ကြောင်းတွေ့ရှိပါက ဒဏ်ငွေပေးဆောင်ရခြင်း၊ အရေးယူခြင်း၊ ဝင်ခွင့်ကန့်သတ်ခြင်းများ ကြုံတွေ့ရနိုင်သည်ဟု အသိပေးထားသည်။

ထို့ကြောင့် မြန်မာ MoU အလုပ်သမားများအနေဖြင့် သက်တမ်းပြည့်ပါက သတ်မှတ်နယ်စပ်ဂိတ်/စခန်းများမှ မြန်မာနိုင်ငံသို့ပြန်လည်ထွက်ခွာရန် နှင့် နိုင်ငံကူးလက်မှတ်တွင် ထိုင်းနိုင်ငံ၏ အထွက်တံဆိပ်တုံးရိုက်နှိပ်ရန်လည်း မြန်မာသံရုံးက အသိပေးထားသည်။

MoU သက်တမ်းပြည့်ပြီးသည့် မြန်မာအလုပ်သမားများသည် မြန်မာနိုင်ငံသို့ပြည်လည်ဝင်ရောက်ချိန်၌ နှစ်နိုင်ငံနယ်စပ်ဂိတ်/စခန်းများအား ဖြတ်သန်းချိန်တွင် နိုင်ငံကူးလက်မှတ်၌ အထွက်/အဝင် တံဆိပ်တုံးများကို နှစ်နိုင်ငံလူဝင်မှုကြီးကြပ်ရေးအဖွဲ့များမှ ရိုက်နှိပ်ခြင်း၊စာရင်းပယ်ဖျက်ခြင်းများပြုလုပ်ကြကြောင်း သိရသည်။