NSS - အောက်တိုဘာ ၂၂

ကချင်ပြည်နယ်၊ ဖားကန့်မြို့နယ်တွင် ကျေးရွာရေတွင်းအနီးသို့ လက်နက်ကြီးကျည်တစ်လုံးကျရောက်ပေါက်ကွဲမှုကြောင့် ရေချိုးနေသည့် (၁၂)နှစ်အရွယ် အမျိုးသမီးတစ်ဦး ကျည်စထိမှန်သေဆုံးသွားခဲ့ကြောင်း သိရသည်။

ဖြစ်စဉ်မှာ ပြီးခဲ့သော အောက်တိုဘာလ ၁၈ ရက်၊ ညနေ ၅နာရီအချိန်တွင် ဖားကန့်မြို့နယ်၊ နန့်ရေတောင်ကျေးရွာ၊ ရပ်ကွက်(၃)ရှိ အများသုံးရေတွင်းအနီး၌  အထက်ပါကဲ့သို့ ဖြစ်ပွားခဲ့ကြောင်း သိရသည်။

အဆိုပါ ရပ်ကွက်ရှိ အများသုံးရေတွင်းအနီးသို့ PDF အဖွဲ့မှ ပစ်ခတ်လိုက်သည့် လက်နက် ကြီးကျည်တစ်လုံး ကျရောက်ပေါက်ကွဲမှု ဖြစ်ပွားခဲ့ကြောင်း ရဲတပ်ဖွဲ့က ထုတ်ပြန်ထားသည်။

ထိုသို့ ကျရောက်ပေါက်ကွဲမှုကြောင့် ၎င်းရေတွင်း၌ရေချိုးနေသည့် မသဲစုမွန်(၁၂)နှစ်တွင် နောက်စေ့၊ ဝဲလက်ဖျံနှင့် ဝဲဘက်ခါးတို့၌ လက်နက်ကြီးကျည်စ ဖောက်ဝင်ဒဏ်ရာများရရှိခဲ့ကြောင်း သိရသည်။

ထို့နောက် ဒဏ်ရာရရှိသူ မသဲစုမွန်အား ဆေးကုသမှုခံယူရန် ဖားကန့်မြို့ရှိ “ရွှေပြည်သစ်” ပုဂ္ဂလိကဆေးရုံသို့ ပို့ဆောင်ဆေးကုစေခဲ့ရာ အခင်းဖြစ်စဉ်က ရရှိခဲ့သည့် ကျည်စထိမှန်ဒဏ်ရာများဖြင့် သေဆုံးသွားခဲ့ကြောင်း သိရသည်။

ပစ်ခတ်တိုက်ခိုက်မှုကျူးလွန်သူများအား ဥပဒေနှင့်အညီ အပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း ရဲတပ်ဖွဲ့က သတင်းထုတ်ပြန်ထားသည်။