ဂျန်ဇက် (NSS) - အောက်တိုဘာ ၅ 

အင်ဒိုနီးရှားနိုင်ငံပိုင် စစ်လက်နက်ပစ္စည်းထုတ်လုပ်ရေးကုမ္ပဏီဖြစ်တဲ့ Defend ID က မြန်မာနိုင်ငံမှာ အာဏာရယူမှုဖြစ်ပွားခဲ့ပြီးနောက်ပိုင်း မြန်မာနိုင်ငံကို စစ်လက်နက်ပစ္စည်းများ ရောင်းချခြင်းမရှိကြောင်း တုံ့ပြန်ပြောဆိုလိုက်ပါတယ်။ 

အင်ဒိုနီးရှားနိုင်ငံပိုင် စစ်လက်နက်ပစ္စည်းထုတ်လုပ်ရေးအဖွဲ့အစည်းသုံးခုဟာ မြန်မာနိုင်ငံကို စစ်လက်နက်ပစ္စည်း များ ရောင်းချခဲ့ကြောင်း လူအခွင့်ရေးအဖွဲ့အစည်းများက စွပ်စွဲပြောဆိုခဲ့ပြီးနောက် အင်ဒိုနိးရှား Defend ID က ပြန်လည်တုံ့ပြန်ခဲ့တာဖြစ်ပါတယ်။ 

အင်ဒိုနီးရှား Defend ID ရဲ့လက်အောက်ခံကုမ္ပဏီတွေဖြစ်တဲ့  PT Len Industri ၊ PT Dirgantara Indonesia နဲ့ PT PAL Indonesia တို့ဟာ မြန်မာနိုင်ငံကို စစ်လက်နက်ပစ္စည်းများ တင်ပို့ရောင်းချခြင်းမလုပ်ဖို့ တားမြစ်ပိတ်ပင် ထားတဲ့ ကုလသမဂ္ဂဆုံးဖြတ်ချက်တွေကို အပြည့်အဝလိုက်နာကြောင်း ပြောပါတယ်။ 

အင်ဒိုနီးရှား Defend ID က "PT Pindad ဟာ မြန်မာနိုင်ငံကို စစ်လက်နက်ပစ္စည်းတွေ တင်ပို့ရောင်းချတာမျိုး မရှိဘူး။ ကုလသမဂ္ဂလုံခြုံရေးကောင်စီက မြန်မာနိုင်ငံကို စစ်လက်နက်ပစ္စည်းများ မရောင်းချဖို့ တားမြစ်ပိတ်ပင်ခဲ့ပြီးနောက် PT Pindad ဟာ မြန်မာနိုင်ငံကိုစစ်လက်နက်ပစ္စည်းများ မရောင်းချတော့ဘူး" လို့ သတင်းထုတ်ပြန်ထား ပါတယ်။ 

အဆိုပါ အင်ဒိုနိးရှားစစ်လက်နက်ပစ္စည်းထုတ်လုပ်ရေးကုမ္ပဏီအနေနဲ့ မြန်မာနိုင်ငံကို ၂ဝ၁၆ ခုနှစ်က စစ်လက်နက်ပစ္စည်းများကို  နောက်ဆုံးထား တင်ပို့ရောင်းချခဲ့ဖူးကြောင်း ဆိုပါတယ်။ 

ဒါ့အပြင် PT Dirgantara Indonesia  နဲ့ PT PAL တို့ဟာလည်း မြန်မာနိုင်ငံ နဲ့ စစ်လက်နက်ပစ္စည်း အရောင်း အဝယ်စာချုပ် ချုပ်ဆိုခြင်းမျိုးမရှိကြောင်း Defend ID က သတင်းထုတ်ပြန်ထားပါတယ်။ အင်ဒိုနီးရှားရှေ့နေချုပ်ဟောင်း  Marzuki Darusman  က အင်ဒိုနိးရှားစစ်လက်နက်ပစ္စည်းထုတ်လုပ်ရေးကုမ္ပဏီတွေဟာ မြန်မာနိုင်ငံကို စစ်လက်နက်ပစ္စည်းများ တင်ပို့ရောင်းချနေတယ်လို့ မကြာသေးမီက စွပ်စွဲဝေဖန်ခဲ့ကြောင်း သိရပါတယ်။