မျိုးကြီး (NSS) - စက်တင်ဘာ ၂၆

စစ်ဆေးခံနေရသည်ဟု သတင်းထွက်ပေါ်နေသော ဒုတိယဗိုလ်ချုပ်ကြီးစိုးထွဋ်ကို မူလစစ်ဘက်တာဝန်ပြန်လည်ပေးခဲ့ပြီး စီးပွား/ကူးသန်းဒုဝန်ကြီးကို တာဝန်မှအနားပေးကာ အစိုးရအဖွဲ့အပြောင်းအလဲဖြစ်ပေါ်ခဲ့ကြောင်း သတင်းရရှိသည်။

နိုင်ငံတော်စီမံအုပ်ချုပ်ရေးကောင်စီသည် နစကပြင်ဆင်ဖွဲ့စည်းခြင်း၊ အစိုးရအဖွဲ့အပြောင်း အလဲဖြစ်စဉ်များကို ယမန်နေ့ (စက်တင်ဘာလ ၂၅ ရက်)ညပိုင်းတွင် ပြည်သူလူထုအား အသိပေးကြေညာခဲ့ခြင်းဖြစ်သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် နစကအဖွဲ့ဝင်များဖြစ်သော ဒုတိယဗိုလ်ချုပ်ကြီး စိုးထွဋ်၊ ဒုတိယဗိုလ်ချုပ်ကြီးမိုးမြင့်ထွန်းတို့၏နေရာတွင် ဗိုလ်ချုပ်ကြီး မောင်မောင်အေး၊ ဒုတိယဗိုလ်ချုပ်ကြီးညိုစောတို့ဖြင့် အစားထိုးကာ နစကအဖွဲ့ကို ပြင်ဆင်ဖွဲ့စည်းလိုက်သည်။

ထို့ပြင် နစကအဖွဲ့ဝင်တစ်ဦး ဖြစ်သကဲ့သို့ ပြည်ထောင်စုအစိုးရအဖွဲ့ရုံးဝန်ကြီးဌာန(၁) ဝန်ကြီးဖြစ်သော ဒုတိယဗိုလ်ချုပ်ကြီး စိုးထွဋ်ကို ဝန်ကြီးတာဝန်မှ အနားပေးကာ စစ်ဘက်မူလတာဝန်များကို ပြန်လည်ထမ်းဆောင်စေလိုက်ကြောင်း နစကမှ ထပ်မံကြေညာထား သည်။

အလားတူ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဒုတိယဝန်ကြီးဦးညွန့်အောင်ကိုလည်း ဒုဝန်ကြီးတာဝန်မှ အနားယူခွင့်ပြုလိုက်ပြီး ရွေးကောက်ပွဲကော်မရှင်အဖွဲ့ဝင် ဦးဘရန်ရှောင်ကိုလည်း အနားယူခွင့်ပြုလိုက်ကြောင်း သိရသည်။

ဒုတိယဗိုလ်ချုပ်ကြီးစိုးထွဋ် နှင့် ဦးညွန့်အောင်တို့သည် ပြီးခဲ့သည့် ရက်ပိုင်းအတွင်း၌ ခေါ်ယူစစ်ဆေးခံနေရသည်ဟု သတင်းများ ကျယ်ကျယ်လောင်လောင်ထွက်ပေါ်ခဲ့ပြီးနောက် နစကမှ ယခုကဲ့သို့ ၎င်းတို့၏တာဝန်များကို အနားပေးခဲ့ခြင်းဖြစ်သည်။

“အခုနပြောသလိုပေါ့ မဟုတ်တာ လုပ်ထားတာတွေ သိရင်တော့ လက်မခံဘူးဆိုတဲ့ပုံစံနဲ့ နစက လုပ်တယ်လို့မြင်တယ်။ ဒါတွေက ဖုံးထားလို့မှမရတာ။ ပါမစ်တွေရော၊ နယ်စပ်တွေကနေရော ကားသွင်းတယ်ဆိုတာ ထုံးစံမှမရှိတာ။ ဒါတွေက ပေးချင်လည်းရတယ်။ မပေးချင်လည်း ရတယ်။ မျက်စိမှိတ်ပေးလိုက်တယ်လို့ မြင်တယ်။ ဒါတွေက နောက်ပိုင်းရှင်းရမှာပေါ့” ဟု စီးပွားရေးလုပ်ငန်းရှင်တစ်ဦးက NSS ကို သုံးသပ်ပြောကြားသည်။

ထို့ပြင် နစကသည် ယမန်နေ့ညပိုင်းတွင် စီးပွားရေးနှင့်ကူးသန်းရောင်းဝယ်ရေးဝန်ကြီး ဦးအောင်နိုင်ဦးအား ပြည်ထောင်စုအစိုးရအဖွဲ့ရုံးဝန်ကြီးဌာန(၁)တွင် ဝန်ကြီးအဖြစ် ပြောင်းရွှေ့တာဝန်ပေးလိုက်ကြောင်း ကြေညာခဲ့သည်။

အဆိုပါ စီးပွားရေးနှင့်ကူးသန်းရောင်းဝယ်ရေးဝန်ကြီး နေရာတွင် ဝန်ကြီးသစ်အဖြစ် နိုင်ငံခြားရေးဒုဝန်ကြီး ဦးထွန်းအုံကို တာဝန်ပေးခန့်အပ်လိုက်ကြောင်း သိရသည်။

စီးပွားရေးနှင့်ကူးသန်းရောင်းဝယ်ရေးဒုဝန်ကြီးဟောင်း ဦးညွန့်အောင်၏ နေရာတွင် ၎င်းဝန်ကြီးဌာန၌ အမြဲတမ်းအတွင်းဝန်အဖြစ် တာဝန်ထမ်းဆောင်နေသော ဦးမင်းမင်းအား တာဝန်ပေးခန့်အပ်လိုက်ကြောင်း သိရသည်။

နိုင်ငံခြားရေးဝန်ကြီးဌာန ဒုတိယဝန်ကြီးအဖြစ် ရုရှားနိုင်ငံဆိုင်ရာ မြန်မာသံအမတ်ကြီးဖြစ်သော ဦးလွင်ဦးအား ဒုဝန်ကြီးအဖြစ် တာဝန်ပေးခန့်လိုက်ကြောင်း နစက၏ ကြေညာချက်အရ သိရသည်။

ပြီးခဲ့သည့် ရက်ပိုင်းအတွင်းကလည်း နိုင်ငံခြားသုံးငွေကြီးကြပ်မှုကော်မတီဥက္ကဋ္ဌ၊ မြန်မာနိုင်ငံရင်းနှီးမြှုပ်နှံမှုကော်မရှင်(MIC) ဥက္ကဋ္ဌအဖြစ် တာဝန်ယူခဲ့သော ဒုတိယဗိုလ်ချုပ်ကြီးမိုးမြင့်ထွန်းကို တာဝန်များမှအနားပေးကာ နိုင်ငံတော်ဒုဝန်ကြီးချုပ် ဗိုလ်ချုပ်ကြီးမြထွန်းဦးထံ နစကမှ တာဝန်ပေးအပ်ခဲ့သည်။

ဒုတိယဗိုလ်ချုပ်ကြီးမိုးမြင့်ထွန်းသည် ခေါ်ယူစစ်ဆေးခံနေရသည်ဟု ပြီးခဲ့သောရက်ပိုင်းအတွင်းက သတင်းများထွက်ပေါ်ခဲ့ဖူးသည်။