Pika (NSS) - စက်တင်ဘာ ၂၁ 

ကုလသမဂ္ဂဆိုင်ရာ အစ္စရေးအမြဲတမ်းကိုယ်စားလှယ် Gilad Erdan သည် စက်တင်ဘာလ(၁၉)ရက်က စတင်ကျင်းပခဲ့သည့် ကုလသမဂ္ဂအထွေထွေညီလာခံတွင် အီရန်သမ္မတ Ebrahim Raisi ၏ မိန့်ခွန်းပြောကြားမှုကို နှောင့်ယှက်မှုကြောင့် အစည်းအဝေးခန်းအတွင်းမှ နှင်ထုတ်ခံခဲ့ရပြီး  ဖမ်းဆီးထိန်းသိမ်းခြင်းခံထားရကြောင်း မီဒီယာများက ဖော်ပြခဲ့သည်။

အစည်းအဝေးခန်းအတွင်း Gilad Erdan သည် အီရန်နိုင်ငံတွင် ပြီးခဲ့သည့်နှစ်က ရဲတပ်ဖွဲ့များ၏ ဖမ်းဆီးချုပ်နှောင်ခံရမှုအတွင်း သေဆုံးသွားခဲ့သော အသက်(၂၂)နှစ်အရွယ် မာရှာအေမီနီ၏ ဓါတ်ပုံကို ကိုင်ဆောင်ထားခဲ့ကြောင်းလည်း သိရသည်။

အမေရိကန်သည် ယူကရိန်းပဋိပက္ခကို ပိုမိုဆိုးဝါးလာအောင် တွန်းအားပေးနေပြီး ကမ္ဘာကြီးကို အမေရိကန်အလိုကျဖြစ်စေရေးလုပ်ဆောင်နေသော လုပ်ရပ်များသည် မအောင်မြင်ကြောင်း အီရန်သမ္မတ Ebrahim Raisi က ပြောဆိုခဲ့သည်။

အီရန်သမ္မတ၏ မိန့်ခွန်းပြောကြားမှုကို နှောင့်ယှက်မှုကြောင့် Gilad Erdan သည်  အစည်းအဝေးခန်းအတွင်းမှ နှင်ထုတ်ခံခဲ့ရပြီး ၎င်းကို လုံခြုံရေးအစောင့်များက အဆောက်အဦးအတွင်းမှ ခေါ်ဆောင်သွားသည်ကို ဗီဒီယိုမှတ်တမ်းတစ်ခုတွင် တွေ့ခဲ့ရသည်။

ထို့အပြင် Gilad Erdan သည် ဖမ်းဆီးထိန်းသိမ်းခြင်းကို ခံထားရကြောင်း မီဒီယာအများအပြားက ဖော်ပြခဲ့သည်။ ကုလသမဂ္ဂပြောရေးဆိုခွင့်ရှိသူက "ကုလသမဂ္ဂလုံခြုံရေးတွေဟာ သူ့ကိုစကားပြောခဲ့ပါတယ်။ သူ့ကို ဖမ်းဆီးထိန်းသိမ်းခြင်းတွေတော့ မလုပ်ခဲ့ပါဘူး။ အခင်းဖြစ်ပွားရာနေရာကိုတော့ ပိတ်ဆို့ထားပါတယ်" ဟု ပြောခဲ့သည်။

Gilad Erdan က "ကျွန်တော် အမှန်တရားအတွက် တိုက်ပွဲဝင်နေတာကို ဘယ်တော့မှ ရပ်တန့်မှာ မဟုတ်ပါဘူး။ ကုလသမဂ္ဂရဲ့အကျင့်စာရိတ္တ ယိုယွင်းပျက်စီးနေတာတွေကို အမြဲတမ်းဖော်ထုတ်နေမှာပါ။ လူသတ်သမားတွေနဲ့ လူမျိုးရေးခွဲခြားတဲ့သူတွေကို ကော်ဇောနီခင်းပေးတဲ့သူတွေဟာ သူတို့ရဲ့လုပ်ရပ်အတွက် တာဝန်ယူရမှာပါ" ဟု တွစ်တာတွင်ရေးသားခဲ့သည်။

ပြီးခဲ့သည့်နှစ် စက်တင်ဘာလက အီရန်ရဲတပ်ဖွဲ့များသည် မသင့်လျော်သော အဝတ်အစားများ ဝတ်ဆင်သည်ဟုဆိုကာ အသက်(၂၂)နှစ်အရွယ် မာရှာအေမီနီကို ဖမ်းဆီးချုပ်နှောင်ခဲ့ခြင်းဖြစ်သည်။ 

ဖမ်းဆီးချုပ်နှောင်ခံရချိန်အတွင်း မာရှာအေမီနီသည် အချုပ်ခန်းအတွင်း သေဆုံးသွားခဲ့ပြီးနောက် အီရန်နိုင်ငံတစ်ဝှမ်းဆန္ဒပြပွဲများပေါ်လာကာ ဆန္ဒပြသူများ သေဆုံးမှုများနှင့် ဖမ်းဆီးထိန်းသိမ်းခံရမှုများလည်းရှိခဲ့သည်။