Pika (NSS) - စက်တင်ဘာ ၁၉ 

တူရကီသမ္မတအာဒိုဂန်က ၎င်းသည် အနောက်အုပ်စုနိုင်ငံများကို ယုံကြည်သည့်အတိုင်းအတာလောက် ရုရှားနိုင်ငံကို ယုံကြည်ကြောင်း ထုတ်ဖော်ပြောကြားခဲ့သည်။

ထို့အပြင် ယူကရိန်းပဋိပက္ခသည် အချိန်အတော်ကြာ ကြာမြင့်နိုင်သည်ဟုလည်း ယုံကြည်ကြောင်း ၎င်းက ထပ်မံပြောဆိုခဲ့သည်။

အာဒိုဂန်က "ရုရှားက ကျွန်တော်တို့ရဲ့ အနီးဆုံးအိမ်နီးချင်းနိုင်ငံတွေထဲက တစ်နိုင်ငံပါ။ ကျွန်တော်တို့မှာ သမိုင်းကြောင်းတွေရှိပေမယ့် ရုရှားကို မယုံကြည်သင့်တဲ့အကြောင်းပြချက်မျိုး ကျွန်တော့်မှာ မရှိပါဘူး။ အနောက်အုပ်စုနိုင်ငံတွေကို ယုံကြည်တဲ့အတိုင်းအတာတစ်ခုအထိ ရုရှားကိုလည်း ယုံကြည်ပါတယ်" ဟုပြောခဲ့သည်။

ထို့အပြင် ဝေဖန်သူများက ရုရှားသမ္မတပူတင်ကို မယုံကြည်ရလောက်သော လူမျိုးအဖြစ် မြင်နေခြင်းနှင့်ပတ်သက်သည့် မေးခွန်းများကိုလည်း အာဒိုဂန်က ပြန်လည်တုံ့ပြန်ဖြေဆိုခဲ့ကြောင်း သိရသည်။

၎င်းက "အဲဒါကိုတော့ ကျွန်တော် သဘောမတူပါဘူး။ ကျွန်တော်တို့နိုင်ငံမှာ သုံးစွဲနေတဲ့ သဘာဝါဓါတ်ငွေ့တွေအားလုံးရဲ့ ထက်ဝက်ခန့်က ရုရှားကနေ လာတာပါ။ကျွန်တော်တို့ဟာ အပြန်အလှန်ခြေလှမ်းတွေလုပ်ဆောင်နေပြီး ကာကွယ်ရေးပိုင်းမှာလည်း ပူးပေါင်းဆောင်ရွက်မှုတွေ လုပ်ဆောင်နေပါတယ်" ဟု ပြောခဲ့သည်။

ယူကရိန်းစစ်ပွဲနှင့်ပတ်သက်ပြီး တူရကီသမ္မတအာဒိုဂန်က"ဒီစစ်ပွဲဟာ အချိန်ကြာမြင့်မယ်ဆိုတာ ကျွန်တော်သိပါတယ်။ ဒီစစ်ပွဲ အမြန်ဆုံးပြီးဆုံးသွားဖို့ ကျွန်တော်မျှော်လင့်မိပါတယ်။ ရုရှားသမ္မတပူတင်ဟာ ဒီစစ်ပွဲကို အမြန်ဆုံး အဆုံးသတ်နိုင်မယ့်ဘက်မှာ ရှိနေပါတယ်။ ပူတင်ဟာ ဒီစစ်ပွဲကို အမြန်ဆုံး အဆုံးသတ်ဖို့ လိုလားနေတယ်လို့ပြောခဲ့ပြီး သူ့ရဲ့ပြောစကားတွေကို ကျွန်တော်ယုံကြည်ပါတယ်" ဟု ပြောခဲ့သည်။