ဂျန်ဇက် (NSS) - စက်တင်ဘာ ၁၇ 

တရုတ်ကာကွယ်ရေးဝန်ကြီး လီရှန်ဖူဟာ အကျင့်ပျက်လာဘ်စားမှုနဲ့ပတ်သက်ပြီး စုံစမ်းစစ်ဆေးခံနေရတဲ့အတွက် လူမြင်ကွင်းမှာ ကာလအတန်ကြာပျောက်ဆုံးနေကြောင်း သိရပါတယ်။ 

တရုတ်သမ္မတရှီကျင့်ဖျင့်ဟာ နိုင်ငံစစ်ဘက်နဲ့ အစိုးရအဖွဲ့စည်းများအတွင်း အကျင့်ပျက်လာဘ်စားမှုများရှိနေခြင်းကို ဖြိုခွင်းနိုင်ဖို့ ကြိုပမ်းလျက်ရှိနေရာ လီရှန်ဖူဟာ ကာကွယ်ရေးဝန်ကြီးအသစ်အဖြစ်ခန့် အပ်ခံရပြီးနောက် လအနည်းငယ်အကြာမှာ စုံစမ်းစစ်ဆေးခံနေရတာဖြစ်ပါတယ်။

တရုတ်အာကာသ နဲ့ ဆိုင်ဘာအဖွဲ့အပြင် တရုတ်စစ်လက်နက်ပစ္စည်းဝယ်ယူရေးဌာန အကြီးအကဲအဖြစ် တာဝန်ယူခဲ့ဖူးတဲ့ လီရှန်ဖူဟာမတ်လမှာ တရုတ်ကာကွယ်ရေးဝန်ကြီးအဖြစ် ခန့်အပ်ခံရသူဖြစ်ကြောင်း သိရပါတယ်။ 

ဝန်ကြီးလီရှန်ဖူဟာ ပြီးခဲ့တဲ့လကတည်းက လူမြင်ကွင်းက ပျောက်ဆုံးနေခဲ့ပြီး အဓိကအရေးကြီးတဲ့ အစည်းအဝေး တွေကိုလည်း ကိုယ်တိုင်တက်ရောက်တာမျိုး မရှိကြောင်း သိရပါတယ်။ လီရှန်ဖူဟာ တရုတ်စစ်လက်နက်ပစ္စည်း ဝယ်ယူရေးဌာနအကြီးအကဲအဖြစ် တာဝန်ယူချိန်အတွင်း အကျင့်ပျက်လာဘ်စားမှုတွေရှိခဲ့ခြင်း ရှိ/မရှိ ဆိုတဲ့အချက်နဲ့ပတ်သက်ပြီး စစ်ဆေးခံနေရတာဖြစ်ကြောင်း သိရပါတယ်။ 

တရုတ်ကာကွယ်ရေးဝန်ကြီးဌာနကတော့ ဝန်ကြီးလီရှန်ဖူနဲ့ပတ်သက်ပြီး တစ်စုံတရာ မှတ်ချက်ပြု ပြောဆိုခြင်းမျိုး မရှိကြောင်း သိရပါတယ်။ တရုတ်နိုင်ငံခြားရေးဝန်ကြီးအဖြစ်တာဝန်ယူခဲ့ဖူးသူ ကျင်ဂန်းဟာလည်း လူမြင်ကွင်း ကနေ ကာလအတန်ကြာပျောက်ဆုံးနေခဲ့ပြီးနောက် မကြာမီ ရာထူးက ဖြုတ်ချခံခဲ့ရကြောင်း သိရပါတယ်။

လီရှန်ဖူဟာ တရုတ်နိုင်ငံတော်ကောင်စီဝင် ငါးဦးထဲ ပါဝင်နေပြီး အခြားဝန်ကြီးတွေထဲ ရာထူးအဆင့်ပိုမြင့်သူဖြစ်ကြောင်း သိရပါတယ်။