Pearl (NSS) - စက်တင်ဘာ ၁၆

ပဲခူးမြို့ရှိ စေတဝန်ဘုန်းကြီးကျောင်းတွင် ဝါယာကြိုးဟောင်းများအပူလွန်ကဲရာမှ မီးလောင်မှုဖြစ်ပွားခဲ့ကြောင်း မြန်မာနိုင်ငံ မီးသတ်တပ်ဖွဲ့ထံမှ သတင်းရရှိသည်။ 

ဖြစ်စဉ်မှာ  ယမန်နေ့ (စက်တင်ဘာလ ၁၅ရက်)၊ ည(၁၂)နာရီ အချိန်ခန့်တွင်  ပဲခူးတိုင်း ၊ ပဲခူးမြို့၊ ကလျာဏီရပ်ကွက်၊ စေတဝန်ကျောင်းလမ်း၊ စေတဝန်ဘုန်းကြီးကျောင်းတွင် ဖြစ်ပွားခဲ့ကြောင်း သိရသည်။ 

အဆိုပါကျောင်းရှိ ပေ (၄၀) ပတ်လည်ရှိသောကျောင်းဆောင်တစ်ဆောင်၌  ဝါယာကြိုးဟောင်းများ အပူလွန်ကဲပြီး မီးလောင်မှု ဖြစ်ပွားခဲ့ကြောင်း သိရသည်။ 

မီးလောင်မှုအား ပဲခူးတိုင်းမီးသတ်ဦးစီးမှူးရုံး ၊ ခရိုင်မီးသတ်စခန်း ၊  မြို့နယ်မီးသတ်စခန်းနှင့် ပဲခူးနယ်မြေမီးသတ်စခန်းတို့မှ မီးငြှိမ်းသတ်ယာဉ်များဖြင့် မီးငြှိမ်းသတ်ခဲ့ရာ မိနစ်(၃၀)ခန့် ကြာပြီးနောက် မီးငြိမ်းသွားခဲ့ကြောင်း သိရသည်။ 

"ဝါယာကြိုးတွေက ဆင်ထားတာကြာပြီ။ ဝါယာကြိုးတွေက သက်တမ်းကကြာတဲ့အခါကျတော့ ဆွေးမြေ့ပြီးတော့မှ အပူလွန်ကဲပြီး မီးလောင်တာ။ လူထိခိုက်မှုတွေတော့ မရှိပါဘူး" ဟု ပဲခူးမြို့နယ်မီးသတ်စခန်းမှ တာဝန်ရှိသူတစ်ဦး က NSS ကို ပြောသည်။ 

ဖြစ်စဉ်ကြောင့် အဆိုပါ ပေ (၄၀) ပတ်လည် ကျောင်းဆောင်မှာ မီးလောင်ပျက်စီးဆုံးရှုံးသွားခဲ့ကြောင်း သိရသည်။