Pika (NSS) - စက်တင်ဘာ ၁ဝ

လာမည့်နှစ်တွင် ဘရာဇီးလ်နိုင်ငံ Rio de Janeiro မြို့မှာ ကျင်းပမည့် G20 ထိပ်သီးအစည်းအဝေးကို ရုရှားသမ္မတ ပူတင် တက်ရောက်မည်ဆိုပါက ဖမ်းဆီးခံရမှုများရှိလာမည်မဟုတ်ကြောင်း ဘရာဇီးလ်သမ္မတ လူလာဒီဆေးလ်ဗား က ပြောကြားခဲ့သည်။

နိုင်ငံတကာရာဇဝတ်တရားရုံး ICC သည် စစ်ရာဇဝတ်မှုကျူးလွန်မှုဖြင့် ရုရှားသမ္မတပူတင်ကို ဖမ်းဝရမ်းထုတ်ခဲ့ပြီး နောက် ပူတင်သည် နိုင်ငံခြားသို့ ခရီးထွက်ခြင်းမျိုးမရှိခဲ့ကြောင်း သိရသည်။ ဘရာဇီးလ် နှင့် အိန္ဒိယနိုင်ငံတို့သည် နိုင်ငံတကာရာဇဝတ်တရားရုံး ICC ၏ အဖွဲ့ဝင်နိုင်ငံများလည်းဖြစ်ကြောင်း သိရသည်။ 

သို့သော်လည်း ရုရှားသမ္မတပူတင်ကို ဖမ်းဝရမ်းထုတ်ထားသော ICC ၏ ဖမ်းဝရမ်းသည် တရားမဝင်ကြောင်း ရုရှား အစိုးရက ပြောဆိုထားသည်။ ထို့အပြင် ပူတင်သည် အိန္ဒိယနိုင်ငံ နယူးဒေလီမြို့တွင် ကျင်းပသည့် G20 ထိပ်သီး အစည်းအဝေးကို တက်ရောက်ခြင်းမျိုးမရှိခဲ့ကြောင်းလည်း သိရသည်။ ပူတင်သည် G20 ထိပ်သီးအစည်းအဝေးကို တက်ရောက်ရန်အတွက် ၎င်းအစား ရုရှားနိုင်ငံခြားရေးဝန်ကြီးဆာဂေးလာရော့ဗ်ကို စေလွှတ်ခဲ့ကြောင်း သိရသည်။ ဘရာဇီးလ်သမ္မတလူလာဒီဆေးလ်ဗား က "လာမယ့်နှစ်မှာ ဘရာဇီးလ်မှာ ကျင်းပမယ့် G20 ထိပ်သီးအစည်းအဝေး ကိုတက်ရောက်ဖို့ ရုရှားသမ္မတပူတင်ကို ဖိတ်ကြားသွားမှာပါ။ ကျွန်တော်တို့ဟာ ငြိမ်းချမ်းရေးကိုနှစ်သက်ပြီး လူတွေ ကို ကောင်းကောင်းမွန်မွန်ဆက်ဆံရတာကို သဘောကျပါတယ်။ ပူတင်ဟာ ဘရာဇီးလ်ကို အလွယ်တကူ လာရောက်နိုင်မယ်လို့ ကျွန်တော်ယုံကြည်ပါတယ်။ ရုရှားသမ္မတပူတင်ဟာ ဘရာဇီးလ်ကို လာရောက်လည်ပတ်ခဲ့ မယ်ဆိုရင် ဖမ်းဆီးခံရတာမျိုးတွေ ဘယ်တော့မှရှိလာမှာ မဟုတ်ပါဘူး" ဟု ပြောခဲ့သည်။

ထို့အပြင် ဘရာဇီးလ်သမ္မတလူလာဒီဆေးလ်ဗားက ၎င်းသည် လာမည့်နှစ်တွင် ရုရှားနိုင်ငံမှာ ကျင်းပမည့် BRICS ထိပ်သီးအစည်းအဝေးကို တက်ရောက်မည်ဖြစ်ကြောင်းလည်း ပြောကြားခဲ့သည်။