Pika (NSS) - စက်တင်ဘာ ၇

တရုတ်ဒုဝန်ကြီးချုပ် Liu Guozhong ဦးဆောင်သော တရုတ်ကွန်မြူနစ်ပါတီနှင့် အစိုးရကိုယ်စားလှယ်အဖွဲ့သည် မြောက်ကိုရီးယားနိုင်ငံတည်ထောင်သည့်နေ့ အထိမ်းအမှတ်ပွဲကို တက်ရောက်ရန်အတွက် ယခုသီတင်းပတ် နှောင်းပိုင်းတွင် မြောက်ကိုရီးယားနိုင်ငံသို့ လာရောက်လည်ပတ်မည်ဖြစ်ကြောင်း KCNA သတင်းဌာန က ဖော်ပြခဲ့သည်။

အဆိုပါခရီးစဉ်သည် လက်ရှိအာဏာရ ကိုရီးယားအလုပ်သမားပါတီ (WPK) ဗဟိုကော်မတီ နှင့် မြောက်ကိုရီးယား အစိုးရတို့၏ ဖိတ်ကြားချက်အရ လာရောက်ခြင်းဖြစ်ကြောင်း အစီရင်ခံစာတွင် ဖော်ပြထားသည်။

မြောက်ကိုရီးယားအစိုးရသည် နိုင်ငံတည်ထောင်သည့်နေ့အထိမ်းအမှတ်ပွဲကို စက်တင်ဘာလ(၉)ရက်တွင် ကျင်းပ မည်ဖြစ်ပြီး ဂျပန်နိုင်ငံလက်အောက်မှ လွတ်မြောက်သည့် (၇၅)နှစ်မြောက် နှစ်ပတ်လည်နေ့လည်းဖြစ်ကြောင်း သိရသည်။ 

မြောက်ကိုရီးယားနိုင်ငံကို ၁၉၄၈ ခုနှစ်တွင် စတင်တည်ထောင်ခဲ့ပြီးကတည်းက ကင်ဂျုံအန်း၏ မိသားစုက တောက်လျှောက် အုပ်ချုပ်လာခဲ့ခြင်းဖြစ်ကြောင်း သိရသည်။ မြောက်ကိုရီးယားခေါင်းဆောင်ကင်ဂျုံအန်းသည် ရုရှားသမ္မတပူတင် နှင့် လက်နက်ဆိုင်ရာသဘောတူညီချက်များကို ဆွေးနွေးရန်အတွက် ကိုဗစ်(၁၉) ကာလ နောက်ပိုင်း ပထမဆုံးပြည်ပခရီးစဉ်အဖြစ် သွားရောက်လည်ပတ်နိုင်ချေရှိနေကြောင်း အမေရိကန်အစိုးရ တာဝန်ရှိသူများက ပြောခဲ့သည်။ 

ရုရှားနိုင်ငံသို့ သွားရောက်လည်ပတ်မည့် မြောက်ကိုရီးယားခေါင်းဆောင်ကင်ဂျုံအန်း၏ ခရီးစဉ်သည် လာမည့် သီတင်းပတ်အတွင်းဖြစ်နိုင်ကြောင်း အမည်မဖော်လိုသော အရာရှိများ၏ ပြောကြားချက်ကို ကိုးကားပြီး New York Times က ဖော်ပြခဲ့သည်။

အဆိုပါသတင်းများနှင့်ပတ်သက်ပြီး မြောက်ကိုရီးယား နှင့် ရုရှားတို့ဖက်က မှတ်ချက်ပြုပြောဆိုခြင်းမျိုး မရှိသေးကြောင်း သိရသည်။ ပြီးခဲ့သည့် ဇူလိုင်လတွင် တရုတ်ကွန်မြူနစ်ပါတီ ပေါ်လစ်ဗျူရိုအဖွဲ့ဝင် Li Hongzhong ဦးဆောင်သော တရုတ်ကိုယ်စားလှယ်အဖွဲ့သည် ကိုရီးယားစစ်ပွဲပြီးဆုံးခြင်း နှစ်(၇ဝ)ပြည့်အထိမ်းအမှတ် စစ်ရေးပြ အခမ်းအနားကို တက်ရောက်ရန်အတွက် မြောက်ကိုရီးယားနိုင်ငံသို့ သွားရောက်လည်ပတ်ခဲ့ကြောင်း သိရသည်။ 

အဆိုပါစစ်ရေးပြအခမ်းအနားအတွင်း  Li Hongzhong၊ ရုရှားကာကွယ်ရေးဝန်ကြီးဆာဂေးရှိုဂူ နှင့် မြောက်ကိုရီးယားခေါင်းဆောင် ကင်ဂျုံအန်း တို့သည့် ကုလသမဂ္ဂလုံခြုံရေးကောင်စီက တားမြစ်ပိတ်ပင်ထားသော နျူကလီးယားထိပ်ဖူးတပ် တိုက်ချင်းပစ်ပဲ့ထိန်းဒုံးကျည်များကို ကြည့်ရှုခဲ့ကြကြောင်း သိရသည်။ 

ထို့အပြင် မြောက်ကိုရီးယားသည် အစိုးရသည် ကိုဗစ်(၁၉)ကပ်ရောဂါစတင်ဖြစ်ပွားသည့် ၂ဝ၂ဝ ပြည့်နှစ်ကတည်း က နယ်စပ်များကို ပိတ်ထားခဲ့သော်လည်း ပြီးခဲ့သည့်လတွင် ပထမဆုံးအကြိမ်အဖြစ် ပြည်ပရောက် မြောက်ကိုရီးယားနိုင်ငံသားများကို နိုင်ငံအတွင်းသို့ ပြန်လည်ဝင်ရောက်ခွင့်ပြုခဲ့ကြောင်း သိရသည်။