ဂျန်ဇက် (NSS) - ဩဂုတ် ၂၅

ယူကရိန်းတပ်ဖွဲ့များက ရုရှားနိုင်ငံပိုင်နက်အတွင်းရှိ အရပ်သားများကို ပစ်မှတ်ထားတိုက်ခိုက်နေခြင်းအပေါ် စိုးရိမ်မိကြောင်း ကုလသမဂ္ဂက သတင်းထုတ်ပြန်လိုက်ပါတယ်။

ယူကရိန်းဟာ ပြီးခဲ့တဲ့သုံးလအတွင်း ရုရှားပိုင်နက်တွေဖြစ်တဲ့ Donetsk ဒေသ၊ Kursk ဒေသနဲ့ Belgorod ဒေသတွေ ကိုပစ်မှတ်ထားပြီး အမြှောက်တွေနဲ့ အရှိန်မြင့်ပစ်ခတ်တိုက်ခိုက်ခဲ့ကြောင်း သိရပါတယ်။

ရုရှားနိုင်ငံ မြို့တော်မော်စကိုမြို့ကိုလည်း ဒရုန်းများနဲ့တိုက်ခိုက်ဖို့ ကြိုးပမ်းခဲ့ရာ အရပ်ဘက်ဆိုင်ရာအဆောက်အဦး များ ထိခိုက်ပျက်စီးခဲ့ရကြောင်း သိရပါတယ်။ ကုလသမဂ္ဂအဖွဲ့ရဲ့ပြောရေးဆိုခွင့်ရှိသူတစ်ဦးဖြစ်တဲ့ ဒီကိုင်လိုက " ယူကရိန်းရဲ့ပစ်ခတ်တိုက်ခိုက်မှုကြောင့် ရုရှားနယ်စပ်ဒေသနဲ့ ရုရှားနိုင်ငံ မော်စကိုမြို့တို့က အရပ်သားတွေ ထိခိုက်ရတာမျိုးတွေ ရှိခဲ့တယ်။ အရပ်သားတွေနဲ့ အရပ်ဘက်ဆိုင်ရာအဆောက်အဦးတွေအပေါ် ယူကရိန်းက ပစ်မှတ်ထားတိုက်ခိုက်နေသလိုမျိုးဖြစ်နေတယ်။ နိုင်ငံတကာဥပဒေတွေမှာ အရပ်သားတွေကို ထိခိုက်ပျက်စီး အောင်မလုပ်ဖို့ သတ်မှတ်ထားတဲ့စည်းကမ်းတွေကို ချိုးဖောက်နေသလိုမျိုးဖြစ်နေတယ်" လို့ ပြောပါတယ်။

ယူကရိန်းစစ်ရေးပဋိပက္ခဟာ ရုရှားနိုင်ငံအပေါ် အနောက်အုပ်စုနိုင်ငံတွေက ပြုလုပ်တဲ့  proxy war စစ်ပွဲမျိုးဖြစ် ကြောင်း၊ အဲဒီ  proxy war စစ်ပွဲကို ၂ဝ၁၄ ခုနှစ် နောက်ပိုင်းကတည်းက စီစဉ်ထားခဲ့ခြင်းဖြစ်ကြောင်း၊ အမေရိကန် ဦးဆောင်တဲ့အနောက်အုပ်စုနိုင်ငံတွေဟာ လက်ရှိအချိန်မှာ ယူကရိန်းပဋိပက္ခအဆုံးသတ်ဖို့ စိတ်ဝင်စားမှုမရှိ ကြောင်း ကုလသမဂ္ဂဆိုင်ရာရုရှားသံအမတ်ကြီး က ပြောပါတယ်။

၎င်းက "ယူကရိန်းအစိုးရဟာ ယူကရိန်းနိုင်ငံအတွင်းရှိ ရုရှားဘာသာစကားပြောတဲ့လူတွေကို စစ်တိုက်တာမျိုးတွေ မလုပ်ဘူးဆိုရင် ယူကရိန်းနဲ့ ရုရှားကြားစစ်ပွဲဖြစ်လာမှာ မဟုတ်ဘူး။ ယူကရိန်းဟာ ကုလသမဂ္ဂက ခွင့်ပြုပေးထားတဲ့ မင့်စ့်မြို့ သဘောတူညီချက်တွေကို ချိုးဖောက်ခဲ့တယ်" လို့ ရုရှားသံအမတ်ကြီး က ပြောပါတယ်။