Pearl (NP News) - ဇွန် ၅

မန္တလေးတိုင်း၊ မိတ္ထီလာမြို့နယ်တွင် ခိုးယူလာသည့်ဆိုင်ကယ်ဖြင့် ဝင်တိုက်မိရာ အသက်(၆ဝ)အရွယ် ထန်း သီးရောင်းသူ အမျိုးသမီးတစ်ဦး သေဆုံးသွားခဲ့ကြောင်း ပြည်သာယာလူငယ် လူမှုကူညီရေးအသင်းထံမှ သတင်းရရှိသည်။

ဖြစ်စဉ်မှာ ယနေ့ (ဇွန်လ ၅ ရက်)၊ နံနက်(၁၁)နာရီခွဲအချိန်ခန့်တွင် မိတ္ထီလာမြို့နယ်၊ သဲကုန်းကျေးရွာအနီးတွင် ဖြစ်ပွားခဲ့ကြောင်း သိရသည်။ 

မိတ္ထီလာမြို့၊ စက်မှုဇုန်(၃)လမ်းထိပ်ရှိ ဆိုင်တစ်ဆိုင်တွင် ရပ်ထားသော ဆိုင်ကယ်အား ခိုးယူလာသော အမျိုးသားတစ်ဦးသည် သဲကုန်းကျေးရွာနီးအရောက်တွင် အရှိန်မထိန်းနိုင်ဖြစ်ကာ လမ်းဘေး၌ ထန်းသီးရောင်သူ အမျိုးသမီးတစ်ဦးအား ဆိုင်ကယ်ဖြင့် ဝင်တိုက်မိခဲ့ကြောင်း သိရသည်။

"ဆိုင်မှာရပ်ထားတဲ့ ဆိုင်ကယ်ကိုခိုးလာတာ။ နောက်က လိုက်လာတော့ သဲကုန်းရွာနားအရောက်မှာ အရှိန်မထိန်းနိုင်ဘဲတိုက်မိတာ။ ဆိုင်ကယ်ရော အမေကြီးရော လွင့်သွားတယ်။ တိုက်တဲ့လူကတော့ ဒဏ်ရာတွေနဲ့ပဲ အဖော်ပါလာတဲ့ ဆိုင်ကယ်နဲ့ပြေးသွားတယ်။ တိုက်ခံရတဲ့ အမေကြီးကတော့ သတိလစ်သွားတယ်။  ဦးခေါင်းမှာဒဏ်ရာရတယ်၊ မြေပြင်ကုသမှုတွေ လုပ်ပေးပြီး၊ သတိပြန်ရလာတော့ ဆေးရုံကို ပို့ပေးလိုက်တာ။ အခု (၂)နာရီလောက်က ဆေးရုံက ဖုန်းပြန်ဆက်တာ အဲဒီအမေကြီး ဆုံးသွားပြီတဲ့။ တိုက်တဲ့လူကိုတော့ ခုထိတော့ မိတယ်မကြားသေးပါဘူး"ဟု ပြည်သာယာလူငယ် လူမှုကူညီရေးအသင်း၏ တာဝန်ရှိသူ တစ်ဦးမှ NP News ကိုပြောသည်။ 

ဖြစ်စဉ်ကြောင့် ထန်းသီးရောင်းသူအဘွားအိုသည် ဦးခေါင်းတွင် ထိခိုက်ဒဏ်ရာရရှိခဲ့ပြီး ၎င်းအား မိတ္ထီလာ ပြည်သူ့ဆေးရုံသို့ ပို့ဆောင်ပေးထားပြီးနောက် သေဆုံးသွားခဲ့ကြောင်း သိရသည်။ 

သေဆုံးသူအမျိုးသမီးသည် အသက် (၅၇)နှစ်ရှိသူဖြစ်ပြီး သဲကုန်းကျေးရွာတွင် နေထိုင်ကြောင်း သိရသည်။