ဂျန်ဇက် (NSS) - ဇွန် ၁

အမေရိကန် သမ္မတ ဂျိုးဘိုင်ဒန်က အစ္စရေးအစိုးရအဖွဲ့ဟာ ဖြစ်ပွားလျက်ရှိနေတဲ့ ဂါဇာစစ်ပွဲအဆုံးသတ်နိုင်ဖို့ အဆိုပြုကမ်းလှမ်းချက်အသစ်တွေ ထပ်မံလုပ်ဆောင်လိုက်ကြောင်း ပြောပါတယ်။ အစ္စရေးအစိုးရက အဆိုပြုကမ်းလှမ်းခဲ့တဲ့ ကမ်းလှမ်းချက်အသစ်တွေထဲမှာ သီတင်း ပတ်ခြောက်ပတ်ကြာအပစ်ခတ်ရပ်စဲရေး၊ ပါလက်စတိုင်းအကျဉ်းသားတွေပြန်လွှတ်ပေးရေး၊ လူသားချင်းဆိုင်ရာစာနာမှုအကူအညီပေးရေးကုန်ကား အစီးရေ ၆၀၀ ကို ဂါဇာဒေသထဲကို နေ့စဉ်ဖြတ်သန်းခွင့်ပေးမယ်ဆိုတဲ့အချက်တွေအပြင် ဂါဇာဒေသကနေ အစ္စရေးစစ်သားတွေပြန်လည်ရုတ်သိမ်းမယ်ဆိုတဲ့အချက်တွေ ပါဝင်နေကြောင်းသိရပါတယ်။

ဟားမက်စ်အဖွဲ့အနေနဲ့ ပြန်ပေးဆွဲခံထားရတဲ့ အစ္စရေးနိုင်ငံသားတွေကို အမြန်ဆုံးပြန်လွှတ် ပေးရေးဆိုတဲ့အချက်တွေပါဝင်နေကြောင်း သိရပါတယ်။ သမ္မတ ဂျိုးဘိုင်ဒန်က "အစ္စရေးဟာ ဂါဇာစစ်ပွဲအဆုံးသတ်ဖို့ အဆိုပြုကမ်းလှမ်းထားတယ်။ ဟားမက်စ်လက်နက်ကိုင်အုပ်စုကလည်း အပစ်ခတ်ရပ်စဲရေးလိုလားနေတယ်။ အဲဒီအဆိုပြုကမ်းလှမ်းချက်တွေထဲမှာ အဆင့်သုံးဆင့်ပါဝင်နေတယ်။ ပထမအဆင့်က သီတင်းပတ်ခြောက်ပတ်ကြာ အပစ်ခတ်ရပ်စဲဖို့ဖြစ်တယ်"လို့ ပြောပါတယ်။

လက်ရှိအချိန်မှာ အစ္စရေးရဲ့အဆိုပြုကမ်းလှမ်းချက်အသစ်တွေနဲ့ပတ်သက်ပြီး အမေရိကန်သမ္မတအပြင် ကုလသမဂ္ဂအတွင်းရေးမှူးချုပ် ဂူတာရက်စ်တို့ကလည်း လက်ခံကြိုဆိုခဲ့ပြီး ဟားမက်စ်လက်နက်ကိုင်အဖွဲ့ကို ကမ်းလှမ်းချက်တွေလက်ခံပေးဖို့ တောင်းဆိုတိုက်တွန်းနေကြောင်းသိရပါတယ်။ အစ္စရေးနဲ့ဟားမက်စ်လက်နက်ကိုင်အဖွဲ့ကြားစစ်ပွဲဖြစ်လာခဲ့ပြီးနောက်ပိုင်း အမေရိကန်၊ ကာတာနဲ့ အီဂျစ်နိုင်ငံတို့ဟာ ဂါဇာစစ်ပွဲအဆုံးသတ်စေဖို့ ကြားဝင်ဆောင်ရွက်ပေးခဲ့ပေမယ့် မျှော်လင့်သလောက်သဘောတူညီမှုမရဘဲ တိုက်ပွဲတွေ ဆက်လက်ဖြစ်ပွားနေခဲ့ကြောင်းသိရပါတယ်။