ဂျန်ဇက် (NSS) - ဖေဖော်ဝါရီ ၂၅

ပြီးခဲ့တဲ့နှစ်မှာ ဝန်ကြီးချုပ်ရာထူးက နုတ်ထွက်သွားခဲ့တဲ့ ကမ္ဘောဒီးယားဝန်ကြီးချုပ်ဟောင်း ဟွန်ဆန်ဟာ နိုင်ငံရေးလောကကို တစ်ကျော့ပြန် လာတော့မှာဖြစ်ကြောင်းသိရပါတယ်။

ဟွန်ဆန်ဟာ ကမ္ဘာဒီးယားနိုင်ငံကို နှစ်ပေါင်း ၄၀ နီးပါးကြာ အုပ်ချုပ်ခဲ့သူဖြစ်ပြီး ပြီးခဲ့တဲ့နှစ်မှာ သူရဲ့သားအကြီးဆုံးဖြစ်တဲ့ ဟွန်မာနက်ကို ကမ္ဘောဒီးယား ဝန်ကြီးချုပ်ရာထူး လွှဲပြောင်းပေးခဲ့ပါတယ်။ ဟွန်ဆန်ဟာ ဝန်ကြီးချုပ်ရာထူးက နုတ်ထွက်ခဲ့ပေမယ့် ကမ္ဘောဒီးယားနိုင်ငံရေးလောကမှာ သြဇာလွှမ်းမိုးမှု

ရှိနေဆဲဖြစ်ကြောင်းသိရပါတယ်။ အသက် ၇၁ နှစ်အရွယ်ရှိ ဟွန်ဆန်ဟာ ဘုရင်ဖြစ်သူ ပြည်ပထွက်ချိန်မှာနိုင်ငံကို အကြီးအကဲတစ်ဦးအဖြစ် တာဝန်ယူခွင့်ရမယ့်အထက်လွှတ်တော်ဥက္ကဋ္ဌအဖြစ် တာဝန်ယူဖို့ ရည်ရွယ်ထားကြောင်းသိရပါတယ်။ အထက်လွှတ်တော်ကိုယ်စားလှယ်များမဲပေးရွေးချယ်ပွဲကို ဖေဖော်ဝါရီလ ၂၅ ရက်က ကျင်းပခဲ့ပြီးနောက် မဲလာပေးသူတစ်ဦးက " ဝန်ကြီးချုပ်ဟောင်းဟွန်ဆန်သာ အထက်လွှတ်တော်ကိုဦးဆောင်မယ်ဆိုရင် နိုင်ငံဟာ နောက်ထပ် ငြိမ်းချမ်းမှုတွေ နဲ့ ဖွံ့ဖြိုးမှုတွေ ပိုမိုဖြစ်လာမှာပါ"လို့ပြောပါတယ်။ 

အထက်လွှတ်တော်ကိုယ်စားလှယ်ရွေးကောက်ပွဲကို ဟွန်ဆန် ဦးဆောင်နေတဲ့ ကမ္ဘောဒီးယား အာဏာရပါတီအပါအဝင် ကမ္ဘောဒီးယား နိုင်ငံရေးပါတီကြီးလေးပါတီနဲ့ ပါတီငယ် ၂ ခုတို့ ပါဝင်ယှဉ်ပြိုင်ခဲ့ကြောင်းသိရပါတယ်။ အထက်လွှတ်တော်ကိုယ်စားလှယ် နေရာပေါင်း ၆၂ နေရာအနက် ၅၈နေရာကို လွှတ်တော်ကိုယ်စားလှယ်များနဲ့ ဒေသဆိုင်ရာအုပ်ချုပ်ရေးတာဝန်ရှိသူများကမဲပေးရွေးချယ်မှာဖြစ်ပါတယ်။