စော (NSS) - ဖေဖော်ဝါရီ ၇

မွန်ပြည်နယ်၊ သထုံမြို့နယ်တွင် စိတ်ဝေဒနာရှင် အမျိုးသားတစ်ဦးက မိမိလည်ပင်းကို မိမိဘာသာဓားဖြင့် ပြန်လှီးမှုဖြစ်ပွားခဲ့ကြောင်း ပီတိနှလုံးသားလူမှုကယ်ဆယ်ရေးအသင်း-နောင်ဘိုကျေးရွာထံမှ သိရသည်။

ဖြစ်စဉ်မှာ ယနေ့ (ဖေဖော်ဝါရီလ ၇ ရက်)၊ နံနက်(၆) နာရီခွဲဝန်းကျင်အချိန်တွင် သထုံမြို့ နယ်၊ ဘုရင်ဂျီကုန်းရပ်ကွက်တွင် အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း သိရသည်။

“သူများပြောပုံအရကတော့ သူကနည်းနည်းလွတ်နေတယ်ပြောပါတယ်။ အမြဲတမ်းကြီးတော့ လွတ်မနေဘူး။ တစ်ခါတစ်ခါ ဖောက်တာပါ။ တစ်လက်မလောက်ရှိမယ်။ လက်ရှိကတော့ သွေးတိတ်သွားပြီးဆိုတော့ စိုးရိမ်ရတဲ့အနေအထားတော့ မတွေ့ဘူး” ဟု ပီတိနှလုံးသားလူမှုကယ်ဆယ်ရေးအသင်း-နောင်ဘိုကျေးရွာမှ တာဝန်ရှိသူတစ်ဦးက NSS ကိုပြောသည်။

အဆိုပါ အမျိုးသားသည် အသက် (၃၉)နှစ်အရွယ်ရှိ ဦးဆကပေါ်ဖြစ်ပြီး ဘုရင်ဂျီကုန်းရပ်ကွက်တွင် နေထိုင်သူဖြစ်ကြောင်း သိရသည်။ လက်ရှိတွင် ၎င်းအား သထုံပြည်သူ့ဆေးရုံကြီးသို့ ပို့ဆောင်ထားသော်လည်း ဒဏ်ရာမှာ မစိုးရိမ်ရကြောင်း သိရသည်။