ဂျန်ဇက် (NSS) - ဒီဇင်ဘာ ၂၃

မြန်မာနိုင်ငံမြောက်ပိုင်းရှိ လက်နက်ကိုင်အဖွဲ့တွေဟာ ရှမ်းပြည် နယ်မြောက်ပိုင်းရှိ နေရပ်စွန့်ခွာထွက်ပြေးနေရသူတွေကို အတင်းအဓမ္မ လူသစ်စုဆောင်းတာ၊ ပြန်ပေးဆွဲတာတွေလုပ်ဆောင်နေကြောင်း လူ့အခွင့်ရေးစောင့်ကြည့်ရေးအဖွဲ့ Human Rights Watch က ပြောပါတယ်။

ကိုးကန့်လက်နက်ကိုင်အဖွဲ့ (MNDAA) အနေနဲ့ အရပ်သားတွေကို ပြန်ပေးဆွဲဖမ်းဆီးမှု လုပ်ဆောင်တာမျိုး ချက်ချင်းရပ်တန်သင့်ကြောင်း၊ အရပ်သားတွေကို ကာကွယ်ပေးနိုင်အောင်လိုအပ်တဲ့အစီမံများလုပ်ဆောင်ရမှာဖြစ်ကြောင်း လူ့အခွင့်ရေးစောင့်ကြည့်ရေးအဖွဲ့ကပြောပါတယ်။ 

လူ့အခွင့်ရေးစောင့်ကြည့်ရေးအဖွဲ့ရဲ့ အာရှရေးရာဒါရိုက်တာဖြစ်သူ အီလာနီ ပီယာဆန်က "MNDAA အဖွဲ့တွေဟာ အရပ်သားတွေကို အတင်းအဓမ္မ လူသစ်စုဆောင်းတာ၊ ပြန်ပေးဆွဲတာတွေ လုပ်ဆောင်ပြီး စစ်ပွဲဥပဒေကို ချိုးဖောက်နေတယ်။ MNDAA အဖွဲ့ဟာ အရပ်သားတွေကို တိုက်ပွဲတွေမှာ ဘေးကင်းလုံခြုံမှုဖြစ်အောင် လုပ်ဆောင်ပေးသင့်တယ်"လို့ ပြောပါတယ်။ 

ကိုးကန့်လက်နက်ကိုင်အဖွဲ့ဟာ ရခိုင်လက်နက်ကိုင်အဖွဲ့၊ တအောင်းလက်နက်ကိုင်အဖွဲ့နဲ့ ပူးပေါင်းပြီး ရှမ်းပြည်နယ်မြောက်ပိုင်းရှိ မြန်မာတပ်မတော်စခန်းတွေကို အောက်တိုဘာလ ၂၇ ရက်ကစတင်တိုက်ခိုက်ခဲ့ရာ ဒေသခံသောင်းနဲ့ချီပြီး နေရပ်စွန့်ခွာထွက်ပြေးခဲ့ရကြောင်းသိရပါတယ်။ မြန်မာနိုင်ငံမှာအောက်တို ဘာလ ၂၇ ရက်ကစတင်ပြီး တိုက်ပွဲတွေဖြစ်လာခဲ့ပြီးနောက်ပိုင်း ရှမ်းပြည်နယ်မှာ လူပေါင်း (၁)သိန်းအပါအဝင် နိုင်ငံတဝှမ်းမှာ လူပေါင်း (၆)သိန်းကျော်နေရပ်စွန့်ခွာတိမ်းရှောင်ခဲ့ရကြောင်းကုလသမဂ္ဂအဖွဲ့ကပြောပါတယ်။

လောက်ကိုင်မြို့က ထွက်ပြေးလာတဲ့ ဆရာဝန်တစ်ဦးက MNDAA အဖွဲ့ဟာ လောက်ကိုင်မြို့ နဲ့ ချင်းရွှေဟော်မြို့ကြားရှိ Par Hsin Kyaw မြို့အပြင်ဘက်နားမှာ လူငယ်တွေကို အတင်း အဓမ္မ ဖမ်းဆီးထိန်းသိမ်းတာ၊ ဆွဲခေါ်တာတွေလုပ်ဆောင်တာတွေ တွေ့မြင်ခဲ့ရကြောင်း ပြောပါတယ်။

၎င်းက "MNDAA အဖွဲ့ဟာ ဆိုင်ကယ် နဲ့ လူ နှစ်ဦး၊ သုံးဦး ပါဝင်တဲ့ အုပ်စုကို ဆွဲခေါ်သွားတာတွေ့ရတယ်။ MNDAA အဖွဲ့ဟာ လူငယ်တွေကိုလည်း ဆွဲခေါ်ခဲ့တယ်။ ကျွန်တော်ဆိုရင် အလွန်စိုးရိမ်ကြောက်လန့်ခဲ့တယ်"လို့ပြောပါတယ်။

ကိုးကန့်လက်နက်ကိုင်အဖွဲ့ MNDAA အနေဖြင့် လောက်ကိုင်မှ စစ်ဘေးရှောင်လာသောလူငယ်များကို ဖမ်းဆီးခေါ်ဆောင်ကာ စစ်သားစုဆောင်ခြင်းများ ပြုလုပ်နေကြောင်း နစကပြောခွင့်ရဗိုလ်ချုပ်ဇော်မင်းထွန်းကလည်း ပြီးခဲ့သည့် ဒီဇင်ဘာလ ၂ ရက်တွင် ပြောကြားခဲ့ဖူးသည်။