ယွန်း (NSS) - ဒီဇင်ဘာ ၂

ကျောက်ဆည်ရှိ တမုတ်ရွှေဂူကြီးဘုရား အပါအဝင် ရှေးဟောင်းယဥ်ကျေးမှုအမွေအနှစ်ဒေသ(၄၈)ခုကို ဥပဒေနှင့်အညီ ထိန်းသိမ်းစောင့်ရှောက်လျက်ရှိကြောင်း သိရသည်။

မြန်မာနိုင်ငံအမျိုးသားယဉ်ကျေးမှုဗဟိုကော်မတီဥက္ကဋ္ဌ ဗိုလ်ချုပ်ကြီးတင်အောင်စန်းက ဒီဇင်ဘာလ(၁)ရက်တွင် နေပြည်တော်ရှိ သာသနာရေးနှင့် ယဉ်ကျေးမှုဝန်ကြီးဌာန ယဉ်ကျေးမှုရတနာခန်းမ၌ကျင်းပခဲ့သည့် အစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာနိုင်ငံ၏ ဒြပ်ရှိယဥ်ကျေးမှုအမွေအနှစ်များထဲမှ အစောဆုံးယဥ်ကျေးမှုထွန်းကားခဲ့သည့် ပျူမြို့ဟောင်းသုံးမြို့ဖြစ်သည့် ဟန်လင်း၊ ဗိဿနိုး၊ သရေခေတ္တရာနှင့် ပုဂံယဥ်ကျေးမှုအမွေအနှစ်ဒေသများသည် ကမ္ဘာ့အမွေအနှစ်စာရင်းဝင်အဖြစ် သတ်မှတ်ခံခဲ့ရပြီးဖြစ်သည်။

ထို့ပြင် အဆိုပါဒေသများနည်းတူ မြောက်ဦးယဥ်ကျေးမှုအမွေအနှစ်ဒေသကိုလည်း ကမ္ဘာ့အမွေအနှစ်စာရင်းဝင်ဖြစ်စေရေးကို ဆောင်ရွက်နေကြောင်း ပြည်ထောင်စုဝန်ကြီးက အသိပေးပြောကြားထားသည်။ 

အလားတူ ရှေးဟောင်းယဥ်ကျေးမှုအမွေအနှစ်ဒေသ (၄၈)ခုကို ဥပဒေနှင့်အညီ ကာကွယ်ထိန်းသိမ်းစောင့်ရှောက်လျက်ရှိပြီး မြန်မာနိုင်ငံ အမျိုးသားယဥ်ကျေးမှု ဗဟိုကော်မတီအနေဖြင့် မူဝါဒချမှတ်ပေးခြင်း၊ နယ်မြေအပိုင်းအခြားများ သတ်မှတ်ပေးခြင်းနှင့် နည်းဥပဒေများကို ပြင်ဆင်ပေးခြင်းများ ဆောင်ရွက်ပေးလျက်ရှိကြောင်း သိရသည်။

“ရှေးဟောင်းယဥ်ကျေးမှုအဆောက်အအုံတွေရှိတဲ့နေရာတွေကို သတ်မှတ်လိုက်တာပေါ့။ ကျောက်ဆည်က တမုတ်ရွှေဂူကြီးဆိုရင်လည်း ဇုန်အဖြစ်သတ်မှတ်ထားတယ်။ ပဲခူးက က  မ္ဘောဇသာဒီနန်းတော်လည်း ပါတယ်၊ ပုဂံဆိုရင်လည်း ကမ္ဘာ့ယဥ်ကျေးမှုအမွေအနှစ်ရပြီးသား ဇုန်အဖြစ်သတ်မှတ်ထားတာပဲ။ အားလုံးကိုဇုန်အဖြစ်သတ်မှတ်ထားပြီး ဥပဒေတွေနဲ့အညီ ထိန်းသိမ်းနေပါတယ်”ဟု ရှေးဟောင်းသုတေသနနှင့် အမျိုးသားပြတိုက်ဦးစီးဌာန ဒုတိယ ညွှန်ကြားရေးမှူး ဦးညိုမြင့်ထွန်းက NSS ကိုပြောသည်။

ထို့ပြင် ရှေးဟောင်းနေရာများ၊ ရှေးဟောင်းအဆောက်အအုံများနှင့် ရှေးဟောင်းပစ္စည်းများ ပျောက်ပျက်ခြင်း၊ ဆုံးရှုံးခြင်းမရှိရေးကို လိုအပ်သလို ညွှန်ကြားကြီးကြပ်ပေးလျက်ရှိကြောင်း သိရသည်။

အလားတူ ဒြပ်ရှိ၊ ဒြပ်မဲ့များ ရွှေ့ပြောင်းနိုင်သည့် ပစ္စည်းအသေးများ နှင့် မရွှေ့ပြောင်းနိုင်သည့် အဆောက်အအုံကြီးများအပြင် ကျယ်ပြန့်ပြီး အ‌ဆောက်အအုံများစွာရှိသည့် ‌ရှေးဟောင်းဒေသများကိုပါ ထိရောက်စွာကာကွယ်နိုင်ရေးကိုလည်း ဆောင်ရွက်လျက်ရှိကြောင်း သိရသည်။