စော (NSS) - စက်တင်ဘာ ၂၉

ရန်ကုန်တိုင်း၊ မင်္ဂလာဒုံမြို့နယ်တွင် ရန်ကုန်-ပဲခူးကားမှ Gas ဖြည့်ရန်စောင့်နေသည့် အမျိုးသားအား ဝင်တိုက်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ယနေ့(စက်တင်ဘာလ ၂၉ ရက်) နံနက် (၆)နာရီ ၃ဝ မိနစ်အချိန်တွင် မင်္ဂလာဒုံမြို့နယ်၊ ပြည်လမ်းရှမ်းစု gas ဆိုင်အနီး၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း ပုလဲအရန်မီးသတ်တပ်ဖွဲ့ထံမှ သိရသည်။

“gas ဖြည့်ဖို့ ကားကိုတန်းစီပြီးတော့ ယာဉ်မောင်းက အောက်ဆင်းလာတယ်။ အဲဒီအချိန်မှာ ပဲခူးကားကဝင်တိုက်တာပါ။ အရှိန်ပြင်းတာလည်း ပါတယ်။ ကားကို ဝင်တိုက်ပြီးမှ သူကိုတိုက်တာပါ” ဟု ပုလဲအရန်မီးသတ်တပ်ဖွဲ့မှ  တာဝန်ရှိသူတစ်ဦးက NP News ကို ပြောသည်။

အဆိုပါဖြစ်စဥ်ကြောင့် ယာဥ်တိုက်ခံခဲ့ရသည့် အမျိုးသားသည် အခင်းဖြစ်ပွားရာနေရာတွင် သေဆုံးခဲ့ပြီး ၎င်းအား အင်းစိန်ဆေးရုံသို့ ပို့ဆောင်ခဲ့ကြောင်း သိရသည်။ 

အလားတူ နေပြည်တော်၊ ပျဉ်းမနားမြို့၊ ပုရွက်ဆိပ်ကုန်းရွာထိပ်၊ မြို့ရှောင်လမ်းပေါ်တွင် ယမန်နေ့(ည ၈)နာရီ အချိန်၌ အမျိုးသား (၁)ဦး ကားတိုက်ခံရပြီး အခင်းဖြစ်ပွားရာနေရာတွင် သေဆုံးသွားကြောင်း သိရသည်။