Pika (NSS) - အောက်တိုဘာ ၃၁

အမေရိကန်ရုပ်ရှင်မင်းသား တွမ်ဟော်လန်ပါဝင်သရုပ်ဆောင်မည့် Spider-Man 4 ရုပ်ရှင်သည် (၂၀၂၆)ခုနှစ် ဇူလိုင်လတွင် ထွက်ရှိရန်စီစဉ်ထားကြောင်း Sony ကုမ္ပဏီက ထုတ်ပြန် ကြေညာခဲ့သည်။

ထို့ပြင် Spider-Man 4 ရုပ်ရှင်ကို လာမည့်နွေရာသီတွင် စတင်ရိုက်ကူးသွားမည်ဖြစ်ကြောင်းလည်း သိရသည်။ (၂၀၂၁)ခုနှစ်တွင် ထွက်ရှိခဲ့သော Spider-Man: No Way Home ရုပ်ရှင်၏ ဇာတ်ညွှန်းကို ရေးသားခဲ့သော Erik Sommers နှင့် Chris McKenna တို့သည် Spider-Man 4 ရုပ်ရှင်အတွက် ဇာတ်ညွှန်းကိုရေးနေပြီး Destin Daniel Cretton က ညွှန်ကြားမှုများလုပ်ဆောင်သွားမည်ဖြစ်ကြောင်း သိရသည်။ တွမ်ဟော်လန်ပါဝင်သရုပ်ဆောင်မည့် ဗြိတိန်-အမေရိကန်ရုပ်ရှင်ထုတ်လုပ်သူ ခရစ္စတိုဖာနိုလန်၏နောက်ထပ်ရုပ်ရှင်ဇာတ်ကားတစ်ကားထွက်ရှိပြီးနောက် သီတင်းပတ်တစ်ပတ်အကြာ (၂၀၂၆)ခုနှစ် ဇူလိုင်လ(၂၄)ရက်တွင် Spider-Man 4 ရုပ်ရှင်ထွက်ရှိလာမည် ဖြစ်သည်။ ခရစ္စတိုဖာနိုလန်၏ နောက်ထပ်ရုပ်ရှင်တွင် ပါဝင်သရုပ်ဆောင်ရန်အတွက် လက်ခံခဲ့ကြောင်း တွမ်ဟော်လန်က ယခင်က ဝန်ခံပြောဆိုခဲ့ဖူးသည်။

သို့သော်လည်း အမည်မသိပရောဂျက်တွင် ပါဝင်ရိုက်ကူးရန်အတွက် စိတ်လှုပ်ရှားနေကြောင်းလည်း တွမ်ဟော်လန်ကပြောကြားခဲ့သည်။ တွမ်ဟော်လန်က "ကျွန်တော်လုံးဝပြောနိုင်တာတစ်ခုကတော့ ဒီအမည်မသိရုပ်ရှင်ဇာတ်ကားနဲ့ပတ်သက်ပြီး တကယ်ကိုစိတ်လှုပ်ရှားနေတာပါ။ ပြီးတော့ ရိုးရိုးသားသားပြောရရင် ဒါကကျွန်တော်သိသမျှအရာအားလုံးပါပဲ"ဟု ပြောဆိုခဲ့သည်။ ထို့ပြင် ခရစ္စတိုဖာနိုလန်၏ နောက်ထပ်ရုပ်ရှင်ဇာတ်ကားအတွက် ဖုန်းခေါ်ဆိုမှုကို လက်ခံရရှိခြင်းမှာ Spider-Man ဇာတ်ကားတွင် ပီတာပါကာအဖြစ် ပါဝင်သရုပ်ဆောင်ရန်အတွက် ဖုန်းခေါ်ဆိုမှုကို လက်ခံရရှိခဲ့သည့်အချိန်အား သတိရစေကြောင်း တွမ်ဟော်လန်က ထပ်မံပြောဆိုခဲ့သည်။ 

တွမ်ဟော်လန်က "ခရစ္စတိုဖာနိုလန်ရဲ့ နောက်ထပ်ရုပ်ရှင်မှာ ပါဝင်သရုပ်ဆောင်ဖို့ ဖုန်းခေါ်ဆိုမှုကိုရရှိခဲ့တာက လွန်ခဲ့တဲ့(၁၀)နှစ်တုန်းက Spider-Man ရုပ်ရှင်မှာ ပါဝင်သရုပ်ဆောင်ဖို့အတွက် ဖုန်းခေါ်ဆိုမှုလက်ခံရရှိခဲ့တဲ့အကြောင်းကို သတိရမိစေပါတယ်။ ဒါက ကျွန်တော့်အတွက် အရမ်းကို အံ့ဩဖို့ကောင်းတဲ့အရာတစ်ခုပါ။ ကျွန်တော်တကယ်ကို စိတ်လှုပ်ရှားနေပါတယ်"ဟု ပြောဆိုခဲ့သည်။