ALynn (NSS) - ဇွန် ၁၁

ယခုနှစ်ကုန်တွင် ရုရှားနိုင်ငံ၏ Gazprom ကုမ္ပဏီနှင့် စာချုပ်သက်တမ်းကုန်ဆုံးမည်ဖြစ်သည့် အတွက် ယူကရိန်း၏ သဘာဝဓာတ်ငွေ့သယ်ယူပို့ဆောင်ရေး အခြေခံအဆောက်အအုံကို ဆက်လက်အသုံးပြုနိုင်ရန် ဥရောပသမဂ္ဂတာဝန်ရှိသူများက ညှိနှိုင်းရန် ကြိုးစားနေကြောင်း Bloomberg က တနင်္လာနေ့ (ဇွန်လ ၁၀ ရက်) တွင် ဖော်ပြခဲ့သည်။ 

ကိယက်ဗ်နှင့် မော်စကိုကြား ပဋိပက္ခမည်သို့ပင်ရှိစေကာမူ Gazprom သည် ယူကရိန်းနိုင်ငံမှ Naftogaz ကုမ္ပဏီနှင့်အတူ ၎င်း၏သယ်ယူပို့ဆောင်ရေးစာချုပ်ပါ စည်းကမ်းချက်များကို လိုက်နာပြီး သြစတြီးယားနှင့် စလိုဗက်ကီးယားသို့ တစ်နှစ်လျှင် သဘာဝဓာတ်ငွေ့ ကုဗမီတာ ၁၅ ဘီလီယံခန့် ပေးပို့လျက်ရှိသည်။ Bloomberg ၏အဆိုအရ ဆွေးနွေးပွဲများသည် “အစောပိုင်းအဆင့်” တွင်ရှိနေဆဲဖြစ်ပြီး အသေးစိတ်အချက်များစွာကို ခွဲခြမ်းစိတ်ဖြာရန် လိုအပ်နေသေးကြောင်း သိရသည်။ အီးယူသည် ရုရှားအစား အဇာဘိုင်ဂျန်မှ သဘာဝဓာတ်ငွေ့ကို ဝယ်ယူလိုပြီး ယူကရိန်း၏ အခြေခံအဆောက်အအုံများမှတစ်ဆင့် ပို့ဆောင်ရန် လိုလားသည်။ 

"ယူကရိန်းဓာတ်ငွေ့သယ်ယူပို့ဆောင်ရေးစနစ်သည် ကြီးမားပြီး ၎င်းဆက်လက်လည်ပတ်ဖို့ဆိုလျှင် ဖောက်သည်ရှိမှဖြစ်မည်၊ သို့မဟုတ်လျှင် အဆုံးအရှုံးများနိုင်သည်" ဟု Naftogaz ၏ CEO Alexey Chernyshov က Bloomberg သို့ပြောကြားခဲ့သည်။ ယူကရိန်းသည် ၂၀၂၁ ခုနှစ်တွင် ဓာတ်ငွေ့သယ်ယူပို့ဆောင်ရေးမှ ဒေါ်လာတစ်ဘီလျံ အကျိုးအမြတ်ရရှိပြီး ၎င်း၀င်ငွေကို ထိန်းထားလိုသည်။ Naftogaz ၏ CEO Chernyshov သည် ရုရှားနှင့် လက်ရှိအစီအစဉ်ကို သက်တမ်းတိုးရန် ငြင်းဆန်ထားသည်။ အီးယူသို့ အဇာဘိုင်ဂျန်သည် ဓာတ်ငွေ့ထောက်ပံ့မှုအပြည့်အဝပေးနိုင်သော်လည်း ၎င်းသည် ယူကရိန်း၏လမ်းကြောင်းသို့ တိုက်ရိုက်ဝင်ရောက်ခွင့်မရှိပါ။ အဇာဘိုင်ဂျန်အစိုးရရော ရေနံနှင့် သဘာဝဓာတ်ငွေ့ ကုမ္ပဏီ SOCAR ကပါ ကောလဟာလ သဘောတူညီချက်နှင့် ပတ်သက်ပြီး Bloomberg ၏ မေးမြန်းထားမှုအား မှတ်ချက်မပြုခဲ့ပါ။ သြစတြီးယားအာဏာပိုင်များကလည်း အလားတူမှတ်ချက်ပေးရန် ငြင်းဆိုခဲ့သည်။ ယူကရိန်းလိုလားသော တက်ကြွလှုပ်ရှားသူတစ်ဦး၏ ပစ်သတ်ခြင်းကို မခံရမီက စလိုဗက်ကီးယားဝန်ကြီးချုပ် Robert Fico သည် ယမန်လက အဇာဘိုင်ဂျန်သို့ ခရီးထွက် ပြီးနောက် သဘောတူညီချက်အသစ်တစ်ခုဖြစ်နိုင်ခြေရှိကြောင်း ပြောကြားခဲ့သည်။

ဥရောပကော်မရှင်သည် စွမ်းအင်ချွေတာရေးနှင့် ပြန်လည်ပြည့်ဖြိုးမြဲပစ္စည်းများအသုံးပြုခြင်း ပါ၀င်သည့် အစားထိုးလောင်စာများအပေါ် မှီခိုနေပြီး ရာသီဥတုအစီအစဉ်ကို အကောင် အထည်ဖော်ခြင်းဖြင့် ရုရှားမှဓာတ်ငွေ့တင်ပို့ခြင်းကို အဆုံးသတ်နိုင်မည်ဟု ယုံကြည်ထား သည်။ သို့သော် ဆွေးနွေးပွဲများနှင့် နီးစပ်သူများက ဥရောပဆောင်းရာသီ နီးကပ်လာသည်နှင့်အမျှ လက်ရှိ သဘောတူညီချက်သည် သက်တမ်းကုန်ဆုံးတော့မည်ဖြစ်သောကြောင့် ယခုနှစ်ကုန်တွင် သဘော တူညီချက်သစ်နှင့်ပတ်သက်၍ ဆုံးဖြတ်ချက်များချမှတ်နိုင်ဖွယ်ရှိကြောင်း Bloomberg သို့ ပြောကြားခဲ့သည်။