Pearl (NSS) - ဇွန် ၁၁ 

   AA  လက်နက်ကိုင်အဖွဲ့သည် မူးယစ်ဆေးဝါးဖြင့်ရပ်တည်နေပြီး (၉)နှစ်အတွင်း ငွေကျပ်ဘီလျံ (၃၀ဝ)နီးပါးတန်ဖိုးရှိဆေးဝါးများကို ၎င်းတို့နှင့်ဆက်စပ်၍ ဖမ်းဆီးရမိခဲ့ကြောင်း နစကပြောခွင့်ရ ဗိုလ်ချုပ်ဇော်မင်းထွန်းက ပြောသည်။

AA လက်နက်ကိုင်အဖွဲ့အနေဖြင့် ရခိုင်ပြည်နယ်အတွင်း၌ လူမျိုးရေးအစွန်းရောက်လှုံ့ဆော်မှုများ၊ အစုလိုက်အပြုံလိုက်သတ်ဖြတ်မှုများ၊ မီးရှို့ဖျက်ဆီးမှုများကို ဆောင်ရွက်နေသည့်အပြင် ရခိုင်ပြည်နယ်အတွင်း တစ်မျိုးသားလုံးလူညွန့်တုံးစေရန်အတွက် မူးယစ်ဆေးဝါးများ ရောင်းဝယ်ခြင်း၊ ဖြန့်ဖြူးခြင်းများကိုဆောင်ရွက်နေသည်ဟု ဗိုလ်ချုပ်ဇော်မင်းထွန်းက‌ ပြောသည်။

ထို့ပြင် AA လက်နက်ကိုင်အဖွဲ့သည် မူးယစ်ဆေးဖြင့် ရပ်တည်နေသော အဖွဲ့အစည်းဖြစ်ကြောင်းလည်း ၎င်းက ပြောသည်။ "ရခိုင်လက်နက်ကိုင်အဖွဲ့ AA  က မူးယစ်ဆေးနဲ့  ရပ်တည်နေတဲ့ အဖွဲ့အစည်းဖြစ်ပါတယ်။ ၂၀၁၆ ခုနှစ်ကနေ ဒီမတ်လအတွင်း AA သောင်း ကျန်းသူအဖွဲ့နဲ့ဆက်စပ်နဲ့ မူးယစ်ဆေးဝါးဖမ်းဆီးရရှိမှု (၉)ကြိမ်ရှိခဲ့တယ်။ မူးယစ်ဆေးဝါး  ကာလတန်ဖိုး (၂၉၄.၈၂) ဘီလျံကျပ်ဖြစ်ကြောင်းတွေ့ရှိရပါတယ်"ဟု ဗိုလ်ချုပ်ဇော်မင်းထွန်းက ပြောသည်။

၂၀၁၆ ခုနှစ်မှစတင်၍ ၂၀၂၄ ခုနှစ် မတ်လအထိ AA လက်နက်ကိုင်အဖွဲ့နှင့် ဆက်စပ်သည့် မူးယစ်ဆေးဖမ်းဆီးရရှိမှု (၉)ခုရှိခဲ့ကာ ကာလတန်ဖိုးအနေဖြင့် (၂၉၄ ဒသမ ၈၂) ဘီလျံကျပ်ဖြစ်ကြောင်းလည်း သိရသည်။ ပြည်သူများအနေဖြင့်လည်း AA လက်နက်ကိုင်အဖွဲ့၏ မူးယစ်ဆေးဝါး ရောင်းဝယ်ဖောက်ကားမှုလုပ်ငန်းများကို ဝိုင်းဝန်းဆန့်ကျင်ကြရန်လိုကြောင်းလည်း ဗိုလ်ချုပ်ဇော်မင်းထွန်းက တိုက်တွန်းထားသည်။ "ပြည်သူများအနေနဲ့ သူတို့ရဲ့ အစွန်း ရောက်လုပ်ရပ်တွေ၊ ရခိုင်တစ်မျိုးသားလုံးကို လူညွန့်တုံးစေမယ့် မူးယစ်ဆေးဝါးရောင်းဝယ် ဖောက်ကားမှု လုပ်ငန်းတွေလုပ်ဆောင်နေတဲ့ အကြမ်းဖက်သောင်းကျန်းသူ AA အဖွဲ့နဲ့ပတ် သက်ပြီးတော့ သတိရှိဖို့လိုပါတယ်။ ဒီဟာတွေကို ဆောင်ရွက်နေခြင်းဟာ ရခိုင်ပြည်နယ်၊ ရခိုင်ပြည်သူလူထု၊ ကျွန်တော်တို့ မြန်မာနိုင်ငံသူ/သားတွေအတွက် အကျိုးယုတ်စေမယ့် လုပ်ငန်းတွေပဲဖြစ်လို့ အားလုံးက ဝိုင်းဝန်းဆန့်ကျင်ကြဖို့ သတိပေးပြောကြားလိုပါတယ်" ဟု ၎င်းက ဆက်လက်ပြောသည်။

ပြီးခဲ့သည့် မတ်လ(၂၁)ရက်က ရန်ကုန်တိုင်း၊ မရမ်းကုန်းမြို့နယ် ဘုရင့်နောင်ဆိပ်ကမ်းရှိ အမှတ်(၂)တံတား၌ ဆိုက်ကပ်ထားသော ရန်ကုန်-စစ်တွေပြေးဆွဲနေသည့် "အမ်ဗီ-စိန်ပြည့်မင်း" ကုန်တင်သင်္ဘောကို ဝင်ရောက်ရှာဖွေခဲ့ရာ AAလက်နက်ကိုင်အဖွဲ့က သယ်ဆောင်ခိုင်းသော ကတ်ထူဖာ အတွင်းမှ ငွေကျပ် ၁ ဘီလျံတန်ဖိုးရှိ  WY စာတန်းပါ (ပန်းရောင်) စိတ်ကြွရူးသွပ်ဆေးပြားများကို ဖမ်းဆီးရမိခဲ့ဖူးသည်။ ထို့ပြင် ပြီးခဲ့သည့် ဒီဇင်ဘာလ တွင်လည်း ရန်ကုန်မြို့၌ AA လက်နက်ကိုင်အဖွဲ့မှ ပါဝင်ပတ်သက်နေသည့် မူးယစ်မှောင်ခိုဂိုဏ်းကို ဖော်ထုတ်ဖမ်းဆီးနိုင်ခဲ့ပြီး ငွေကျပ်ဘီလျံ (၅၀)ကျော်တန်ဖိုးရှိ မူးယစ်ဆေးများကို စံချိန်တင်သိမ်းဆည်းရရှိခဲ့ဖူးသည်။

အလားတူ ပြီးခဲ့သည့် မေလ (၂၉)ရက်တွင်လည်း ထွန်းထွန်းဝင်းနှင့် တေဇတို့လိုက်ပါလာပြီး ရန်ကုန်မှပြည်မြို့ဘက်သို့ မောင်းနှင်လာသည့် မော်တော်ယာဉ်တစ်စီးကို စစ်ဆေးစဉ် AA လက်နက်ကိုင် အဖွဲ့ထံသို့ပို့ဆောင်မည့် WY စာတန်းပါဆေးပြား စုစုပေါင်း(၂၉)သိန်း ၊ ကာလတန်ဖိုးငွေ ကျပ်သိန်း(၂)သောင်းကို ဖမ်းဆီးရမိခဲ့ကြောင်း သိရသည်။