PJ မှ PV နိုင်ငံကူးလက်မှတ် ပြောင်းလဲလျှောက်ထားမှုများကို ယာယီပိတ်သိမ်း
ယွန်း (NSS) - ဇွန် ၁၁
ပြည်ပထွက်ခွာအလုပ်လုပ်ခွင့် နိုင်ငံကူးလက်မှတ် PJ (Passport for Job) မှ အလည်အပတ် နိုင်ငံကူးလက်မှတ် PV (Passport for Visit) ပြောင်းလဲလျှောက်ထားမှုကို ယာယီပိတ်သိမ်း ထားကြောင်း သိရသည်။
အဆိုပါ ပြောင်းလဲလျှောက်ထားမှုကို ဇွန်လ(၆)ရက်နေ့မှစ၍ ပိတ်သိမ်းလိုက်ခြင်းဖြစ်ပြီး ပြန်လည်ဖွင့်လှစ်မည့်ရက်ကို မသိရသေးကြောင်း မြန်မာနိုင်ငံကူးလက်မှတ်ထုတ်ပေးရေးရုံးမှ တာဝန်ရှိသူတစ်ဦးက ဆိုသည်။ “သက်တမ်းရှိ PJ တွေကို PV ပြောင်းလဲတာကို ပိတ်ထားပါတယ်။ ဘာကြောင့်ဆိုတာတော့ မပါဘူး။ အပေါ်က ညွှန်ကြားချက်အတိုင်း ဆောင်ရွက်နေတာပါ။ ၆ ရက်နေ့ကနေစပြီး ပိတ်လိုက်တာပါ။ ဘယ်တော့ပြန်ဖွင့်မယ်ဆိုတာတော့ မသိရသေးပါဘူး။ အရင်လုပ်ထားတဲ့သူတွေကတော့ ရပါတယ်။ အခုကတော့ သက်တမ်းရှိပြီးတော့ PV လာချိန်းတဲ့ သူတွေကို ပိတ်တာပေါ့။ အဲဒီလိုလုပ်တဲ့သူတွေက အရမ်းတော့မများဘူး။ နည်းသွားပါပြီ” ဟု အထက်ပါတာဝန်ရှိသူက NSS ကို ပြောသည်။
ပြည်တွင်း၌ ပြီးခဲ့သည့် ဖေဖော်ဝါရီ(၁၀)ရက်နေ့တွင် ထုတ်ပြန်ခဲ့သည့် ပြည်သူ့စစ်မှုထမ်း ဥပဒေကြောင့် ပြည်တွင်းရှိ လုပ်သားများအနေဖြင့် နိုင်ငံခြားထွက်ခွာမှု ပိုမိုများပြားလာခဲ့ရာ PJ (Passport for Job) နိုင်ငံကူးလက်မှတ် လျှောက်ထားမှုပိုမိုများပြားလာခဲ့သည့်အပြင် တရားမဝင်သွားရောက်မှုများလည်း ရှိလာခဲ့သည်။ သို့သော် နစက၏ အလုပ်သမားဝန်ကြီး ဌာနမှ ပြီးခဲ့သည့် မေလ ၁ ရက်မှစ၍ ပြည်ပနိုင်ငံများ၏ မြန်မာအမျိုးသားအလုပ်ခေါ်စာများကို ယာယီဆိုင်းငံ့ထားခဲ့သည်။ ထို့နောက် မေ ၇ ရက်နေ့တွင် အသက် (၂၃)နှစ်မှ (၃၁)ကြားရှိ အမျိုးသားများမှလွဲ၍ ကျန်အမျိုးသားများအနေဖြင့် ပြည်ပထွက်ခွာ၍ အလုပ်လုပ်ကိုင်ခွင့်ရရှိပြီဖြစ်ကြောင်း ထပ်မံအသိပေးခဲ့သည်။
အဆိုပါ အသိပေးချက်ထုတ်ပြန်ပြီးနောက်ပိုင်းတွင် ပြည်ပထွက်ခွာအလုပ်လုပ်ခွင့် နိုင်ငံကူးလက်မှတ် (PJ) အစား အလည်အပတ်နိုင်ငံကူး လက်မှတ် (PV) လျှောက်ထားမှု များပြားလာခဲ့ကြောင်း သိရသည်။ ထိုင်းနိုင်ငံသည် မြန်မာအမျိုးသား အလုပ်သမားခေါ်ယူမှု အများဆုံးနိုင်ငံဖြစ်ပြီး စင်ကာပူနိုင်ငံ၊ ဂျပန်နိုင်ငံတို့မှလည်း မြန်မာအမျိုးသား အလုပ်သမားအများအပြားခေါ်ယူလျက်ရှိကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
မြန်မာတွင်ဖြစ်ပွားနေသည့် တိုက်ပွဲများအဆုံးသတ်ကြရန် မလေးရှားဝန်ကြီးချုပ်တိုက်တွန်းတောင်းဆို
RELATED POSTS
27 Jul 2024 | အထွေထွေ,ပြည်တွင်း
25 Jul 2024 | အထွေထွေ,ပြည်တွင်း