သန့်ဇင် (NSS) - ဇွန် ၁၀

ရန်ကုန်တိုင်းဒေသကြီး၊ မရမ်းကုန်းမြို့နယ်တွင် Light Truck ကားတစ်စီး မောင်းနှင်နေစဉ် ရုတ်တရက်မီးလောင်မှုဖြစ်ပွားကာ ကားတစ်စီးလုံးမီးလောင်ဆုံးရှုံးသွားခဲ့ကြောင်း သွားရောက်ကူညီခဲ့သည့် ဒေသခံလူမှုကူညီရေးအသင်းထံမှ သိရသည်။

ဖြစ်စဉ်မှာ ယနေ့(ဇွန် ၁၀ ရက်)၊ မွန်းလွဲ ၁၂နာရီခွဲအချိန်ခန့်က မရမ်းကုန်းမြို့နယ်၊ ကမ္ဘာအေးဘုရားလမ်း နှင့် အုတ်ပုံဆိပ်လမ်းထောင့်တွင် ဖြစ်ပွားခဲ့ခြင်းဖြစ်ကြောင်း သိရသည်။ “ကားကတော့ လမ်းမကြီးပေါ်မှာ မောင်းနေတုန်းမီးထလောင်တာဖြစ်မယ်။ ကျွန်တော်တို့ရောက်တော့ ကားကတစ်စီးလုံးလောင်သွားပြီးနေပြီ”ဟု သွားရောက်ကူညီခဲ့သည့် ဒေသခံလူမှုကူညီရေးအသင်းထံမှ တာဝန်ရှိသူတစ်ဦးက NSS ကိုပြောသည်။

အဆိုပါ ကားမီးလောင်မှုဖြစ်စဉ်တွင် လူထိခိုက်မှုမရှိခဲ့သော်လည်း Light Truck ကားတစ်စီးလုံးမှာ မီးလောင်ပျက်စီးသွားခဲ့ကြောင်း သိရသည်။ “လူထိခိုက်တာတော့မရှိပါဘူး။ ကားမီးလောင်တာတွေက အပူလွန်ပြီးလောင်တာက ရှားပါတယ်။ အဓိက ဝါယာရိန်းနဲ့ ကြိုးတွေပြတ်နေတာတို့၊ လွတ်နေတာတို့ကနေလောင်တာများတော့ အဲဒီအပိုင်းတွေကို ကားသမားတွေအနေနဲ့ သေချာဂရုစိုက်ပြီး မောင်းနှင်စေချင်တယ်” ဟု ၎င်းကအကြံပြုပြောဆိုထားသည်။

ထို့ကြောင့် ၎င်းကားမီးလောင်မှုဖြစ်စဉ်ကို မရမ်းကုန်းမြို့နယ်မီးသတ်တပ်ဖွဲ့က (၁၀)မိနစ်ခန့်အကြာမီးငြှိမ်းသတ်ခဲ့ရကြောင်း သိရသည်။